हिब्रू 12 - थुलुङ राईउनीमा चो़मिमलाई माम्चु़नीकु सीसि-चेसी 1 उनी थो़र रेम्बेपा आरेप्माम सेर्पा मु़चु़ इकीमा होनोलाम-आथो़लाम बुमी। मेम्मिमका गुइलाई भोपा खोत्ले ल्वा नुङ हाम वो लु़मेलेसाकाङा आम्पा छु़ल पार्तो गुइलाई रेम्बेट्मा ओन्सीथो़ हाम वो मेर्वाक्साका इम्तो ओन्डी। 2 इकीमा थो़र चो़म्पा मा बेप्सोक्पा येशूडला इकीमा मिक्सी बिइ। गुमीका उनीमा ङादोडा जु़ल्मा न-भ्रसिसीकाम लागि क्रो़मलु़सीमिम हाम होङङा मेलु़साका क्रूसडलाम दु़खा इम्मिडी। मेम्मा साखाम थो़मिम बुमिमिम माम्चु़नीकु जो़पलाम गन्तासिट्मी। 3 मेजो़पा मु़चु़मिम आरेसाका उनी कोर्थो़लाम बम्डिलो इम्पा येशूलाई मिम्नी, मेम्साका गानी मेघ्रु़म्नी मा इनीमा न-गो मेसि। 4 छु़लकु कोर्थो़लाममिम इनी क्वाल्बा बेसीडा गानी छु़ल भोमु लागि सेन्लाङा सो़सिक्पा थारीडा रोन्थिट्ल्याट्निम ने मिबु। 5 मेम्मा माम्चु़नीका उनी चो़मिम होङङा गानीनुङ जेम्डिम सोहन्बेट्पा ओराम सिजेम प्ल्वान्निम? “ए आमा चो़, मिप्रङमाकु सीसि-चेसी सिसिवा मेलु़या, मा गुमीका ख्र्वानामिलो इ न-गो मेसेडा। 6 हेङालोने मिप्रङमाका उहेमलाई द्वामी, मेरामलाई सीमी-चेमी, मा गुमीका उनी चो़ होङङा रमिमिम मु़चु़लाई देन्दे ग्वामी।” 7 सीसि-चेसीकाम लागिङा गानी दु़खा इम्नी, माम्चु़नीका गानीलाई उनी चो़मिम होङङा बोनिमिम बु। हेङालोने उ पापलामका मेसीसिक्पा-मेचेसिक्पा उहेम चो़ बु मा? 8 खोत्लेका सीसिट्मिमिम सीसि-चेसी गानी सीन्सिट्नी-चेन्सिट्निम मिबु माला ने गानी आच्छाङाकाम चो़मिम मेएँ, नाम्दाचो़मिम होप्माम सो़। 9 मेम्मा आथावो, गुइ खोत्लेलाई सीपा-चेपा खोत्लेकाम सुबुडा पापमिम बाम्डी मा मेर्मिमलाई गुइ डोक्पु मिम्डिम बाइडा। हाम मेरामडाम वो हापा इकीमा पाह्रीलाम पापकु ल्वाड्डा बासाका गुइ त्वारो़म डार्मु मेचाप्सि मा? 10 इकीमा पापमिमका जो़पा लु़म्डिम होङङा गुइलाई कति दु़पा सीसाड्डामी-चेसाड्डामी। लावो माम्चु़नी पापका ने इकीमा लागि हेल्लो लोवो जो़पा दु़म्नु़ मा गुमी होप्मामङा सेपा दु़म्मु चाप्सिनु़ र्वाक्साका गुइलाई सीसामी-चेसामी। 11 सीसि-चेसीकु थारी भ्रपा मेदु़म, थो़मबोक पिपा दु़खा दु़म। लावो चङडा, ओरामलाम सीसिक्पा-चेसिक्पामिमलाई ओरामका न-गो भ्रसिबेडु़ मा जो़पा बेसी-दोसी बेबेडु़। 12 मेम्मिमका बुसिक्पा इनीमा ल्वा नुङ क्रचु़मिम सोनुङमा दु़म्बेट्नी। 13 खेल ब्लेट्पामिम समिनु़ मा मेतासाका लाम्दिमु चाम्मिनु़ र्वाक्साका गानी ङाचो़कु चङचङ लाम्दिमुडा जो़होमका लाम्दिनी। माम्चु़नी मेद्वाक्पा मामा दु़म्नी सो़ 14 हेसाका दु़म खोत्ले मु़चु़मिमनुङ दु़साका बुमु नुङ छु़लडाम वाङ बुमु छो़म माल्नी। छु़लडाम वाङ मेबाट्पा सु़का वो माम्चु़नी ल्वामु मेचाप्सु़। 