हिब्रू 2 - थुलुङ राईछो़म डोक्पु सेल्सिसी 1 मेम्मिमका गुइ हाम थो़स्तिम बु मेरामडला गुइ छो़म न सोमु बासी। मेएँ माला ने गुइ लाम्दी प्ल्वासिमा कोर्थो़ लक्सी। 2 माके माके पाह्रीचो़मिमलामका इकी बेप-पापमिमलाई माम्चु़नीकु सीसि आच्छाङा र्वाक्साका रेम्बेम्मा बाइडा। मेम्मा मेराम सीसिकु कोर्थो़लाम बम्डिम मु़चु़मिम नुङ मेराम सीसि होम्साका मेबेमिवाम खोत्ले मेर्मिमका बेम्डिम खारी होम्साका देन्दे ल्वाम्डी। 3 मेम्साकाङा गुइ मेरामडाम वो आकोति छो़म डोक्पु सेल्सीकु सीसिथो़ न मेसोकिवा माला हेसाका मेराम डोक्पु देन्दे ल्वामुडाम वाङ दु़म्सी मा? ङाचो़ उनी त्वाकाङा ङादो ओराम सेल्सिसीकाम सीसिकु दुथाम र्वाम्डी। मेम्मा गुमीका र्वाम्डिम ल्वा थो़पामिमका ङा ओराम आच्छाङा र्वाक्साका रेम्बेम्डी। 4 माम्चु़नीका वो छेखोपमिम, हापा खालकाम हेल्लो वो मेल्वाम्मा खारीमिम नुङ यु़मनुङमा खारीमिम रेम्बेसाका, मा उनी नकाङा मेर्मिमलाई दो़म्साम्डिम माम्चु़नी-पेलकु राप्लावामिमलाम ओराम ल्वा आच्छाङा र्वाक्साका रेम्बेम्डी। गुइलाई सेल्मु लागि येशू मु़चु़ दु़म्मिडी 5 गुइ ङादो आथाम र्वाक्तो बिइडिम, रोक्पा सु़म्दिसेर माम्चु़नीका पाह्रीचो़मिमकु साखामगोडा जु़ल्मिडिम मिबु। 6 माम्चु़नीकु सिजेमगोडाम कोले खोमडा आरेसाका र्याक्मा बु, “मु़चु़ ने हाम मा, गानी मेरामकु दुथाम मिम्ताम सो़र्ताम बोनी? मु़चु़कु तारापाचो़ ने हाम मा, गानी मेरामलाई मिम्नी? 7 गानी गुलाई घरिकोङकाम लागि पाह्रीचो़मिमडाम याक्के दु़म्बेट्नी। गुलाई यु़म झ्वाक्सी नुङ डोक्पु मिम्सीकु मुकुट खुसिबेट्नी। 8 मेम्मा गानी खोत्लेम थोकडला साखाम थो़मु गुलाई ग्वाक्नी।” माम्चु़नीका मु़चु़कु साखामगोडा खोत्लेम थोक जु़ल्मिडिलो उमा साखामडाम वाङ दु़म्मु हाम वो मेग्वाक्मिवा। लावो आथामबिलि खोत्लेम थोक मु़चु़कु साखाम गोडा बुमिम ने मेल्वासी। 9 लावो गुइ येशूलाई ल्वासी, गुमी घरिकोङकाम लागि पाह्रीचो़मिमडाम याक्के दु़म्मिडी। मेम्मा माम्चु़नीकु दिदामका खोत्लेकाम लागि गुमीलाई सिप्डा थु़र्मिडी। येशूकाङा सिमु दु़खा इम्मिडिमका माम्चु़नीलामका यु़म झ्वाक्सी नुङ डोक्पु बेसीकु मुकुट ल्वाम्डी। 10 माम्चु़नीका खोत्लेम थोक बनेबेम्डी मा खोत्लेम थोक उनीमा यु़म झ्वाक्सीकाम लागि ङा बनेबेम्डी। गुमीका उनीमा यु़म झ्वाक्सी दो़मुकाम लागि हापा तारापाचो़ रेन्मु न बेम्डी। मेम्मिमका माम्चु़नीका उनीमा मुलु़ होम्साका खोत्लेलाई सेल्पा ङाचो़ ख्रीष्टलाई रेट्मिडी, उहेमका दु़खामिम इम्साका मु़चु़मिमलाई सेल्सिथो़ क्रियु़डिमी। 11 येशू, उहेमका मु़चु़मिमलाई सेपा दु़म्बेन्मी मा मे सेपा दु़म्पामिम खोत्ले कोले पापकु चो़मिमङा सो़। मेम्मिमका मेर्मिमलाई आमा वा-ल्वाक र्वामु येशूलाई उनी क्रो़म मेलु़। 12 गुमीका र्वामी, “गो वा-ल्वाकमिमलाई इनीमा नङ थो़बेट्पुमी मा खोत्ले थो़रलु़पामिमनुङ इनीमा नङ कोक्पा काम्सो बेउ।” 13 गुमीका आथावो र्वामी, “गो माम्चु़नीडाङा थो़र बेउ।” मेम्मा गुमीका आथावो र्वामी, “गो आसिन्डा माम्चु़नीका ग्वाङ्डिमिम जाउमो तारापाचो़मिमनुङ बुङु।” 14 माम्चु़नीकु जाउमो तारापाचो़मिमकाम आरेप्माम मिरो़म बु, मेराम मिरो़म सिमिमका येशू वो मेर्मिम होप्माम मु़चु़ दु़म्मिडी। मेम्साकाङा गुमी सिम्डी मा सिमुलाम रेट्पा शैतानडला घ्ल्वाम्डी, 15 मा साम बुमिमसम्म सिमुकु ङिमुगोयु़ बाट्पा मु़चु़मिमलाई येशूका सेल्मी। 16 गुमी पाह्रीचो़मिमलाई ख्लो़प्डा योम्डिम मेएँ, लावो गुमीका र्वामिमिम थो़पा अब्राहामकु चो़-चु़सु़मिमलाई ख्लो़प्डा योम्डिम सो़। 17 मेम्मिमका खोत्ले ल्वाडा गुमी उनी त्वाकु मु़चु़मिम होप्मामङा दु़म्मु बास्ता। मेम्मा मु़चु़मिमका बेम्डिम छु़लकु दुथाम पाचो बिमु लागि माम्चु़नीकु ङादोडा गुमी न-थो़मनुङमा नुङ थो़रलु़इमिम डोक्पु डु़म्लाचो़ दु़म्मिडी। 18 गुमी उनी त्वाकाङा हापा न छाम्सीमिमडा नुङ दु़खामिमडा दु़म्मिडिमका ओम्लो गुमीका न छाम्सीडा दु़म्पामिमलाई ख्लो़मु चाम्मी। |
© Wycliffe Bible Translators, Inc. All rights reserved.
Wycliffe Bible Translators, Inc.