हिब्रू 7 - थुलुङ राईडोक्पु डु़म्लाचो़ मल्कीसेदेक 1 मल्कीसेदेक शालेम शहरडाम हप नुङ खोत्लेडाम डोक्पु माम्चु़नीकु डु़म्लाचो़ बाइडा। अब्राहामका ब्लले हपमिमनुङ क्वाल्बा बोमुडाम घ्ल्वासाका ख्लोसिक्तोङा लेड्डु़लो मल्कीसेदेकका गुलाई क्रो़म्स्तु़मा जि ग्वाक्तु़। 2 अब्राहामका घ्ल्वास्तामा रेड्डु़म खाप्चीकु दशांश मल्कीसेदेकलाई ग्वाक्तु़। मल्कीसेदेक र्वाक्मा ने “जो़पा न-गोनुङमा हप” सो़। शालेम शहरडाम हप र्वाक्मा “न-गो भ्रसिक्पा हप” र्वाक्पा थेसिथेडी। 3 मल्कीसेदेककु माम-पाप सु़ बाम्डी, गु बाम दोचो़गोडाम बाइडा, गु हेल्लो गस्ता, मा सिडा र्वाक्साका र्याक्मा मिबु। गु माम्चु़नीकु तारापाचो़ होप्मामङा हेल्लो लोवो दु़म्पाम बाट्पा डु़म्लाचो़ सो़। 4 इकीमा बेप-पाप अब्राहामका ने क्वाल्बाडा घ्ल्वास्तामा रेड्डु़म खोत्ले खाप्चीकु दशांश गुलाई ग्वाक्तु़ माला गु हाङको डोक्पु मु़चु़ बाइडा र्वाक्साका इनी त्वाकाङा मिम्सिट्नी। 5 लेवी दोचो़गोलाममिम डु़म्लाचो़मिमका उनीमा त्वाकु वा-ल्वाक इस्राएलीमिमलाम दशांश रमी। ओराम ने मेर्मिमकु डु़म्लाका र्वाक्ताम बाइडा। लेवीकु चो़-चु़सु़ नुङ इस्राएली खोत्लेङा अब्राहामकु चो़-चु़सु़मिम सो़। 6 डु़म्लाचो़ मल्कीसेदेक ने लेवी दोचो़गोडाम मेएँ। लावो गुका डु़म्लाचो़मिमकु बेप-पाप अब्राहामलामका दशांश रङडु़, मा माम्चु़नीका याचे जेम्डिम ल्वा डार्पा अब्राहामलाई गुका जि ग्वाक्तु़। 7 याक्के मु़चु़का डोक्पु मु़चु़लामका जि ल्वासु़ र्वाक्साका खोत्लेका च। 8 सिपामा लक्पा लेवी डु़म्लाचो़मिमका दशांश रमी, लावो मल्कीसेदेक ने मेर्मिमडाम डोक्पु सो़। हेङालोने गु ने हेल्लो लोवो दु़महोम बु र्वाक्साका माम्चु़नीकु सिजेमका र्वा। 9 दशांश रपा लेवीमिमका वो त्वाकु बेप-पाप अब्राहामलामका मल्कीसेदेकलाई दशांश ग्वाम्डी र्वाक्साका सु़का लोवो र्वामु चाप्सु़। 10 हेङालोने मल्कीसेदेकका अब्राहामलाई क्रो़म्स्तु़लो लेवी ने गस्ताम मेबायावा, गु उमा बेप-पाप अब्राहामकु मिरो़मगोडाङा बाइडा। येशू मल्कीसेदेक होप्मामङा 11 लेवीकु चो़-चु़सु़लामका डु़म्लाचो़ दु़म्मु बासी र्वाक्साका डु़म्लाका र्वाक्ता। लावो हारून होप्माम मेर्मिमकु डु़म्लाचो़मिमकाम खारीलाम माम्चु़नीकु ङादोडा खोत्ले ल्वा जो़पा दु़म्सावा माला मल्कीसेदेक होप्माम खारी बेपा कोङमी डु़म्लाचो़ रोमु मेबासावा। 12 डु़म्लाचो़का बेपा खारी फान्सि माला डु़म्ला वो फान्सिमुङा बासी। 13 गुइ ख्रीष्टकु दुथाम ल्वा बेत्तोङा बिइ। गुमी ने वाङमी दोचो़लाममिम सो़। उनीमा दोचो़गोडा सु़का वो डु़म्लाचो़कु खारी बु़डु़म मिबु। 14 इकी ङाचो़ येशू यहूदाकु दोचो़लाम रोम्डिम बाइडा र्वाक्साका खोत्लेका च। ओराम दोचो़लाम डु़म्लाचो़कु दुथाम मोशाका हाम वो र्वाक्ताम मेबायावा। 