गलाती 5 - थुलुङ राईयेशू ख्रीष्टका वाङ बेसाड्डामिम 1 आथाडा आनो गुइ डु़ल्चो़ मेदु़म्सिनु़ र्वाक्साका येशू ख्रीष्टका गुइलाई वाङ बेसाड्डामिम सो़। मेम्मिमका गानी वाङ दु़म्पा मु़चु़मिम सोनुङमा दु़म्साका बानी मा आथावो डु़म्लाकु जुवागोडा हुमु मेमाल्नी। 2 गो पावल आ त्वाकाङा गानीलाई र्वाक्तोङा बेउ, आथावो गानी कोक्ते खिरिरि क्रिपा डु़म्लाथो़ लनी माला ने येशू ख्रीष्टका बेम्डिम खारी हाम ना हामकाम दु़म। मेरामलाम गानी हाम वो मेल्वानी। 3 कोक्ते खिरिरि क्रिपामिमलाई गो आथावो र्वाङु, खिरिरि क्रिपामिमका मोशाकु खोत्ले डु़म्ला होम्साका दोमुङा बासी। 4 गानी डु़म्लालाम जो़पा न-गोकाम दु़म्मु न बोनी माला येशू ख्रीष्टलाम वाङ दु़म्निम बु। माम्चु़नीकु दिदामडाम वाङ दु़म्निम बु। 5 लावो गुइ थो़रलाम माम्चु़नीकु ङादोडा जो़पा न-गोकाम दु़म्सिनु़ र्वाक्साका इकी न-गोडा लन्थामु चापा ने माम्चु़नी-पेलका दु़म्बेसामी। 6 गुइ ख्रीष्ट येशूडा थो़रलु़पामिमकाम लागि ने कोक्ते खिरिरि क्रिप्डी लोवो मेक्रिप्डी लोवो मेराम हाम वो मेएँ। लावो कोलेङा डोक्पु ल्वा बु, मेराम ने रिखामनुङमा दु़म्साका खारी बेपा थो़र सो़। 7 गानी जो़पा ओन्सीडा ओन्तोङा बेन्नी। लावो गानीलाई आच्छाङाकाम लाम्दीडा लाम्दिमु लागि सु़का गानीलाई भोप्नी? 8 आरेप्माम खारी ने गानीलाई येट्पा माम्चु़नीका बेम्डिम मेएँ। 9 कतिकलङ लङखामका ङोल्मा फुल खोत्लेङा लङखाम दु़म्बेडु़। 10 गुइ खोत्ले ङाचो़नुङ दु़स्तिमका गानी कोर्थो़ न मेसोनी र्वाक्पा गो थो़रलु़ङडोम बु। गानीलाई ब्लो़प्जो़ल्साका कोर्थो़ लक्पा मु़चु़ सु़का लोवो देन्दे ल्वासु़। 11 वा-ल्वाकनी, कोक्ते खिरिरि क्रिप्सी बोमुङा बासी र्वाक्साका आथावो गो मु़चु़मिमलाई थो़बेट्पुमी माला हेङा आरेसाका आमा थो़मतेर्ला सो़सिङुवा मा? गो आरे बेउवाम माला येशू ख्रीष्ट क्रूसडा चेसिम्डी र्वाक्साका थो़बेट्मा ल्वाकु कोर्थो़लाम बक्पा ने सु़ वो मेदु़म्मिवा। 12 कोक्ते खिरिरि क्रिम्मु बासी र्वाक्तो गानीलाई ब्लो़म्मु माल्पामिमका ने उनीमा त्वाकु मिरो़मङा क्रिम्मी लोवो नु़। इनीमा त्वाकु न होम्साका मेएँ, माम्चु़नी-पेललाम दोनी 13 वा-ल्वाकनी, माम्चु़नीका गानीलाई डु़ल्चो़लाम वाङ दु़म्मु लागि येट्निमिम सो़। ओराम वाङदु़म्सी ने इनीमा मिरो़मडाम मेजो़पा न-गो होम्साका मेदोनु़, लावो रिखामका इनी त्वाप-त्वापडा ख्लो़या-बाया बेबेनी। 