गलाती 2 - थुलुङ राईयरूशलेमडाम थु़र्मामिमका पावललाई हुनाखाना बेम्डिम 1 को-ब्ल थ चङडा बारनाबासनुङ गो आथावो यरूशलेम लङ्डो। मेम्लो तीतस वो गुचुकुनुङ लस्ताम बाइडा। 2 माम्चु़नीका गोलाई मेसिन्डा लमु र्वाम्डिमका गो लङडो। मेसिन्डा बाङ्डोलो मेराम मण्डलीडाम ङाउमिमनुङ वाङ घ्रो़म्साका वाङसामामिमलाई गो थो़बेट्पुमिमिम जो़पा-सेला मेर्मिमनुङ सो़उतो। गो बेत्तोङा लेट्पुमिम ओराम खारी हाम ना हामकाम मेदु़म्नु़ र्वाक्साका आरे बेउतो। 3 गोनुङ लक्पा तीतस ग्रीक मु़चु़ लोवो उमा कोक्ते खिरिरि क्रिप्सी दु़म्मु बासी र्वाक्साका सु़का वो मेर्वाक्मिवा। 4 लावो कोङनिम थो़रलु़पा लिसिक्पा वा-ल्वाकमिम आकीमा सामागोडा रोम्डिमा कोक्ते खिरिरि दु़म्मु बासी र्वाम्डी। हेङालोने गुकु येशू ख्रीष्टनुङ कोले दु़म्साका मोशाकु डु़म्ला होम्साका दोमु बासिक्पा ल्वाडाम वाङ दु़म्तोकोम बाइडा, मा मेर्मिमका गुकु वाङ दु़म्तोकोम ल्वाकु दुथाम गो-गो चो़पा बेसाका आथावो उनीमा यहूदी डु़म्लाकु डु़ल्चो़ होप्मामङा दु़म्बेन्मु माल्तिकिम बाइडा। 5 लावो जो़पा-सेलाकु आच्छाङाकाम सिजेम इनीमा लागि दु़म्नु़म बुनु़ र्वाक्साका मेर्मिमका र्वाम्डिम ल्वा कि-कि वो गुकु मेथो़कुवा। 6 मेसिन्डाम मण्डलीडा कोङनिम नङ दोपा डोक्पु मु़चु़मिम बाम्डी– लोवो गो ने हे होङङा मेलु़ङुवा, हेङालोने माम्चु़नीका चो मिक्सी मेबोमी– मेर्मिमका गो दो़उतोम जो़पा-सेलाडा कोले ल्वा वो मेकाप्मिवा। 7 लावो माम्चु़नीका यहूदीमिमकाडा जो़पा-सेला थो़बेड्डा पत्रुसलाई थु़र्मीडिम होम्साकाङा वो वाङसामामिमगोडा जो़पा-सेला थो़बेट्पा खारी गोलाई वो ग्वाङ्डिमिम बु र्वाक्साका मेर्मिमका चम्डी। 8 पत्रुसलाई यहूदीमिमगोडाम थु़र्मा दु़म्साका जो़पा-सेला दो़पा खारी बेबेट्मिडिम माम्चु़नीकाङा गोलाई वो वाङसामामिमगोडा जो़पा-सेला दो़बेट्ङिडिमी। 9 मण्डलीडाम डोक्पु ङाउमिम र्वाक्मा याकूब, पत्रुस नुङ यूहन्नाका वो माम्चु़नीका गोलाई थु़र्मा दु़म्पा दिदाम ग्वाङ्डिमिम बु र्वाक्पा चम्डिमा बारनाबास नुङ गोलाई हुनाखाना बेसाका उनीमा घ्रो़म्दीडा रच्चिकिमी। गुचुकु वाङसामामिमकाडा लक्पा मा मेर्मिम ने यहूदीमिमकाडा लक्पा मुलु़ बेम्डी। 10 मेर्मिमका छो़म र्वाम्डिम कोले ल्वा ने, हाम वो मेबाट्पामिमलाई आथावो ख्लो़मुम बुमु बासी। मेम बोमुडा ने आमा वो सो हन्पा बाइडा। पत्रुसका ख्लो़ड्डु़म ल्वा पावलका मु़चु़मिमकु ङादोडा रेम्बु़डु़ 11 पत्रुस एन्टिओखियाडा रोक्ताम थारीका गुका ख्लो़ड्डु़म ल्वाकु दुथाम उमा ङादोडाङा सो़उतो, हेङालोने गुका कोङनिम ल्वा ख्लो़ड्डु़म बाइडा। 