गलाती 6 - थुलुङ राईइनी त्वाप-त्वापडा ख्लो़बेबेनी 1 वा-ल्वाकनी, गानीगोडाम कोङनिम मु़चु़ माम्चु़नीकु लाम्दीडा मेलाम्दियावाम डार्नी माला गानी माम्चु़नी-पेललाम नु़पा दु़म्पामिमका याक्के दु़म्साका मेरामलाई उनीमा लाम्दीथो़ ख्लोक्नी। इनी त्वाप चङचङया बानी वो, मेएँ माला ने गानी वो इनी न छाम्ला सो़सिसाका मेजो़पा खारी बोनी। 2 कोलेका कोङमीकु दु़खाडा ख्लो़बेबेनी। आरे बेन्नी माला येशू ख्रीष्टकु डु़म्ला होम्साका दोनिमिम दु़म। 3 कोङनिम मु़चु़का उ त्वाप डोक्पु मेएँ लोवो उ त्वापलाई डोक्पु मिम्डु़ माला गुका उ त्वाका त्वापलाई ङा लु-फेले बु़मिम दु़म। 4 खोत्लेका त्वा त्वाहोम बासीदोसीलाई त्वाकाङा रेप्नी। मेम्मा जो़पा दु़स्ता माला इनीमा त्वाकु खारीडा गेर्सी द्वाक्नी। लावो वाङमिमडाम जो़पा बेउ र्वाक्साका ने इनी नो़ डोक्पु मेबेनी। 5 हेङालोने खोत्लेका त्वाकु खारी त्वा-त्वाहोम बेसाका रेम्बेन्मु बासी। 6 माम्चु़नीकाम सिजेमकु सीसि रपामिमका उनीमा सीपा मु़चु़मिमनुङ खोत्ले जो़पा थोकमिम दो़मु बासी। 7 इनी त्वाकाङा त्वापनुङ लु-फेले मेबेनी, माम्चु़नीनुङ लिमा थेन्मु मेचाप्सी। हेङालोने मु़चु़का ये-दडा हाम ख्लियु़ मेरामङा हकु़। 8 उहेम मु़चु़का छु़ल बेपा उमा त्वाकु बादु़खाम होम्साका मेजो़पा खारी बु़, गु मेराम बादु़खामका ङा पुयु़ ल। लावो उहेमका माम्चु़नी-पेललाममिम जो़पा खारी बु़, गुका माम्चु़नी-पेललाम ङा हेल्लो वो मेसिपा त्वारो़म ल्वासु़। 9 जो़पा खारी बोमुडा हेल्लो वो मेघ्रु़म्सी। हेङालोने गुइ जो़पा खारी बिइहोम बुइ माला रोक्पा थारीका माम्चु़नीका जि ग्वाक्सामी। 10 मेम्मिमका जो़पा खारी बोमु ल्वासी मेडे गुइ खोत्लेकाम लागि जो़पा बेत्तो लक्सी, खोत्लेडाम ङादो येशू ख्रीष्टडा थो़रलु़पा वा-ल्वाकमिमलाई जो़पा बिइ। पावलकु चक्थो़म लु़म्ला नुङ सेव 11 रेप्नी, डोक्पुतो अक्षरका गो गानीलाई आमा त्वाकु ल्वाकाङा ओराम ल्वा र्याक्तोङा लेट्पु। 12 पाखानो जो़पा लिसिमु द्वाक्पामिमकाङा कोक्ते खिरिरि क्रिप्सी बोमु बासी र्वाक्साका गानीलाई छो़म र्वामी, हेङालोने येशू ख्रीष्ट क्रूसडा सासेन्सिम्डिम ल्वाका कोङङा सेल्सिमु झाम र्वाक्पा सीसि सीमिलो उनी त्वापडला दु़खा मेरोनु़ र्वाक्साका मेर्मिमका मेम र्वामी। 13 कोक्ते खिरिरि क्रिपामिम उनी त्वाप वो मोशाकु डु़म्ला होम्साका मेदोमी। लावो मेर्मिमका इनीमा मिरो़मकु दुथाम डोक्पु लिसिमु लागि गानीलाई कोक्ते खिरिरि क्रिम्बेनिमी। 14 लावो गो ने वाङमिम ल्वाडा मेएँ, येशू ख्रीष्टकु क्रूसडा कोङङा आमा नो़ डोक्पु बेउ। उनीमा क्रूसलामङा आमा लागि सु़म्दिसेर सिडाम बु, मा सु़म्दिसेरकाम लागि गो सिङ्डोम बु। 15 कोक्ते खिरिरि क्रिप्डी लोवो मेक्रिप्डी लोवो मेराम डोक्पु ल्वा मेएँ, लावो मु़चु़मिमका माम्चु़नीलाममिम लाले त्वारो़म रमुङा खोत्लेडाम डोक्पु ल्वा सो़। 16 ओराम ल्वा होम्साका दोपा मा माम्चु़नीकु खोत्ले मु़चु़मिमका न-भ्रसी नुङ न-थो़म ल्वामिनु़। 17 आथाडा आनो गोलाई सु़का वो दु़खा मेग्वाङिमिनु़। हेङालोने गो येशू ख्रीष्टकु डु़ल्चो़ र्वाक्साका छेसिक्पा पारकु सु़ल आमा मिरो़मडा बु। 18 आमा वा-ल्वाकनी, इकीमा ङाचो़ येशू ख्रीष्टकु दिदाम इनीमा न-गोडा दु़म्नु़म बुनु़। आमेन। |
© Wycliffe Bible Translators, Inc. All rights reserved.
Wycliffe Bible Translators, Inc.