गलाती 3 - थुलुङ राईयेशू ख्रीष्टडाम थो़रका कोङङा गुइ माम्चु़नीलाममिम जि ल्वासी 1 ए नेप्ची मान्थिम गलातियाडाम मु़चु़नी, मेजो़पा लाम्दीथो़ लाम्दिमु लागि गानीलाई सु़का कोक्नी? इनीमा मिक्सीलामडाङा येशू ख्रीष्ट क्रूसडा चेसिम्डिम ल्वाकु दुथाम जो़होमका र्वाक्मा बाइडा। 2 गानीनुङ गो कोले कोङङा ल्वा हिलाबेपा न बु, माम्चु़नी-पेल गानी डु़म्ला होम्साका खारी बेसाका ल्वान्निम डे, जो़पा-सेलाडा थो़र लु़साका ल्वान्निम डे? 3 गानी हेङा नेप्ची मान्थिम दु़म्निमिम? माम्चु़नी पेललामका चो़म्सिड्डाम त्वारो़मडा गानी इनीमा त्वाकु न होम्साका जो़पा न-गोकाम दु़म्मु माल्निमिम? 4 हाम गानी येशू ख्रीष्टडा थो़र लु़न्निलो आकोति छो़म दु़खा इम्निम ल्वा हाम ना हामकाम दु़स्ता मा? गो मेप्माम मिम्तोम मिबु। 5 माम्चु़नीका गानीलाई माम्चु़नी-पेल ग्वानिमी मा गानीगोडा हेल्लो वो मेल्वाम्मा यु़मखारीमिम बोमी, हाम ओर्मिम खोत्ले गानी डु़म्ला होम्साका खारी बेन्निमका आरे बेम्डिम डे, गानी थो़न्निम जो़पा-सेलाडा थो़र लु़न्निमका डे? 6 मेम्साकाङा अब्राहामकु दुथाम वो आरे र्वाक्मा बु, “अब्राहामका माम्चु़नीडा थो़र बु़डु़मकाङा गुमीका गुलाई जो़पा न-गोकाम बु र्वाक्पा मिम्मिडिम बाइडा।” 7 मेम्मिमका गानी ओराम ल्वा चन्जो़ल्नी, उहेमका थो़र बोमी मेर्मिमङा अब्राहामकु चो़-चु़सु़मिम सो़। 8 माम्चु़नीका वाङसामामिमलाई थो़रलु़सीलामका जो़पा न-गोकाम र्वाक्पा मिम्मिडिम बु र्वाक्साका माम्चु़नीकु सिजेमडा ङादोङा र्याक्मा बाइडा। मेम्मिमका अब्राहामलाई, “गानालामकाङा सुबुडा बाट्पा खोत्ले सामाडाम मु़चु़मिमका जि ल्वामी” र्वाक्साका आरेप्माम जो़पा-सेला ङादोङा थो़बेट्मा बाइडा। 9 मेम्मिमका अब्राहामका थो़र बेसाका जि ल्वास्तु़म होङङा वाङमिमका वो थो़रलामका जि ल्वामी। 10 माम्चु़नीकु ङादोडा मुमा मान्थिम दु़म्मु लागि डु़म्लागोडाम खारी बेसीडा थो़र बेपा खोत्ले मु़चु़मिम वाइतो बेन्ला सो़सिमी। हेङालोने माम्चु़नीकु सिजेमडा र्याक्मा बु, “मोशाकु डु़म्लागोडा बाट्पा खोत्ले ल्वा जो़होमका मेबेसाका बाट्पा खोत्ले मु़चु़मिम वाइतो बेन्ला सो़सिमी।” 11 माम्चु़नीकु ङादोडा डु़म्लालाम सु़ वो जो़पा न-गोकाम मेदु़म र्वाक्पा ल्वा खोत्लेकु ङादोडा रेम्बेम्मा बु। हेङालोने आरेसाका र्याक्मा बु, “जो़पा न-गोकाम मु़चु़ थो़रलाम कोङङा नु़पा दु़म।” 12 डु़म्ला ने थो़रलु़सीलाममिम ल्वा मेएँ, खारी बेपा ल्वा सो़, हेङालोने आरेसाका र्याक्मा बु, “डु़म्ला होम्साका खारी बेपा मु़चु़ मेरामलामका ङा नु़पा दु़म।” 13 येशू ख्रीष्टका थि सोक्साका डु़म्लागोडाम वाइतोलामका गुइलाई फ्वाक्साड्डामी, मा इकीमा खोमडा गुमी वाइतो बेन्ला सो़सिम्डी। हेङालोने माम्चु़नीकु सिजेमडा र्याक्मा बु, “सु़ सङडा चेसी मेराम वाइतो बेन्ला सो़सिड्डाम दु़म।” 14 अब्राहामलाई ग्वाक्मिडिम जि येशू ख्रीष्टलाम वाङसामामिमका ल्वामिनु़ र्वाक्साका गुमीका थि सोक्साका गुइलाई सेल्साड्डामी। मेम्साका इकीमा थो़रलु़सीलामका गुमीका याचे जेम्डिम माम्चु़नी-पेल गुइ ल्वामु चाप्सी। डु़म्ला नुङ याचे जेम्डिम जेसी 15 आमा वा-ल्वाकनी, गुइ हेल्लो लोवो बिइ दोसीमिमलामका गो गानीलाई कोले ल्वा रेम्बेनिनी। नले मु़चु़का कोले ल्वाडा निफिकाङा उची नङ र्याचिमा याचे जेची माला मेराम आच्छाङा बोचिमिम दु़म। मेर्चिप दु़चिमिम ल्वा सु़का वो फाल्मु नुङ मेरामडला हाम-हुम ल्वा काम्मु मेचाप्सु़। 