12 याकूबका थु़र्स्तु़मिम मु़चु़मिम रोमु ङादो गुका वाङसामामिमनुङ कोदेपङा पु़थाल्लु़। लावो मेर्मिम मु़चु़मिम रोम्डिम चङडा गु वाङसामामिमडाम वाङ दु़म्साका बाइडा, हेङालोने वाङसामामिम वो कोक्ते खिरिरि क्रिम्मु बासी र्वाक्पामिमडाम ङिम्डिम बाइडा। 13 पत्रुसका बेपा लिसिड्डाम होङङा वाङमिम यहूदी थो़रलु़पामिमका वो उमा बेसी बेम्डी, मा बारनाबासका वो मेमङा बोमु बासी र्वाक्तामा उ त्वाका वो मेर्मिमकु बेसी बु़डु़। 14 मेम्मिमका आच्छाङाकाम जो़पा-सेला होम्साका मेर्मिमका मेबेमिवाम गो ल्वाउतोमा मेर्मिम खोत्ले मु़चु़कु ङादोडा गो पत्रुसलाई र्वाङ्डो, “गानी यहूदी मु़चु़, लोवो यहूदी होम्साका मेएँ वाङसामामिम होम्साका बुनी दोनी माला वाङसामामिमलाई यहूदीमिम होम्साका हेसाका बुबेन्मु चाम्नी मा?” 15 गुकु ने गक्तोकोलोङा यहूदी बात्तोको मा वाङसामा होप्माम छु़लचो़ गुकु मेएँ। 16 लावो सु़ वो डु़म्ला होम्साका दोसाका मुमा मान्थिम दु़म्मु मेचाप्सु़, लावो येशू ख्रीष्टडा थो़रलु़साका कोङङा माम्चु़नीकु ङादोडा मुमा मान्थिम दु़म्मु चाप्सु़ र्वाक्पा ल्वा गुकु चक्त्तोकोम बु। मेम्मिमका गुकु वो माम्चु़नीकु ङादोडा मुमा मान्थिम दु़म्मु लागि येशू ख्रीष्टडा थो़र लु़त्तोकोम बु, हेङालोने डु़म्ला होम्साका दोपामिम सु़ वो मुमा मान्थिम दु़म्मु मेचाप्सु़। 17 लावो येशू ख्रीष्टनुङ कोले दु़म्साका माम्चु़नीकु ङादोडा मुमा मान्थिम दु़म्मु माल्कुलो, गुकु यहूदीमिम लोवो वाङसामामिम होप्मामङा छु़लचो़ दु़म्कु माला येशू ख्रीष्टका छु़ल बेबेत्तिकिमिम मा? आरेप्माम ने हेल्लो वो दु़म्मु मेचाप्सु़। 18 गो मोशाकु डु़म्ला होम्साका दोमु बासिक्पा ल्वा ङेत्तोम बु, मा आथावो गो मेरामङा डु़म्ला बोमु माल्तो माला गो आ त्वापङा छु़लचो़ दु़म्ङु सो़। 19 हेङालोने गो डु़म्ला होम्साका दोमु माल्तोलो डु़म्लाका गोलाई मुमा बेट्ङिडी। मेम्मिमका गो माम्चु़नीकाम लागि नु़पा दु़म्मु चापुनु़ र्वाक्साका डु़म्ला होम्साका गो दोमु डित्तो। 20 गो ख्रीष्टनुङङा क्रूसडा सिङ्डोम बु। मेम्मिमका आथाडा आनो आमा मिरो़मडा गो मेएँ, ख्रीष्ट गोनुङ नु़पा बुमी। ओम्लोम आमा मिरो़मडाम त्वारो़म माम्चु़नीकु तारापाचो़डला थो़रलु़साका गो नु़पा दु़म्ङु। गुमीका गोलाई रिखाम बेङ्डिमी मा गुमीका आमा लागि उनी त्वापलाई ङा ग्वाम्डी। 21 माम्चु़नीकु दिदाम गो हाम ना हामकाम मेमिम्पु। हेङालोने डु़म्लाका माम्चु़नीकु ङादोडा मुमा मान्थिम दु़म्बेडु़ माला येशू ख्रीष्ट क्रूसडा चेन्ला सो़सिम्डिम ने हाम ना हामकाम दु़म। |
© Wycliffe Bible Translators, Inc. All rights reserved.
Wycliffe Bible Translators, Inc.