हिब्रू 4 - थुलुङ राईमाम्चु़नीकु ङेसिक्पा खोमगोनो गुइ हुमु 1 माम्चु़नीका उनीमा ङेसिक्पा खोमगोनो ङेम्सिमु ग्वानिनी र्वाम्डिम ल्वा ने आथावो बु। मेराम खोमगोनो हुमु मेल्वापा सु़ वो मेदु़म्सिनु़ र्वाक्साका गुइ चङचङया बुइ। 2 गुइलाई होम्साकाङा मेर्मिमलाई वो जो़पा-सेला थो़बेट्मा बाइडा। लावो मेर्मिमलाई थो़बेट्मा जो़पा-सेला ने हाम ना हामकाम दु़स्ता, हेङालोने मेर्मिमका थो़म्डिम ल्वाडा थो़र मेलु़मिवा। 3 लावो गुइ थो़रलु़पामिम ने उनीमा ङेसिक्पा खोमगोनो हुमु ल्वासी। गुमीका आरेसाका र्वाम्डिम बु, “गो मुलु़ बेउतोम गोनुङ ङेसिक्पा खोमडा मेर्मिम हुमु मेल्वामी।” लावो माम्चु़नीकु खारी ने सु़म्दि प्रङ्मिडिलोङा दु़स्ताम बाइडा। 4 हेङालोने सिजेमगोडा कोङ कोङ खोमडा लेत्नोम नेमकु दुथाम आरेसाका र्याक्मा बु, “खोत्ले खारीमिमलामका माम्चु़नी लेत्नोम नेम ङेम्सिम्डी।” 5 गुमीका आथावो ओरामकु दुथाम र्वाम्डी, “आमा ङेसिक्पा खोमगोनो मेर्मिम हेल्लो वो हुमु मेल्वामी।” 6 आथावो कोङ कोङ मु़चु़मिम बुमी मेर्मिम ने उनीमा ङेसिक्पा खोमगोनो हुमु ल्वामी। लावो माके जो़पा-सेला थो़पामिम ने र्वाकिमिम मेथो़पा दु़म्मिडिमका माम्चु़नीकु ङेसिक्पा खोमगोनो हुमु मेल्वामिवा। 7 आथावो माम्चु़नीका कोलेम नेमलाई “आनेप” र्वाक्साका फ्वाक्मिडी, मा माम्चु़नीका ङादो र्वाम्डिम होम्साका हापा थारी चङडा दाऊदलामका आथावो जेम्डी, “माम्चु़नीकु लो़लाम थो़न्नी माला, लु़म्ला मेबेडिचो़ मेदु़म्नी।” 8 हेङालोने यहोशूका मेर्मिमलाई आच्छाङाकु ङेम्सिमु ग्वाकु़मिवाम माला माम्चु़नीका कोङमी रोक्पा नेमकु दुथाम मेर्वाक्मिवा। 9 माम्चु़नी येत्नोम नेम ङेम्सिम्डिम होम्साकाङा माम्चु़नीकु मु़चु़मिमकाम लागि वो ङेसिक्पा नेम जु़ल्मिडिम बु। 10 हेङालोने माम्चु़नी सु़म्दि प्रङ्मिडिमा ङेम्सिम्डिम होम्साका उनीमा ङेसिक्पा खोमगोनो हुपा मु़चु़मिम त्वाकु खारी बोमुलामका ङेम्सिमी। 11 मेम्मिमका गुइ माम्चु़नीकु ङेसिक्पा खोमगोनो हुमु माली। माकेम मु़चु़मिम होम्साका थो़र मेलु़साका मे ङेसिक्पा खोमगोनो हुमु मेचापा मेदु़म्सी। 12 माम्चु़नीकु सिजेम खारी बेपाम बाट्पा नुङ यु़मनुङमा बु मा निफिलाम फल्पा कातु़रु़डाम वो हापा हन्पा होप्माम बु। ओरामका गोनो सुकु़मा त्वारो़म नुङ पेललाई फ्वाकु़ची, मा सेर नुङ छिटलाई वाङ-वाङ बु़। माम्चु़नीकु सिजेमका मु़चु़मिमकु न-गोडा बाट्पा ल्वा नुङ हाम हुम बेपा नकु दुथाम छाम्डु़। 13 सु़म्दिडा बाट्पा हाम वो गुमीलामका थमु मेझाम। उनीमा मिक्सीलामडा खोत्लेमथोक छ्याङलो-छ्याङलो बु। मेम्मा गुइ बिइडिम खोत्ले ल्वा गुमीनुङ सो़मु बासी। येशू ख्रीष्टङा इकीमा खोत्लेडाम डोक्पु डु़म्लाचो़ 14 पाह्रीथो़ लम्डिम माम्चु़नीकु तारापाचो़ येशू इकीमा खोत्लेडाम डोक्पु ङाउ डु़म्लाचो़ बुमी। मेम्मिमका गुमी आच्छाङाकाम र्वाक्साका रङडिम ल्वाडा गुइ थो़र बिइहोम बुइ। 15 इकीमा खोत्लेडाम डोक्पु ङाउ डु़म्लाचो़ इकी मेचाप्सीडा रेम्मु मेचाम्निनी र्वाक्पा मेबुमी। गुइ होम्साकाङा गुमी वो खोत्ले ल्वाडा न-छाम्ला सो़म्सिम्डिम बाइडा। लावो गुमीका ने छु़ल मेबेमिवा। 16 गुइ दिदाम नुङ न-थो़म ल्वासाका इकीमा खेरेलाडा ख्लो़ला सो़म्सिमु लागि साखाम थो़पा दिदामनुङमा माम्चु़नीकु गन्खोप फार्डा मेङिसाका लक्सी। |
© Wycliffe Bible Translators, Inc. All rights reserved.
Wycliffe Bible Translators, Inc.