हिब्रू 1 - थुलुङ राईमाम्चु़नी गुइनुङ उनीमा तारापाचो़लामका जेमी 1 माके-माके माम्चु़नी इकी बेप-पापमिमनुङ हापा खेप हापा खालका माम्चु़नीलाम-जेपामिमलामका जेम्डी। 2 लावो ओराम हुक्पा थारीका माम्चु़नी गुइनुङ उनीमा तारापाचो़लामका जेम्डिम बु। माम्चु़नीका उनीमा तारापाचो़लाई ओराम सु़म्दिसेरडा बाट्पा खोत्ले रपा दु़म्बेट्मिडी बु, मा उनीमा तारापाचो़लामकाङा ओराम सु़म्दिसेर वो प्रङमिडी। 3 माम्चु़नीकु यु़म झ्वाक्सी उनीमा तारापाचो़का रेम्बोमी मा गुमीलामका ङा माम्चु़नीका उनीमा त्वाकु आच्छाङाकाम ङाली रेम्बोमी सो़। उनीमा यु़मनुङमा सिजेमका खोत्ले सु़म्दिसेर जेन्थाट्मिमिम बु। मेम्मा गुमीका मु़चु़मिमलाई उनी छु़लमिमडाम छेको-छेको बेम्डी मा येप्पा पाह्रीला माम्चु़नीकु जो़पलाम गुमी गन्मिडी। ख्रीष्ट पाह्रीचो़मिमडाम डोक्पु 4 माम्चु़नीका उनी तारापाचो़लाई पाह्रीचो़मिमडाम डोक्पु बनेबेम्डी, मा उनी तारापाचो़लाई बाम नङलामका येट्मिडी मेराम ने पाह्रीचो़मिमलाई येट्मिडिम नङडाम छो़म डोक्पु बाइडा। 5 माम्चु़नीका उनीमा कोङनिम पाह्रीचो़मिमलाई हेल्लो वो आरे मेर्वाक्मिवा, “गाना आमा तारापाचो़, आनेप आथाम गो इमा पाप दु़म्ङोडोम बु।” 6 लावो खोत्लेडाम ङादो गक्पा उनीमा तारापाचो़लाई सु़म्दिसेरडा थु़र्मिडिलो गुमीका र्वाम्डी, “माम्चु़नीकु खोत्ले पाह्रीचो़मिमका गुमीलाई ङा सेव सान्मिनु़।” 7 पाह्रीचो़मिमकु दुथाम गुमीका आरे र्वामी, “गो आमा पाह्रीचो़मिमलाई ब्लोजु़ दु़म्बेट्पुमी, मा आमा डु़ल्चो़मिमलाई मुकु भुल्मु दु़म्बेट्पुमी।” 8 लावो तारापाचो़कु दुथाम आरेसाका र्याक्मा बु, “ए माम्चु़नी, गानी हेल्लो लोवो साखाम थो़नी, मा गानी साखाम थो़निलो जो़होमका निया बोनी। 9 गानी मु़चु़मिमका जो़पा खारी बोमु द्वानी मा मेजो़पा खारी बोमु मेद्वानी। मेम्मिमका माम्चु़नी, इनी माम्चु़नीका गानीलाई इनी ङोप्सो़मिमडाम हापा डोक्पु मिम्साका गेर्सिबेट्नी।” 10 माम्चु़नीका उनीमा तारापाचो़लाई आथावो र्वामी, “माम्चु़नी, सु़म्दिमोलो गानीङा ओराम सु़म्दिसेर प्रङनी मा गानी त्वाकु ल्वाकाङा धामु बनेबेन्नी। 11 मेर्मिम खोत्ले दाम्मिमा लमी लावो गानी ने हेल्लो लोवो दु़म्निम बुनी। मेर्मिम ने ये-सेम होम्साका भ्रो़मिमा लमी। 12 मेर्मिमलाई गानी भ्रो़ट्पा ये-सेम होम्साका दिल्निमा घ्रोनी। लावो गानी ने हेल्लो लोवो को दु़म्निम बुनी।” 13 मेम्मा माम्चु़नीका पाह्रीचो़मिमगोडाम सु़लाई वो ओराम ल्वा हेल्लो वो मेर्वाक्मिवा, “इमा स्वाक्चिमोमिमलाई इमा फेमखेलगोयु़ मेबेथु़मसम्म गाना आमा जो़पलाम गन्डा।” 14 लावो पाह्रीचो़मिम ने सु़? मेर्मिम ने माम्चु़नीका सेल्मिडिम मु़चु़मिमलाई ख्लो़प्डा थु़र्मिडिम पेलमिम सो़। |
© Wycliffe Bible Translators, Inc. All rights reserved.
Wycliffe Bible Translators, Inc.