हिब्रू 11 - थुलुङ राईथो़र 1 थो़र ने हाम-हुम ल्वापा न बिइमिम आच्छाङा दु़म र्वाक्पा नुङ मिक्सीका मेल्वासिमिम ल्वा दु़मङा र्वाक्पा सो़। 2 माके इकीमा बेप-पापमिमकु उनी थो़रकाङा माम्चु़नीका मेर्मिमलाई द्वाम्डी। 3 माम्चु़नीका जेम्डिमका खोत्ले सु़म्दिसेर प्रङ्सिड्डा, मेम्साका मिक्सीका ल्वासिक्पा हाम बु मेराम मिक्सीका मेल्वासीमिमलामका प्रङ्सिड्डाम बु र्वाक्साका गुइ थो़रलामकाङा थेसिथेडी। 4 थो़रकाङा हाबिलका माम्चु़नीलाई कयिनका ग्वाक्तु़मडाम जो़पा सासेसी ग्वाक्तु़। हाबिलकु ग्वा-ग्वाका माम्चु़नी गेर्सिद्वाम्डिलो थो़रकाङा हाबिल गुमीका द्वाम्डिम मु़चु़ र्वाम्डी। मेम्मा गु सिल्याड्डा लोवो थो़रकाङा गुका आथावो सीडु़मी। 5 थो़रकाङा हनोकका सिमुलाम लु़मेलेसाका माम्चु़नीकाला लसिड्डा, मा सु़का वो गुलाई मेडार्मिवा, हेङालोने माम्चु़नीका गुलाई लम्डिम बाइडा। गु लसिमु ङादो माम्चु़नीलाई गेर्सी बेट्पा गु कोले बाइडा र्वाक्साका माम्चु़नीकु सिजेम र्वा। 6 थो़र मान्थि माम्चु़नीलाई गर्सी बेन्मु मेझाम। हेङालोने सु़ माम्चु़नीकाडा रो मेरामका माम्चु़नी बुमी र्वाक्पा मा उहेमका गुमीलाई मालु़म बु गुमीका मेरामलाई पुरस्कार ग्वामी र्वाक्पा थो़र लु़मु बासी। 7 थो़रकाङा नोआका उमा नेमडाममिमलाई होङकोर्माडाम सेल्मु कोले डोक्पु कुबी-बोक्सा बनेबु़डु़। मेरामडाम ङादो हेल्लो वो मेदु़म्थेङा बाट्पा ल्वाकु दुथाम गुलाई चङचङया बाबेट्पा माम्चु़नीका र्वाम्डिम होङङा गुका बु़डु़। थो़रकाङा गुका सु़म्दिसेरलाई मुमा बेड्डु़ मा थो़रकाङा गुलाई माम्चु़नीका जो़पा र्वाम्डी। 8 थो़रकाङा अब्राहामका दिफु गुका ल्वापा बायथो़ लमु माम्चु़नीका येट्मिडिलो बिसिड्डा। मेम्मा गु बान्थो़ लक्तोङा बु़डु़म मेराम मेचकु़वा लोवो गु लस्ता। 9 थो़रकाङा माम्चु़नीका गुलाई ग्वानी र्वाक्साका याचे जेम्डिम बायडा वाङमी नेब्दीलाम रोक्पा मु़चु़ होप्माम दु़म्साका गु पाल गोडा बाइडा। मेम्साकाङा माम्चु़नीका इसहाक नुङ इसहाककु तारापाचो़ याकूबनुङ वो याचे जेम्डिम बाइडा मा मेर्चिप वो मेम्साकाङा पालगोडा बाच्ची। 10 हेङालोने अब्राहामका ने माम्चु़नी उनी त्वाकु नड्डा मिम्साका बनेबोमिमिम हेल्लो लोवो दु़म्पाम बाट्पा फारनुङमा शहर गुका लथाड्डु़म बाइडा। 11 अब्राहामकु नाइमे सारा चो़ मेकक्पा नुङ छो़म ङामी बाइडा लोवो उमा थो़रकाङा माम्चु़नीका गुलाई गोजु़मे दु़म्मु चापा दु़म्बेट्मिडी। हेङालोने ग्वानी र्वाक्पा माम्चु़नी थो़रलु़इमिम बुमी र्वाक्साका गुका थो़र बु़डु़म बाइडा। 12 मेम्मिमका सिमुखापा ओराम अब्राहामलामका धामुलाम सोरलुङ कोतिम हापा सेर्पा नुङ दिरिदिनकु फार्डाम ङार्मु मेझापा सेक्रे कोतिम चो़-चु़सु़मिम दु़म्मिडी। 