15 मल्कीसेदेकाम होप्माम खारी बेपा कोङमी डु़म्लाचो़ रोलो डु़म्ला वो फान्सि र्वाक्पा ल्वा गुइ जो़होमका थेसिथेडी। 16 गुमीका उनीमा बेप-पापमिमकु डु़म्ला होम्साका डु़म्लाचो़ दु़म्मिडिम मेएँ, लावो हेल्लो वो मेसिपा त्वारो़मलाममिम यु़मका डु़म्लाचो़ दु़म्मिडिम सो़। 17 उनीमा दुथाम माम्चु़नीकु सिजेमका आरे र्वा, “मल्कीसेदेक होप्माम ङा गाना हेल्लो लोवो दु़म्पाम बाट्पा डु़म्लाचो़ सो़।” 18 ङादोम डु़म्ला पार्सिड्डाम बु, हेङालोने ओरामका मु़चु़मिमलाई माम्चु़नीकाडा रेन्मु मेचाप्सु़वा मा हाम ना हामकाम दु़स्ता। 19 मोशाकु डु़म्लाका ने मु़चु़मिमलाई माम्चु़नीकु ङादोडा जो़पा बोमु मेचाप्सु़वा, लावो मेरामडाम हापा जो़पा ल्वा माम्चु़नीका ग्वानिनी र्वाम्डिम मेराम ल्वालामका गुइ माम्चु़नीकु फार्डा रोम्थिमु चाप्सी। 20 वाङमिम ने माम्चु़नीका कसम पेसाका डु़म्लाचो़ दु़म्बेट्मिडिम मेएँ, 21 लावो गुमीलाई ने कसम पेसाका डु़म्लाचो़ दु़म्बेट्मिडिम सो़। उनीमा दुथाम माम्चु़नीकु सिजेमका आरे र्वा, “मिप्रङमाका कसम पेम्डिम बु, मा गुमीका उनीमा न मेफान्मी, गाना हेल्लो लोवो दु़म्पाम बाट्पा डु़म्लाचो़ सो़।” 22 ओराम कसमलामका ङा येशूलाई ङादोम सो़रख्रेप्सीडाम जो़पा सो़रख्रेप्सी बेप्सोक्पा दु़म्बेडु़मी। 23 ङादोम डु़म्लाचो़मिम सिपामा लक्पा दु़म्मिडिमका हेल्लो लोवो डु़म्लाचो़कु खारी बोमुम बुमु मेचाप्मिवा। मेम्मिमका मेर्मिममकु ङार्सी ने हापा दु़म्मिडी। 24 लावो येशू ने हेल्लो लोवो दु़म्मिम बुमी मा गुमी डु़म्लाचो़कु खारी बेपाम बाट्पा दु़म्मिडिम बु। 25 मेम्मिमका गुमीडा थो़रलु़साका माम्चु़नीडा रोक्पामिमलाई गुमीका ओम्लो नुङ हेल्लो लोवो सेल्मी। हेङालोने मेर्मिमकाम लागि माम्चु़नीनुङ सो़म्दी बोम्सामु लागि हेल्लो लोवो गुमी दु़म्मी। 26 मेम्मिमका गुइ चाहेबिइमिम डोक्पु डु़म्लाचो़ ने येशू ङा सो़। गुमी सेपा, हाम वो मेख्लो़ट्पा, छु़ल मान्थिम बुमी, मा गुमी छु़लचो़मिमडाम वाङ दु़म्साका खोत्लेडाम गेले पाह्रीला कोसिक्पा बुमी। 27 वाङमिम डोक्पु डु़म्लाचो़मिम ने त्वाकु छु़ल हेम्मु लागि मा मु़चु़मिमकु छु़ल हेम्मु लागि हेल्लो लोवो सासेन्मी, लावो येशूका ने मेर्मिम होङङा सासेन्मु मेबासी। हेङालोने गुमीका ने मु़चु़मिमकु छु़ल हेप्सी हेल्लो लोवो दु़म्नु़म बुनु़ र्वाक्साका उनी त्वापलाई कोखेपङा सासेन्ला सो़सिम्डी। 28 मोशाकु डु़म्लाका ने छु़ल बोमु चापा मु़चु़ बाइडा लोवो डोक्पु डु़म्लाचो़ थुड्डु़। लावो मोशाका डु़म्ला ग्वाक्तु़मिम चङ्डा माम्चु़नीका कसम पेसाका र्वाम्डिम सिजेमका हेल्लो लोवो दु़म्पाम बाट्पा मा खोत्ले बोमु चापा उनीमा तारापाचो़ येशूलाई डोक्पु डु़म्लाचो़ थुट्मिडी। |
© Wycliffe Bible Translators, Inc. All rights reserved.
Wycliffe Bible Translators, Inc.