16 माम्चु़नीका अब्राहाम नुङ उमा चो़-चु़सु़नुङ याचे जेम्डिम बाइडा। हापा चो़-चु़सु़मिमनुङ मेएँ कोलेङा र्वाक्साका माम्चु़नीकु सिजेमडा र्याक्मा बु। कोलेङा चो़-चु़सु़ र्वाक्मा ख्रीष्ट सो़। 17 गो र्वामु माल्तोम ल्वा ओरामङा सो़, ङादोङा माम्चु़नीका सो़रख्रेप्मिडिम ल्वा ब्लसङ सु धु़म थ चङडा रोक्पा डु़म्लाका क्रिम्मु मेचाप्सु़। मेएँ माला ने माम्चु़नीका याचे जेम्डिम हाम ना हामकाम दु़म्सावा। 18 माम्चु़नीका ग्वानिनी र्वाम्डिम जि डु़म्ला होम्साका दोसाका ल्वापा माला मेराम ने याचे जेम्डिमलाम ल्वाम्मा मेदु़म। लावो माम्चु़नीका अब्राहामनुङ याचे जेसिलामङा ओराम जि गुलाई ग्वाम्डिम सो़। 19 मेम माला डु़म्ला हेङा चाहे दु़स्ता मा? मु़चु़मिमका मेजो़पा खारी बोमी र्वाक्पा ल्वा रेम्बोमु लागि माम्चु़नीका अब्राहामनुङ याचे जेम्डिम मेराम चो़-चु़सु़ मेयोक्थु़मसम्म डु़म्ला मु़चु़मिमगोडा थु़र्मिडी। मेराम डु़म्ला ने माम्चु़नीका पाह्रीचो़मिमलाम मु़चु़मिम नुङ माम्चु़नीकु थेतेडा दु़म्पा मोशालाई ग्वाम्डिम बाइडा। 20 नले मु़चु़कु थेतेडा दु़म्पाका ने नलेकाम लागि जे, लावो माम्चु़नीका अब्राहामनुङ याचे जेम्डिलो ने वाङमिम मु़चु़ मेथु़र्साका गुमी उनी त्वापङा जेम्डी। 21 मेम माला हाम डु़म्ला ने माम्चु़नीका याचे जेम्डिम ल्वाकु कोर्थो़लाम मा? मेएँ, डु़म्लाका मु़चु़मिमलाई त्वारो़म ग्वामु चाप्सु़वाम माला ने गुइ डु़म्ला होम्साका दोसाकाङा माम्चु़नीकु ङादोडा जो़पा न-गोकाम दु़म्सिवा। 22 लावो खोत्ले मु़चु़मिमलाई छु़लका बथाडु़मिम बु र्वाक्पा माम्चु़नीकु सिजेमका रेम्बु़। मेम्मिमका माम्चु़नीका याचे जेम्डिम ल्वा येशू ख्रीष्टडा थो़रलु़साका कोङङा गुइ ल्वामु चाप्सी। 23 ख्रीष्ट रोमु ङादो, माम्चु़नीका ओराम थो़र गुइलाई मेरेम्बेसावामिमसम्म, गुइ खोत्ले डु़म्लालाम चसिड्डिम बाइडा। 24 थो़रलामकाङा गुइ माम्चु़नीकु ङादोडा जो़पा न-गोकाम दु़म्सिनु़ र्वाक्साका येशू ख्रीष्ट मेयोक्थु़मसम्म मेराम डु़म्लाका गुइलाई जो़पा खारी बोमुडा क्रिसाड्डाम बाइडा। 25 लावो आथा ने येशू ख्रीष्टडा गुइ थो़र बिइडिमका डु़म्लाका गुइलाई क्रिमु मेबासी। माम्चु़नीकु चो़-चु़सु़मिम 26 थो़रलामका गानी खोत्ले येशू ख्रीष्टडा माम्चु़नीकु चो़-चु़सु़ दु़म्निम बु, 27 हेङालोने गानी खोत्ले येशू ख्रीष्टडा थो़रलु़साका कु-रु़दु़म रन्निमका गानी लाले ये-सेमका ब्ल्वासिट्निम होप्माम ख्रीष्टडा लाले बासी दोसीनुङमा दु़म्निम बु। 28 आथाडा आनो ना यहूदी बु ना ग्रीक, ना डु़ल्चो़ ना वाङ दु़म्पा, ना वोस्चो़ ना मेसेम दु़म्मी, हेङालोने येशू ख्रीष्टडा खोत्ले कोलेङा सो़। 29 गानी ख्रीष्टकाम माला गानी अब्राहामकु चो़-चु़सु़, मा माम्चु़नीका याचे जेम्डिम ल्वाकु खुन्चु़म ल्वापा सो़। |
© Wycliffe Bible Translators, Inc. All rights reserved.
Wycliffe Bible Translators, Inc.