हिब्रू 3 - थुलुङ राईयेशूङा मोशाडाम डोक्पु बुमी 1 गानी वो सेपा मु़चु़ दु़म्मु लागि माम्चु़नीका येट्निमिम बु, मेम्मिमका वा-ल्वाकनी, माम्चु़नीकु थु़र्मा नुङ डोक्पु डु़म्लाचो़ र्वाक्साका गुइ रङडिम येशूडा न सोक्नी। 2 मोशा माम्चु़नीकु नेमडाम मु़चु़मिम गोडा थो़रलु़इमिम दु़स्ताम होङ्ङा येशू वो गुमीलाई थुट्पा माम्चु़नीडा थो़रलु़इमिम बाम्डी। 3 कोङिनम मु़चु़का नेम बनेबु़ मा मेराम मु़चु़का बनेबु़डु़म नेमलाई मेएँ नेमहपलाई डोक्पु मिम्मी। मेम्साकाङा मोशाडाम ने येशूङा डोक्पु मिम्मु घ्रेट्पा बुमी। 4 नेममिम ने कोङनिम मु़चु़काङा बनेबोमिमिम दु़म। लावो खोत्लेम थोक बनेबेपा ने माम्चु़नीङा बुमी। 5 मोशा माम्चु़नीकु नेमडाम मु़चु़मिमगोडा थो़रलु़इमिम मा डु़ल्चो़ दु़म्साका बाइडा। माम्चु़नीका दिफु रेम्बेट्पा ल्वाकु दुथाम गुका मु़चु़मिमनुङ सो़यु़डु़। 6 लावो येशू ने माम्चु़नीकु नेमडाम मु़चु़मिमलाई रेपा थो़रलु़इमिम उनीमा तारापाचो़ सो़। गुइ मेङिसाका हाम हुम लथाडी माला माम्चु़नीकु मु़चु़मिम दु़म्सी सो़। माम्चु़नीकु कोर्थो़लाम मेबक्नी 7 मेम्मिमका माम्चु़नी-पेलका आरे र्वामी, “आनेप गानी माम्चु़नीकु लो़लाम थो़न्नि माला, 8 इनीमा न-गो लुङ होप्माम बेसाका इनीमा बेप-पापमिम माम्चु़नीकु कोर्थो़लाम बम्डिमा र्याङगो-र्याङगोडा मेर्मिमका उनीमा न छाम्मिडिम बाइडा। लावो गानी ने मेप्माम मेदु़म्नी। 9 मेसिन्डा ब्ल धु़म थ सम्म गो बेउतोम खारी ल्वाम्डी लोवो इनीमा बेप-पापमिमका थो़र मेलु़मिवामा आमा न छाम्मिडी। 10 मेम्मिमका गो मेर्मिम मु़चु़डाम छो़म आमा छोक्चो बक्ता। मेम्मा र्वाङडो, ‘मेर्मिम मु़चु़मिम हेल्लो लोवो गोडाम होनोवा बुमी। मेर्मिम गो र्वाङ्डोम लाम्दीडा लाम्दिमु मेबिम्सिप्मिवा।’ 11 आमा छोक्चो बक्तामका गो कसम पेउतोमा र्वाङडो, ‘गो मुलु़ बेउतोम आमा ङेसिक्पा बायडा मेर्मिम हेल्लो वो हुमु मेल्वामी’।” 12 थो़रलु़पा वा-ल्वाक नी, चङचङया बानी, गानीगोडाम कोङनिमनुङ बाट्पा मेजो़पा न-गो मा थो़र मेलु़सीका गानीलाई हेल्लो लोवो दु़म्पाम बाट्पा माम्चु़नीडाम होनोवा मेदु़म्बेट्नु़। 13 हेल्लो लोवो गानी इनी त्वाप त्वापगोडा सो हन्बेबोमु बासी। मेम्मा “आनेप” र्वाकिमिम खोत्ले थारीसम्म गानी मेमङा बेनिम बानी। मेम मेबेनिवा माला गानीगोडाम कोङनिमका छु़लगोनो फोसो़ वाम्निमा लु़म्ला मेबेडिचो़ दु़म्बेनी। 14 गुइ ङादो माम्चु़नीडा थो़र लु़इडिलो आथाम हुक्पा थारीसम्म भाल-आथो़ मेदु़म्साका गुमीडा थो़रलु़इमिम बुइ माला गुइ खोत्लेका ख्रीष्टनुङङा खुन्चु़म ल्वापा दु़म्सी। 15 माम्चु़नीकु सिजेमडा र्याक्मा बु: “आनेप गानी माम्चु़नीकु लो़लाम थो़न्नी माला इनीमा बेप-पापमिम माम्चु़नीकु कोर्थो़लाम बम्डिम होम्साका गानी लु़म्ला मेबेडिचो़ मेदु़म्नी।” 16 माम्चु़नीकु लो़लाम थो़पा मा वो उनीमा कोर्थो़लाम बक्पा खोत्ले मु़चु़मिम मोशाका मिश्र नेब्दीलामका ख्लुक्खेड्डु़मिम ने मेर्मिम ङा मेएँ मा? 17 माम्चु़नीकाम सु़ मु़चु़डाम ब्ल धु़म थसम्म उनी छोक्चो बक्ताम बाइडा? हाम मे छु़लचो़मिमडामङा मेएँ मा? मेर्मिम ने र्याङगो-र्याङगोडा सिम्डिम बाइडा। 18 “मेर्मिम गोनुङङा ङेसिक्पा बायडा हुमु मेल्वामी” र्वाक्साका माम्चु़नीका कसम पेम्डिम बाइडा। मेराम ल्वा मे लु़म्ला मेबेडिचो़मिमलाईङा र्वाम्डिम मेएँ मा? 19 मेम्मिमका गुइ चडिम बु, मेर्मिमका माम्चु़नीडा थो़र मेलु़मिवामकाङा ङेसिक्पा खोमडा हुमु मेल्वामिवा। |
© Wycliffe Bible Translators, Inc. All rights reserved.
Wycliffe Bible Translators, Inc.