हिब्रू 8 - थुलुङ राईलाले सो़रख्रेप्सीकु डोक्पु डु़म्लाचो़ 1 गुकु र्वामु माल्तोकोम ल्वा ओरामङा सो़। इकीमा लागि आरेप्माम डु़म्लाचो़ बुमी। गुमी पाह्रीला माम्चु़नीकु हप गन्पाखोमकु जो़पलाम गन्मिडिम बु। 2 गुमीका सेपा खोमडा डोक्पु डु़म्लाचो़ दु़म्साका खारी बोमी। मेराम सेपा खोम ने मु़चु़मिमका बनेबेम्डिम मेएँ, लावो माम्चु़नी उनी त्वाकाङा बनेबेम्डिम आच्छाङाकाम सेपा बाखोप सो़। 3 माम्चु़नीलाई ग्वा-ग्वा नुङ सासेसी ग्वामु लागि खोत्ले डोक्पु डु़म्लाचो़ थुसिट्मिडिम दु़म। मेम्मिमका इकीमा डोक्पु डु़म्लाचो़का वो माम्चु़नीलाई हाम-हुम ग्वामु बासी। 4 गुमी ओराम सुबुडा बामिवा माला डु़म्लाचो़ मेदु़म्मिवा, हेङालोने मोशाकु डु़म्ला होम्साका माम्चु़नीलाई ग्वा-ग्वा ग्वाक्पा डु़म्लाचो़मिम ने ङादो आथामङा बाम्डी। 5 मेर्मिमका खारी बेपा खोम ने पाह्रीलाम बाट्पा आच्छाङाकाम सेपा खोम होङङा ल्वासिक्पा ओल होप्माम कोङङा सो़। हेङालोने मोशाका सो़रलोले बेपा खोम बनेबोमु खाप्डु़लो माम्चु़नीका गुलाई आरे बेम्डिम बाइडा, “मेराम हेसाका बनेबे र्वाक्साका गानालाई पोप्चङडला रेम्बेट्मा बाइडा मेराम होम्साका गाना खोत्ले बनेबे।” 6 लावो येशूलाई माम्चु़नीका ग्वाम्डिम डु़म्लाचो़कु खारी ने वाङमिम डु़म्लाचो़मिमलाई ग्वाक्मा खारीडाम डोक्पु बु। मेम्साका येशूका माम्चु़नीलाम उनीमा मु़चु़मिमकाडा रेट्मिडिम लाले सो़रख्रेप्सी ङादोम सो़रख्रेप्सीडाम छो़म डोक्पु बु। हेङालोने लाले सो़रख्रेप्सी ने मेरामडाम वो छो़म जो़पा ल्वामिमकु याचे जेसीलाम बनेबेम्डिम बाइडा। 7 ङादोम सो़रख्रेप्सीका मु़चु़मिमलाई मुमा मान्थिम दु़म्बेडु़मिवा माला ने लाले सो़रख्रेप्सी चाहे मेदु़प्सावा। 8 लावो माम्चु़नीका उनी त्वाकु मु़चु़मिम मुमानुङमा डार्मिडी, मेम्मा गुमीका र्वाम्डी, “मिप्रङमाका र्वामी, आरेप्माम थारी रोक्तोङा लेडु़, इस्राएल नुङ यहूदाडाम मु़चु़मिमनुङ गो कोले लाले सो़रख्रेपु। 9 ओराम सो़रख्रेप्सी गो मेर्मिमकु बेप-पापनुङ सो़रख्रेप्तोम होप्माम मेदु़म। गो मेर्मिमकु ल्वाडा झेसाका क्रिउतोमिमा मिश्र नेब्दीलामका ख्लुक्खेत्तोमिम बाइडा। मिप्रङमाका र्वामी, मेर्मिमका आमा सो़रख्रेप्सीगोडा थो़रलु़इमिम दु़म्साका मेबामिवा, मेम्मिमका गो मेर्मिमकामथो़ न मेसोक्पुवा। 10 मिप्रङमाका आथावो र्वामी, रोक्पा थारीका इस्राएलडाम मु़चु़मिमनुङ गो ओराम सो़रख्रेपु, मेर्मिमकु नगोडा आमा डु़म्ला जु़लु मा उनीमा नगोनो र्याक्साक्पुमी, गो मेर्मिमकु माम्चु़नी दु़म्ङु मा मेर्मिम आमा मु़चु़ दु़म्मी। 11 ‘मिप्रङमालाई छेनी’ र्वाक्साका सु़का वो उमा साउखोरे लोवो उमा वा-ल्वाकमिमलाई सीमु मेबासी। हेङालोने याक्के-डोक्पु मेर्मिम खोत्ले मु़चु़मिमका गोलाई छेङिमी। 12 हेङालोने मेर्मिमका बेम्डिम मेजो़पा खारीमिमकु छु़ल गो हेप्साक्पुमी, मा मेर्मिमका बेम्डिम छु़ल गो आमा नडा मेजु़ल्थाक्पु।” 13 ओराम सो़रख्रेप्सीलाई लाले सो़रख्रेप्सी र्वाम्डी मा ङादोम सो़रख्रेप्सीलाई मेमोकिमिम बनेबेम्डी। ओराम ने मेमोकिमिम दु़म्तो ल मा दालाङा दाम्ल्या। |
© Wycliffe Bible Translators, Inc. All rights reserved.
Wycliffe Bible Translators, Inc.