14 मोशाकु खोत्ले डु़म्लाका र्वाक्ताम ल्वा कोले ल्वाडा रोक्थिड्डाम बु, “इनी त्वापलाई होङङा इनीमा साउखोरेलाई रिखाम बेनी” 15 सो़ब्दीडाम हादीबारामिम होङङा गानी इनी त्वाप-त्वापडा ख्रेन्बेबोनी मा ब्राम्बेबोनी माला ने चङचङया बानी वो, मेएँ माला ने इनी त्वाप-त्वापडाङा पुयु़लुबेबोनी। 16 मेम्मिमका गो र्वाङु, माम्चु़नी-पेलका र्वामिम होम्साका दोनी, मेम माला इनीमा नकु को-कोक्सी होम्साका मेजो़पा मेबोनी। 17 हेङालोने न-गोडाम मेजो़पा नकु को-कोक्सी ने माम्चु़नी-पेलकु कोर्थो़लाम दु़म। मेम्मा माम्चु़नी-पेलका र्वामु माल्लु़म ने मेजो़पा नकु को-कोक्सीकु कोर्थो़लाम दु़म। ओर्चिप ल्वा कोले कोङमीकु कोर्थो़लाम दु़म्चिमका गानी बोमु माल्निमिम ल्वा दु़म्मु मेचाप्सु़। 18 लावो गानी माम्चु़नी-पेलका र्वामिम होम्साका लाम्दिनी माला गानीलाई डु़म्लाका बन्थामु मेचाम्नी। 19 मु़चु़मिमकु नगोडाम मेजो़पा को-कोक्सी ने ओर्मिमङा सो़– नाम्सु़रु़ बोमु, मेसेपा नका बुमु-दोमु, वाङमिमकु नाइमेनुङ अम्मु, 20 ङाटा सेव सान्मु, होन्मु-जोन्मु, त्वाप-त्वापगोडा द्वा मेबोमु, रिबुसी किन्मु, नाचु़र बोमु, छोक्चो बोमु, त्वाप कोङङा जो़पा दु़म्मु माल्मु, गो-फ बोमु, त्वाप-त्वापगोडा न मेघ्रो़म्पा मु़चु़मिमडाम फ्वाम्सिमु, 21 नो़ मेनु़मु, डु़सेवा दु़म्मु, नसीहोम बोम्बाल्मु मा आरेप्मामङा वाङमिम खारी बोमु। आरेप्माम खारी बेपाका ने माम्चु़नीकु किब्दीगोडा हुमु मेल्वासु़। मेम्मिमका गानी चङचङया बानी र्वाक्साका ङादो वो र्वाङ्डोम बाइडा, मा ओम्लो वो र्वाक्तोङा बेउ। 22 लावो माम्चु़नी-पेलका ने गुइलाई आरेप्माम दु़म्बेसामी– रिखाम बेपा, न-थो़म भ्रसिक्पा, न-गो भ्रसिक्पा, इम्सिमु चापा, न-थो़मनुङमा, खोत्लेकाम लागि जो़पा मिम्पा, थो़र लु़इमिम, 23 याक्के दु़म्मु चापा, त्वाका त्वापलाई जो़होमका जु़ल्मु चापा। आरेप्माम ल्वामिमकु कोर्थो़लाम उहेम वो डु़म्ला मिबु। 24 येशू ख्रीष्टकु मु़चु़मिमका छु़लबेपा त्वाकु बादु़खाम नुङ मेम बोमुम बुमु माल्पा मेजो़पा न-गो ने क्रूसडा चेट्मिडिम बु। 25 गुइ माम्चु़नी-पेललाम नु़इ माला माम्चु़नी-पेलका र्वाम्डिम होम्साका लाम्दिमु बासी। 26 गुइ कोलेका कोङमीकु छोक्चो फक्साक्पा, डोक्पु लिसिक्पा मा नाचु़र बेपा दु़म्सी मेनु़। |
© Wycliffe Bible Translators, Inc. All rights reserved.
Wycliffe Bible Translators, Inc.