13 ओर्मिम खोत्ले मु़चु़मिमका सिमु थारीसम्म थो़रङा लु़म्डिम बाम्डी। मेर्मिमलाई माम्चु़नीका हाम ग्वानिनी बेम्डिम मेराम मेडार्मिवा लोवो होनोवाम मेर्मिमका मेराम ल्वाम्डी मा छो़म गेर्सिम्डी। मेम्मा मेर्मिमका उनी त्वाप सुबुडा वाङथो़लाम रोक्पा मु़चु़ नुङ लाम्दिप्बाल्पा मु़चु़ र्वाक्साका र्वाम्डी। 14 मु़चु़मिमका उनी त्वाकाम कोले नेब्दी माल्मिमिम बुमी र्वाक्पा आरे र्वामिमिमका रेम्बु़। 15 मेर्मिमका डिट्मिडिम नेब्दी मेमिम्मिवा। मेराम नेब्दीङा मिम्मिवाम माला मेनोथो़ ख्लोम्सिक्पा थारी वो ल्वामिवा। 16 मेम मेबेसाका, मेर्मिमका मेरामडाम वो जो़पा पाह्रीला बाट्पा नेब्दी लक्पा न बेम्डिम बाम्डी। मेम्मिमका माम्चु़नीका गुमी मेर्मिमकु माम्चु़नी र्वाला सो़म्सिमु उनी क्रो़म मेलु़, लावो गुमीका मेर्मिमकाम लागि कोङ शहर बनेबेम्डिम बु। 17 थो़रकाङा माम्चु़नीका अब्राहामकु न छाम्मिडिलो उमा चो़ इसहाक सेन्मुमा माम्चु़नीलाई ग्वामु झो़म्सिड्डा। अब्राहामनुङ माम्चु़नीका याचे जेम्डिम बाइडा, मेम मा वो गुका कोलेङा बाट्पा उ चो़ सेन्मु झो़म्सिड्डा। 18 माम्चु़नीका गुलाई आरे बेम्डिम बाइडा, “इसहाकलाममिमङा इमा चो़-चु़सु़मिम ङार्सिप्मी।” 19 माम्चु़नीका इसहाकलाई सिमुलामका फमु चाम्मी र्वाक्पा अब्राहामका मिम्स्ताम बाइडा। मेम्मा आच्छाङा र्वाक्पा माला गुका इसहाक सिमुलामका ख्लोसिक्पा डार्स्तु़म होप्माम ङा सो़। 20 थो़रकाङा इसहाकका याकूब नुङ एसावलाई दिफु दु़म्पा मेर्चिपकाम ल्वाकु दुथाम जि-वा ग्वाक्तु़ची। 21 थो़रकाङा याकूबका सिमु खाप्स्तु़लो योसेफकु खोत्ले तारापाचो़मिमलाई जि-वा ग्वाक्तु़मी मा उ डु़लु़म्चो़कु जु़जु़डला थेर्सिड्डामा सो़रलोले बु़डु़। 22 थो़रकाङा योसेफका उ सिमुथारी रोक्फाड्डाम बिलि मे मिश्र नेब्दीलाम इस्राएलीमिम लुमिमा लमिमिमकु दुथाम र्वाक्ता मा उमा सिपा मिरो़मकु दुथाम मेर्मिमनुङ र्वाक्जो़ल्ला। 23 थो़रकाङा मोशाकु मामपापका गु गस्तामा सु मुनामसम्म गुलाई थक्थाट्ची, मा गु द्वाकिमिम चो़च्चो़ बाइडाम ल्वाच्चिमा हपका र्वाक्ताम होङङा मेबोमु मेङिचिवा। 24 थो़रकाङा मोशाका गु डोक्पु दु़स्तामा फारो हपकु जाउमोचो़कु तारापाचो़ र्वाला सो़म्सिमु मेबिसावा। 25 घरिकोङकाम छु़लकु एलेङगी बोमुडाम ने माम्चु़नीकु मु़चु़मिमनुङ मेजो़पा बेला सो़म्सिमुङा गुका छेड्डु़। 26 मिश्र नेब्दीडाम खाप्चीमिम ल्वामुडाम वो ख्रीष्टकाम लागि हाम ना हामकाम मिम्ला सो़म्सिमुङा गुका डोक्पु लु़डा। हेङालोने गुका उ पुरस्कारथो़ रेप्थाड्डु़म बाइडा। 