हिब्रू 10 - थुलुङ राईहेल्लो लोवो छु़ल हेप्सीकाम लागि ख्रीष्ट कोखेपङा सासेन्सिम्डी 1 मोशाकु डु़म्ला ने रोमु खापा जो़पा ल्वामिमकु दुथाम रेम्बेट्पा कोङङा सो़, मेर्मिम आच्छाङा मेएँ। मेम्मिमका थ-थका बोमुम बुमु बासिक्पा सासेसीका माम्चु़नीकाडा रोक्पा मु़चु़मिमलाई हेल्लो वो सेपा बोमु मेझाम। 2 डु़म्लाका सेपा बु़मिवा माला ने, मेर्मिमका सासेन्मुम बुमु डिट्मिवा। हेङालोने सो़रलोले बेपा मु़चु़मिम हेल्लो लोवोकाम लागि सेपा दु़म्मिवा माला आथावो मेर्मिम हेल्लो वो छु़लकु दुथाम मुमा बेन्ला मेसो़सिम्वा। 3 लावो मेर्मिमकु सासेसीमिम ने थ-थका छु़लमिम मिम्बेट्पा सो़, 4 हेङालोने बेनो नुङ छ्वारामिमकु सिसिका छु़ल हेम्मु मेझाम। 5 मेम्मिमका ख्रीष्ट सु़म्दिसेरडा योम्डिलो माम्चु़नीलाई आरे र्वाम्डिम बाइडा, “ग्वा-ग्वा नुङ सासेसी गानी न मेबेनिवा, लावो आमा लागि गानी कोले मिरो़म बनेबेन्निम बु। 6 मुड्डा चासाका ग्वाक्पा सासेसी नुङ छु़लकाम लागि ग्वाक्पा सासेसीका गानी मेगेर्सिट्निवा। 7 मेम्मा गो र्वाङडो, ‘रेप्नी, माम्चु़नी, दिल्मा सिजेमडा आमा दुथाम र्याक्मा होम्साका इनीमा न होङङा बेप्डा रोङडोम बु’।” 8 ङादो ख्रीष्टका र्वाम्डी, “सासेसी नुङ ग्वा-ग्वा, मुड्डा चासाका ग्वाक्पा ग्वा-ग्वा नुङ छु़लकाम लागि ग्वाक्पा ग्वा-ग्वाडा गानी न मेबेनिवा, ना मेर्मिमडा गानी गेर्सिट्नी।” (डु़म्ला होम्साका ओराम सासेन्सी बोनी लोवो गुमीका आरे र्वाम्डी।) 9 मेकोतिमा गुमीका र्वाम्डी, “रेप्नी, इनीमा न होङङा बेप्डा गो रोङडोम बु।” कोनोम सासेन्सीमिम पार्मु लागि गुमीका ननोम गन्मी। 10 मेराम नका येशू ख्रीष्टकु मिरो़मकु सासेसीलामका आथा ने बोमु मेबासिक्पा बेसाका छु़ललाम गुइ सेपा दु़स्तिम बुइ। 11 खोत्ले डु़म्लाचो़मिम येम्सिमी मा लाले-पाङके बोमी, कुदु़मार कोखालकामङा सासेन्मी, मेरामका छु़ल हेल्लो वो मेहेप्डु़। 12 लावो इकीमा ख्रीष्टका ने हेल्लो लोवो छु़ल हेप्सी दु़म्नु़म बुनु़ र्वाक्साका कोले सासेसी होङङा उनी त्वापलाईङा माम्चु़नीकाडा ग्वाम्डी, मा माम्चु़नीकु जो़पलाम गन्मिडी। 13 उनीमा स्वाक्चिमोमिमलाई उनी फेमखेलगोयु़ मेदु़म्थु़मसम्म गुमीका लम्थाट्मी, 14 हेङालोने छु़ललाम सेपा दु़म्पा मु़चु़मिमलाई कोले सासेसीका हेल्लो लोवो मेख्लो़ट्पा दु़म्बेट्मिडिम बु। 15 माम्चु़नी-पेलका वो ओरामकु दुथाम सो़मी। ङादो गुमीका आरे र्वामी, 16 “मेराम चङडा गो मेर्मिमनुङ ख्रेपुमिम सो़रख्रेप्सी ओराम सो़, मिप्रङमाका र्वामी: आमा डु़म्ला मेर्मिमकु न-गोडा जु़ल्साक्पुमी मा गो मेर्मिमकु नगोडा र्याक्साक्पुमी।” 17 गुमीका आथावो र्वामी, “मेर्मिमका बेम्डिम छु़लमिम नुङ मेजो़पा खारीमिम आथा ने गो मेमिम्पु।” 18 ओराम छु़लमिम हेम्सिमु दु़स्तु़मका छु़ल हेम्मु लागि हाम वो सासेन्मु मेबासी। 19 मेम्मिमका वा-ल्वाकनी, येशूकु सिसिलाम खोत्लेडाम सेपा खोमगोनो गुइ मेङिसाका हुमु चाप्सी। 20 रिपा-ये होल्साका डोक्पु सेपा खोमगोनो हुपा कोले लाले नुङ त्वारो़म ग्वाक्पा लाम्दी रेम्बेम्डिम बु, मेराम रिपा-ये ने ख्रीष्टकु मिरो़म सो़। 