हिब्रू 13 - थुलुङ राईहुम-दडाम सोहन्बेसी 1 गानी इनी त्वाप-त्वापगोडा वा-ल्वाक होप्माम दु़म्निमका रिखाम बेबेनिम बानी। 2 इनीमाडा रोक्पा वाङथो़म मु़चु़मिमकु चापे-डुपे बोमु मेप्ल्वानी, हेङालोने मेम बेसाकाङा याङ मु़चु़मिमका मेचक्साका पाह्रीचो़मिमकु चापे-डुपे बेम्डी। 3 गानी वो मे चसिक्पा मु़चु़मिमनुङङा चन्सिट्निम होङङा मिम्नी, मा मेजो़पा बेम्डिम मु़चु़मिमनुङङा इनी मिरो़मडा मेजो़पा बेला सो़न्सिट्निम होङङा मेर्मिमलाई मिम्नी। 4 खोत्लेका लालीकुन्दा डोक्पु मिम्मु बासी मा वोचु़ नुङ मोचु़ उची त्वाप-त्वापडा थो़रलु़इमिम दु़म्मु बासी। नाम्सु़रु़ बेपा नुङ वाङमिम मेसेमनुङ अम्मु न बेपा मु़चु़काम माम्चु़नीका निया बोमी। 5 गानी खाप्चीकु रारी बोमुडाम वाङ बानी। गानीनुङ हाम बु मेकोतिडाङा गो तिम्सिट्नी। हेङालोने माम्चु़नीका र्वाम्डिम बु, “गो गानीलाई हेल्लो वो मेडिनिनी, गो गानीलाई हेल्लो वो मेङेनिनी।” 6 मेम्मिमका गुइ मेङिसाका र्वामु चाप्सी, “ङाचो़का गोलाई ख्लो़ङिमी, गो हेल्लो वो मेङिङु। मु़चु़का गोलाई हाम बोमु चाम्ङी मा?” 7 गानीलाई माम्चु़नीकु सिजेम थो़बेट्पा मण्डलीडाम ङाउमिमलाई मिम्नी। मेर्मिमका हाम बेम्थाल्मिडी मा हेसाका सिम्डी मेराम इनीमा नगोडा जु़ल्नी। मेर्मिमका थो़र लु़म्डिम होम्साका गानी वो थो़रलु़नी। 8 येशू ख्रीष्ट बास्ता, आनेप मा हेल्लो लोवो कोलेङा दु़म्मी। 9 खाल-खालकाम हेल्लो वो मेथो़म्मा सीसिडा मेब्लो़म्सिट्नी। हेङालोने पोमु-डुमुकु दुथाममिम डु़म्लाका मेएँ, लावो माम्चु़नीकु दिदामका इनीमा न-गो बन्सिमिम जो़पा दु़म। मेप्माम डु़म्लाका सु़लाई वो जो़पा दु़स्ताम मिबु। 10 इकीमा कोले सासेन्खोप बु, मेसिन्डा ग्वाक्मा सासेसी सेपा खोमडा खारी बेपा डु़म्लाचो़मिमका पोमु मेल्वामी। 11 ङाउ डु़म्लाचो़मिमका छु़ल हेम्मु लागि डोक्पु सेपा खोमगोनो हादीबारामिमकु सिसि लमिमा हुमी, लावो मेर्मिमकु मिरो़म ने शहरडाम वो पाखाडा लक्साका चामी। 12 मेम्मिमका येशू ख्रीष्टका वो उनीमा त्वाकु सिसिका मु़चु़मिमलाई सेपा दु़म्बेन्मु लागि शहरडाम पाखाडा लम्डिमा सिम्डी। 13 गुइ वो शहरलाम पाखा गुमीकाडा लक्सी, मा गुमीका इम्मिडिम दु़खा होम्साकाङा गुइ वो दु़खा इम्डी। 14 हेङालोने ओराम सुबुडा इकीमा लागि हेल्लो लोवो दु़म्पाम बाट्पा शहर मिबु, लावो गुइ दिफु रोक्पा शहर लथाडिमिम बु। 15 मेम्मिमका गुइ हेल्लो लोवो येशू ख्रीष्टलाम माम्चु़नीकु सो़रलोले बेसाका ग्वा-ग्वा ग्वाकिमी। ओराम ने उनीमा नङ कोक्पा सिका ग्वाकु़मिम ग्वा-ग्वा सो़। 16 वाङमिमलाई जो़होम बोमु नुङ इनी त्वाकु चाप्सी ख्लो़मु मेप्ल्वानी। हेङालोने आरेप्माम ग्वा-ग्वाका माम्चु़नी गेर्सी द्वामी। 17 मण्डलीडाम ङाचो़मिमकु ल्वाडा बानी मा मेर्मिमका र्वामिमिम थो़नी। हेङालोने ङाचो़मिमका हेल्लो लोवो इनीमा त्वारो़म बोमी-थार्मी मा माम्चु़नीकु ङादोडा मेर्मिमका इनीमा खारीकु दुथाम सो़मी। मेर्मिमका ओराम खारी गेर्सी द्वाक्तो बोमिनु़, मेभ्रसिक्तो खारी बोमी माला ने मेरामलाम गानी हाम वो जो़पा ल्वा मेल्वानी। 18 आकीमा लागि सो़म्दी बेसाट्की। आकीमा मिम्सीडा गुकु जो़पा बुकु र्वाक्साका थो़रलु़त्तोकोम बु। हेङालोने हेल्लो लोवो गुकु जो़पा खारी बेपा न बोकु। 19 गो छो़म गानीनुङ र्वाङु, गो आथावो दालाङा इनीमाडा रोमु चापुनु़ र्वाक्साका सो़म्दी बेङ्साङनी। 20 भेन्दा रेपा-क्रिपा डोक्पु इकीमा ङाचो़ येशूलाई हेल्लो लोवो दु़म्पा लाले सो़रख्रेप्सीकु सिसिका सिमुलाम फक्साका न-भ्रसी बेट्पा माम्चु़नीका 21 उनीमा न होङङा बोमु खोत्ले जो़पा ल्वाका बोमु चापा दु़म्बेनिमिनु़। मेम्मा गुमीलाई गेर्सी बेट्पा खोत्ले ल्वा येशू ख्रीष्टलाम गुइगोडा बोमिनु़। येशू ख्रीष्टकु नङ हेल्लो लोवो कोसिनु़म बुनु़। आमेन। 22 वा-ल्वाकनी, सोहन्बेट्पा आमा सिजेमडा छो़म न सोक्नी र्वाङु, हेङालोने गानीलाई र्याक्तोम ल्वा हापा दु़पा मिबु। 23 ओराम सेला वो थो़नी। इकीमा ल्वाक तिमोथी झ्यालखानलामका लुमु दु़स्तु़म बु। गु दालाङा आमाडा रोक्ता माला गुनुङङा गो गानीलाई क्रो़म्डा रोङु। 24 मण्डलीडाम खोत्ले ङाचो़मिम नुङ माम्चु़नीकु खोत्ले मु़चु़मिमलाई आकीमा सेव र्वाक्साट्किनी। इटालियालाम रोक्पा वा-ल्वाकमिमका वो गानीलाई सेव र्वाम्सोम्डिम बु। 25 माम्चु़नीकु दिदाम गानी खोत्लेनुङ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.