हिब्रू 6 - थुलुङ राई1 मेम्मिमका ख्रीष्टकु दुथाममिम ङादो सीसिट्मा याक्केतो ल्वामिम डिसाका उनीमा दुथाममिम ल्वा थेट्पा नुङ बोमु चापा दु़म्नी। सिमुथो़ लक्पा खारीलाम ख्लोसिक्पा ल्वा, 2 कु-रु़दु़ममिमकु दुथाम सीसि, मु़चु़मिमडला ल्वा जु़ल्साका सो़म्दी बेपा, सिमुलाम बम्गेट्पा मा हेल्लो लोवो दु़म्पा देन्देकु दुथाम ने ङादो माम्चु़नीडला थो़र लु़न्निलोङा सीसिट्निम बाइडा। मेम्मिमका आरेप्माम ल्वामिम आथावो गानी सीसिमुमबुमु मेबासी। 3 मेम्मा माम्चु़नीका न बेम्डी माला थेट्पा नुङ बोमु चापा सीसिथो़ लमु चाप्सी। 4 माम्चु़नीलाम ओल ल्वापामिम, माम्चु़नीलाममिम राप्लावा दो़पामिम, माम्चु़नी-पेल ल्वापामिम, 5 माम्चु़नीकु जो़पा सिजेम ल्वापामिम, मा रोक्पा थारीकाम माम्चु़नीकु यु़मखारी ल्वापा 6 मु़चु़ दु़म्साका वो माम्चु़नीलाई डिसाका लक्पामिमलाई आथावो छु़ललामका ख्लोक्साका माम्चु़नीडा रेन्मु मेझाम। हेङालोने आरेप्माम मु़चु़मिमका ने माम्चु़नीकु तारापाचो़लाई आथावो क्रूसडा चेन्मी मा खोत्ले मु़चु़मिमकु ङादोडा उनीमा नो़-कल पार्सामी। 7 वो योमा ये-द जिडु़, मेराम ये-दका खारी बेपामिमकाम लागि जो़पा मा-के सिन्बेडु़, मेराम ये-दलाई माम्चु़नीका जि ग्वामी। 8 लावो मेराम ये-दका चु़ नुङ चोङ्खी कोङङा ल्याबेड्डु़ माला मेराम हाम ना हामकाम दु़म। आरेप्माम ये-द ने माम्चु़नीका वाइतो बेन्मी मा चङ्डा मेराम मुका बुक्तु़र ख्या। 9 द्वादीबुङ वा-ल्वाकनी, गुकु आरेसाका र्वाकु लोवो गानीडला आरेप्माम दु़म र्वाक्साका थो़र मेबोकु। लावो गानी सेल्सिनी मा हापा जो़पा ल्वामिम ल्वानी र्वाक्साका थो़र बोकु। 10 माम्चु़नीडला थो़रलु़पामिमकाम लागि गानी जो़पा खारी नुङ रिखाम बेन्नी मा आथावो बोनिम बुनी। माम्चु़नी जो़होमका निया बोमी। मेम्मिमका गानी बेन्निम जो़पा खारी नुङ रिखाम गुमीका प्ल्वाम्डिम मिबु। 11 आरेप्माम इनीमा जो़पा खारी नुङ रिखाम इनीमा सिमु थारीसम्मङा बेनिम बानी मा गानी हाम ल्वामु न बेन्निम बु मेराम डार्नी र्वाक्पा आकीमा न बु। 12 गानी भ्रेपा मेदु़म्नी, लावो माम्चु़नीका याचे जेम्डिम ल्वाडा थो़रलु़पा मा इम्सिसाका लथाट्मिडिम होप्माम गानी वो दु़म्नी र्वाक्पा आकीमा न बु। माम्चु़नीका याचे जेम्डिम ल्वा आच्छाङा रेन्थिमी 13 माम्चु़नीका अब्राहामनुङ याचे जेम्डिलो उनी त्वापडाम डोक्पु सु़ वो मेबामिवामका गुमीका उनी त्वाकु नङडाङा कसम पेम्डी। 14 गुमीका आरे र्वाम्डी, “गो गानालाई आच्छाङा जि ग्वानी मा इमा चो़-चु़सु़मिम छो़म हापा छाबेट्पुमी।” 15 अब्राहामका इम्सिसाका लथाड्डु़। मेम्मा माम्चु़नीका याचे जेम्डिम जि ल्वास्तु़। 16 मु़चु़मिमका उनी त्वापडाम डोक्पु मु़चु़कु नङडा कसम पोमी मा खालबेपा ल्वामिम वो कसमलामकाङा हुम्सोमी। 17 माम्चु़नीका ङादो याचे जेम्डिम ल्वा हेल्लो मेफान्सी र्वाक्साका मेराम ल्वा डार्पामिमलाई जो़होमका रेम्बेट्पा उनीमा न बाइडा। मेम्मिमका गुमीका कसम पेम्डी। 18 माम्चु़नीका गुइनुङ जेम्डिम याचे नुङ कसम पेम्डिम निफिङा गुमीका आच्छाङा रेन्थिमी। हेङालोने गुमीका लिमा मेथेन्मी। मेम्मिमका उनीमा थेर्मा-थेर्सीडा लक्पा मु़चु़मिमका बिइडिम हाम-हुम ल्वापा न हेल्लो लोवो झेन्थमु इकीमा सो हन। 19 मेराम हाम-हुम ल्वापा नकाङा गुइलाई झेथाक्सा मा मेराम थो़रलु़इमिम नुङ भाल-आथो़ मेदु़म्पा बु। हाम-हुम ल्वापा ओराम नका रिपा-येगोनोम माम्चु़नीकु बाखोपगोनो लक्सा। 20 इकीमा लागि येशू गुइडाम ङादोङा मेराम बायडा लमु दु़म्मिडिम बु। मल्कीसेदेक डु़म्लाचो़ होप्मामङा गुमी हेल्लो लोवो दु़म्पाम बाट्पा डोक्पु डु़म्लाचो़ दु़म्मिडिम बु। |
© Wycliffe Bible Translators, Inc. All rights reserved.
Wycliffe Bible Translators, Inc.