27 थो़रकाङा गुका हपकु छोक्चोडाम मेङिसाका मिश्र नेब्दी डिड्डु़। गुका हाम वो मेर्वाक्साका इम्तो बाइडा, हेङालोने मिक्सीका ल्वामु मेझापा माम्चु़नीलाई गुका ल्वास्तु़म होप्माम बाइडा। 28 ङादो गक्पालाई सेट्पाका इस्राएलीमिमकु ङादो गक्पालाई मेलु़प्नु़ र्वाक्साका थो़रकाङा गुका सेल्सिमुनेमकु चाड मानेबु़डु़ मा सिसि रक्तु़। 29 थो़रकाङा साट्पा बायडलाम लाम्दिइमिम होङङा इस्राएलीमिम लालाम दिरिदिनभाल लम्डी। लावो मिश्रीमिमका मेमका लमु माल्मिडिलो मेर्मिम प्लु़म्सिम्डी। 30 थो़रकाङा यरीहो ब्रोलुङ येत्लेमसम्म मु़चु़मिम खिर्सिम्डी मा मे ब्रोलुङ झार्स्ता। 31 थो़रकाङा छो़लो़मा राहाबका चो़पाचो़चिपलाई जो़होमका रङडु़चिमका माम्चु़नीका र्वाम्डिम मेथो़पामिमनुङ गु मेसेन्सावा। 32 ओरामडाम हापा ल्वा गो हाम सो़मु? गिदोन, बाराक, शिमशोन, यिप्ता, दाऊद, शमूएल नुङ माम्चु़नीलाम जेपामिमकु दुथाम सो़मु गोनुङ थारी मिबु। 33 थो़रकाङा ओर्मिमका किब्दीमिम घ्ल्वाम्डी, हाम जो़पा मेराम बेम्डी, माम्चु़नीका मेर्मिमलाई ग्वानिनी र्वाम्डिम ल्वाम्डी, धेन्द्रामिमकु सि ड्याम्डी। 34 मुकु भुल्मुमिम सेट्मिडी, कातु़रु़कु फल्खोपडाम स्वाम्डी, मेचापालाम सोनुङमा दु़म्मिडी, क्वाल्बाडा यु़मचो़ दु़म्मिडी मा वाङमिम नेब्दीलाममिम सिपाहीमिमलाई खान्सोम्डी। 35 थो़रकाङा मेसेममिमका सिपा उनी मु़चु़मिम सिमुलाम बग्गेट्मिडिम डार्मिडी। वाङमिमका ने सिमुलाम बग्गेसाका मेरामडाम जो़पा त्वारो़म ल्वामु लागि थो़म्बोक बिपा दु़खा इम्मिडी मा वाङ दु़म्मु मेबिम्सिप्मिवा। 36 याङ सेम्ला बेन्ला सो़म्सिम्डी, मा कोक्तेकु याल्खोपका याल्ला सो़म्सिम्डी, मा याङ ने बन्ला सो़म्सिम्डी, चला सो़म्सिम्डी। 37 वाङमिमलाई मु़चु़मिमका लुङका ओप्मिडी, याङलाई आराका चेर्मिडी, याङलाई कातु़रु़का सेट्मिडी। याङका ने भेन्दाकु कोक्ते नुङ छ्वाराकु कोक्तेमिम फसिक्साका हाम वो मेबासाका लाम्दिम्बाल्मिडी। मेर्मिमलाई मु़चु़मिमका उनी थो़मतेर्साम्डी मा मेजो़पा बेम्डी। 38 सु़म्दिसेरका मेर्मिम घ्रेट्पा मेबामिवा। र्याङगो-र्याङगोमिम बाडे, पोप्चङमिम बाडे, बुडखुममिम बाडे नुङ बायडाम रोङगामिम बाडे मेर्मिम लाम्दिम्बाल्मिडी। 39 ओर्मिम खोत्ले मु़चु़मिमका थो़रलामका ओर्मिम थो़र बेपा मु़चु़मिम र्वाक्साका उनी नङ जु़ल्मिडी, मा वो माम्चु़नीका हाम ग्वानिनी र्वाम्डिम मेराम ओर्मिम सु़का वो मेडार्मिवा। 40 गुइनुङङा कोङङा मेर्मिमका वो ल्वामिनु़ र्वाक्साका माम्चु़नीका मेरामडाम वो जो़पा ल्वा इकीमा लागि झो़म्सिबेट्मिडिम बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.