15 कोलेका कोले रेम्बेनी, मेम्साका सु़ वो माम्चु़नीकु दिदाम ल्वामुडाम वाङ मेदु़म्नु़। न-गो खेम्ल्यामुकु सक्फार बर्साका दु़खा ग्वाक्पा होप्माम मेदु़म्नी, मेएँ माला ने ओरामका हापा मु़चु़मिमलाई मेसेपा दु़म्बेडु़मी। 16 सु़ वो वाङमिम मेसेमनुङ अम्पा लोवो माम्चु़नीलाई डोक्पु मेबेपा एसाव होप्माम मेदु़म्नु़, एसावका तोङदीचो़ दु़स्ताम उमा साखाम कोसि पोमुडा भ्रेड्डु़म बाइडा। 17 गानी चनी, मेराम जि-वा ल्वामु गुका न बु़डु़ लोवो मेल्वासु़वा। गुका उ प्ल आल्तो मेराम माल्लु़ लोवो गुका बु़ल्याड्डु़म ल्वा ख्लोमु थारी मेल्वासु़वा। 18 लु़म्मु झापा नुङ मु वाक्पा पोप्चङडा गानी रोक्निम मिबु। गानी तुकुम्चिम, केकेयाम खासे नुङ ब्लोजु़ बाट्पा खोमडा रोक्निम मिबु। 19 भुमकु लो़लाम बाट्पा नुङ कोले आरेप्माम लो़लाम जेपा खोमडा, उहेम लो़लाम ने कोङनिमका थो़म्डिमा आथा ने मेराम ल्वा थो़मेबेट्किनु़ र्वाम्डिम-र्वाम्डिमङा बेम्डिम मेराम खोमडा गानी रोक्निम मिबु। 20 हेङालोने “हादीबाराका वो मेराम पोप्चङ लु़प्डु़ माला मेरामलाई लुङका ओप्साका सेन्मु” र्वाक्साका माम्चु़नीका र्वाम्डिम ल्वा मेर्मिमका इम्मु मेचाप्मिवा। 21 मेसिन्डा मेर्मिमका उनी मिक्सीका हाम ल्वाम्डिम मेराम आकोति छो़म ङिमलु़पा बाइडा, मोशाका वो “आ ङिमुका रुङी” र्वाक्ताम बाइडा। 22 लावो गानी ने सियोन पोप्चङडा रोक्निम बु, हेल्लो लोवो बाट्पाम बाट्पा माम्चु़नीकु शहर, पाह्रीलाम यरूशलेमडा, मा ङार्मुङा मेझापा पाह्रीचो़मिम भ्रसिक्तो खोम्सिम्डिम मेराम खोमडा गानी रोक्निम बु। 23 पाह्रीला नङ र्याक्मा ङादो गक्पामिमकु घ्रो़म्दीडा गानी रोक्निम बु। खोत्ले मु़चु़कु निया बेपा माम्चु़नी नुङ माम्चु़नीकु न होप्माम जो़पा दु़म्पा मु़चु़मिमकु घ्रो़म्दीडा रोक्निम बु। 24 लाले सो़रख्रेप्साक्पा येशूकाडा, मा हाबिलकु सिसिडाम वो जो़पा ल्वा जेपा रक्मा सिसिकु ङादोडा गानी रोक्निम बु। 25 गानीनुङ जेपा माम्चु़नीलाई मेद्वाक्पा मामा दु़म्नी सो़। सुबुडा इस्राएलीमिमलाई मामासो़ र्वाक्पा मोशालाई मेर्मिमका मेद्वाक्मिवालो माम्चु़नीकु देन्देडाम मेर्मिम स्वामु मेचाप्मिवा। गुइलाई पाह्रीलाम मामासो़ र्वाक्पा गुमीडाम कोर्थो़ हिसिडी माला हेसाका स्वामु चाप्सी मा? 26 मेराम थारीका उनीमा लो़लामका सुबु रुड्डु़, लावो आथा ने गुमीका “आथावो कोखेप सुबु कोङङा मेएँ पाह्री वो रुबेट्पु” र्वाक्साका याचे जेम्डिम बु। 27 “आथावो कोखेप” र्वाक्पा सिजेमका प्रङ्सिक्पा खोत्ले ल्वा रुमी मा दाम्मी, मेरुसिक्पा ल्वामिम कोङङा हेवो मेदु़म्मी र्वाक्पा ल्वा रेम्बु़। 28 मेम्मिमका मेरुसिक्पा किब्दी गुइ डार्स्तिमका आला-तोमानुङमा दु़प्सी मा माम्चु़नीकु ङिम जु़ल्तो नुङ गुमीलाई डोक्पु मिम्तो गुमीलाई गेर्सिबेट्पा सो़रलोले बिइ, 29 हेङालोने इकीमा “माम्चु़नी ने छो़रो़प बेपा मु होप्माम सो़।” |
© Wycliffe Bible Translators, Inc. All rights reserved.
Wycliffe Bible Translators, Inc.