हिब्रू 5 - थुलुङ राई1 डोक्पु डु़म्लाचो़ खोत्ले उमा मु़चु़मिमलामकाङा थुसिड्डाम दु़म। मेम्मा गु मु़चु़मिमकाम छु़ल हेम्सामुमि लागि ग्वा-ग्वा नुङ सासेसी माम्चु़नीलाई गुका ग्वाकु़। 2 मेचक्साका मेजो़पा खारी बेपा नुङ लाम्दी ख्लो़ट्पामिमनुङ गु याक्के दु़म्साका दो बु। हेङालोने उ त्वाप वो छु़ल बोमु चापा मु़चु़ सो़। 3 मेम्मिमका मु़चु़मिमकु छु़ल हेम्मु लागि कोङङा मेएँ, लावो उ त्वाकु छु़ल हेम्मु लागि वो सासेन्मुकु ग्वा-ग्वा ग्वामु बासी। 4 सु़का वो त्वाका न बेसाका डोक्पु डु़म्लाचो़ दु़म्मु मेचाप्सु़। लावो हारूनलाई होम्साका गुलाई खारी बेप्डा माम्चु़नीका येट्मिडिम दु़म्मु बासी। 5 येशू ख्रीष्टका वो डोक्पु डु़म्लाचो़ दु़म्मु लागि उनी त्वाका त्वापलाई डोक्पु बेम्डिम मेएँ, लावो माम्चु़नीका गुमीलाई थुट्मीडिम, “गाना आमा तारापाचो़ आनेप गो इमा पाप दु़म्ङोडोम बु।” 6 माम्चु़नीकु सिजेमगोडाम कोङमी खोमडा वो गुमीका र्वाम्डी, “मल्कीसेदेक डु़म्लाचो़ होप्माम गाना वो हेल्लो लोवो दु़म्पाम बाट्पा डु़म्लाचो़ सो़।” 7 येशू सु़म्दिडा बाम्डिलो ख्राप्तो येत्तो प्ल आल्साका त्वाप सिमुलाम सेल्मु चापा माम्चु़नी नुङ छो़म र्वाम्डी मा सो़म्दी बेम्डी। मेम्मा माम्चु़नीका उनीमा सो़म्दी थो़म्डी, हेङालोने येशू याक्के दु़म्साका माम्चु़नीलाई डोक्पु मिम्मिडिम बाइडा। 8 ख्रीष्ट माम्चु़नीकु तारापाचो़ बाम्डी, लावो त्वाका ल्वाम्डिम दु़खालामका गुमीका माम्चु़नीका र्वामिमिम थो़पा दु़म्मु सीसिम्डी। 9 आरेसाका माम्चु़नीका र्वाम्डिम खोत्ले खारी बोमु दु़म्मिडिम चङडा येशूका थो़रलु़पामिमलाई हेल्लो वो मेसिपा त्वारो़म ग्वामु लागि सेल्मिडी। 10 मेम्मा मल्कीसेदेककु खारी होम्साकाङा गुमीका बेम्डिम उनीमा खारीलाम माम्चु़नीका गुमीलाई डोक्पु डु़म्लाचो़ थुट्मिडी। माम्चु़नीडा थो़र मेडिट्नी 11 ओरामकु दुथाम हापा र्वामु बासिक्पा ल्वा बु, लावो गानी थेसिमेथेट्पा बुनिमिमका थेसिथेन्बेन्मु मेझापा बु। 12 ओम्लोसम्म ने गानी वाङमिमिमलाई सीमु चापा दु़म्मु बासिक्पा बाइडा। लावो आथावो गानीलाई कोङनिमका माम्चु़नीकु सिजेमकाम याक्के ल्वा सीमु बासिक्पा बु। गानी ने डोमु मेझापा पोमुथोक डोमु चापा दु़म्मु बासिक्पा बाइडा, लावो दु़दु़ डुपा चो़च्चो़ होप्मामङा बुनी। 13 मामकु दु़दु़ कोङङा डुङु़ माला ने आथावो चो़च्चो़ङा दु़म। मेम्मिमका गु जो़पा मेजो़पा ल्वा हाम र्वाक्साका छेमु मेचापा दु़म। 14 लावो डोमु मेझापा पोमुथोक ने डोक्पु मु़चु़मिमकाम लागि सो़ मा गुका जो़पा नुङ मेजो़पा ल्वा हाम र्वाक्साका छेमु चाप्सु़। |
© Wycliffe Bible Translators, Inc. All rights reserved.
Wycliffe Bible Translators, Inc.