21 माम्चु़नीकु नेमगोडा साखाम थो़पा इकीमा कोले डोक्पु डु़म्लाचो़ बुमिमिमका, 22 ख्रीष्टकु सिसि रक्साका ख्लो़ट्मा इकीमा न-गो छेको-छेको दु़म्बेसाका, मा जो़पा कुका इकीमा मिरो़म सो़ल्मिडिम दु़म्साका, आच्छाङाकाम थो़रलु़सी नुङ आच्छाङाकाम न-गोनुङ माम्चु़नीकु फार्डा लक्सी। 23 गुइ र्वाक्तिम हाम-हुम ल्वापा न रिकि-रिकि जेथाडी, हेङालोने याचे जेपा गुमी थो़रलु़इमिम बुमी। 24 मेम्मा रिखाम नुङ जो़पा खारी बोमुथो़ गुइ हेसाका सो हन्बेबेपा मिम्डी। 25 कोङनिमका थो़रलु़पामिमकाम घ्रो़म्दीडा मेलक्पा बादु़खाम दु़म्मिम होङङा घ्रो़म्दीडा लमु मेडिडी। लावो ङाचो़ येशू योमु खाप्मिमिम गानी खोत्लेका ल्वानिमिमका कोलेका कोङमीलाई आथावो छो़म सो हन्बेबिइ। 26 गुइ आच्छाङाकाम ल्वा थेडिमिम चङडा वो चक्सा-चक्सा छु़ल बिइहोम बुइ माला ने छु़ल हेम्मु लागि सासेसी हाम वो मेदु़म, 27 लावो ङिमलु़पा निया लम्थामु नुङ माम्चु़नीकु स्वाक्चिमो छो़रो़प बेपा डोक्पु मु कोङङा दु़म। 28 मोशाकु डु़म्ला मेद्वाक्पा मु़चु़कु दुथाम नले-सुलेका सो़म्डिम बु माला मेरामका न-थो़म मेल्वासाका सिमु बासी। 29 मेम माला ने माम्चु़नीकु तारापाचो़लाई खेल गोयु़ देम्पा, गुलाई सेपा दु़म्बेड्डु़म सो़रख्रेप्सीकु सिसि मेसेपा दु़म्बेट्पा, मा दिदाम रेम्बेपा माम्चु़नी-पेललाई डक्पा मु़चु़ हाङको हापा इम्मु मेझापा देन्दे ल्वामुका घ्रेट्पा दु़म र्वाक्पा गानी लु़नी? 30 हेङालोने “गो फुलु़ सोक्पु, हाम बेम्डिम बु मेमङा बेउमी” र्वाक्पा गुमीलाई गुइ छेडी। मेम्मा गुमीका आरे वो र्वामी, “मिप्रङमाका उनीमा मु़चु़मिमकु निया बोमी।” 31 हेल्लो लोवो दु़म्पाम बाट्पा माम्चु़नीलाम देन्दे ल्वामु ने ङिमलु़पा ल्वा सो़। 32 आच्छाङाकाम सिजेमलामका गानीडा ओल दो़स्ताम मे ङादोम नेममिम मिम्नी, मेकोतिलो गानी हापा दु़खा ल्वान्नी लोवो थो़रलु़न्निमङा बान्नी। 33 याङलो गानीलाई मु़चु़मिमका खोत्लेकु ङादोडा इनीमा क्रो़म लु़बेट्मिडी मा थो़मतेर्साट्निमी। मेमकाङा थो़मतेर्ला सो़सिक्पामिमनुङ कोयो बान्नी। 34 चसिक्पामिमडला इनीमा थो़म भ्रो़स्ताम बाइडा मा इनीमा खाप्ची रोट्निमिलो गेर्सिद्वाक्तो बिन्सिट्निम बाइडा। हेङालोने इनी त्वाकाडाङा खोत्लेडाम जो़पा नुङ हेल्लो वो मेहुक्पा खाप्चीमिम बु र्वाक्पा चक्निम बाइडा। 35 मेम्मिमका इनी रुखु फिन्मु मेडिट्नी, ओरामका हापा पुरस्कार ल्वाबेनी। 36 गानी हाम वो मेर्वाक्साका इम्मु बासी, मेम्साका माम्चु़नीकु न होङङा गानी बोनी मा गुमीका हाम ग्वानिनी र्वाक्साका याचे जेम्डिम बाइडा मेराम ल्वा ल्वानी। 37 हेङालोने, घरिकोङका, “योमु खाप्मिमिम गुमी योमी मा मेछु़मी। 38 लावो आमा मिक्सीलामडा जो़पा दु़म्पा मु़चु़ ने थो़र बु़डु़मका मेसि, मा चङथो़ स्वा माला ने गो मेरामडाम मेगेर्सिङु।” 39 गुइ ने चङथो़ स्वापा मा सिपामिम मेएँ, लावो थो़र लु़पा मा सेल्सिक्पामिम सो़। |
© Wycliffe Bible Translators, Inc. All rights reserved.
Wycliffe Bible Translators, Inc.