गलाती 1 - थुलुङ राईपावलकु सेव 1 गो थु़र्मा पावललामका गलातियाडाम मण्डलीमिमलाई ओराम सेलाखाजेम र्याक्तोङा लेट्पु। गो थु़र्मा दु़म्ङोडोम ने मु़चु़मिमलामका मेएँ, मु़चु़मिमकु साखामका वो मेएँ, लावो येशू ख्रीष्ट नुङ गुमीलाई सिमुलाम फक्खेट्पा माम्चु़नी पापका गोलाई थु़र्मा दु़म्बेट्ङिडिमिम सो़। 2 आसिन्डा गोनुङ बाट्पा खोत्ले वा-ल्वाकमिमलामका वो गलातियाडाम मण्डलीमिमलाई आकीमा ओराम सेव बु: 3 माम्चु़नी इकीमा पाप नुङ ङाचो़ येशू ख्रीष्टलाम गानी दिदाम नुङ न-भ्रसी ल्वानी। 4 छु़ल बेत्तोङा बेपा ओराम सु़म्दिसेरलामका सेल्मु लागि गुमी इकीमा माम्चु़नी पापकु न होम्साका उनी त्वापङा सासेन्सिम्डी। 5 हेल्लो लोवो माम्चु़नीकु यु़म झ्वानु़म बुनु़। आमेन। आच्छाङाकाम जो़पा-सेलाडाम वाङमी मिबु 6 गो ने ङाङाया दु़म्ङोडोम बु, हेङालोने येशू ख्रीष्टकु दिदामगोडा येट्पा माम्चु़नीलाई ओकोति दाला डिसाका वाङमी जो़पा-सेलाथो़ लक्तोङा लेनी। 7 लावो मेराम ने आच्छाङाकाम जो़पा-सेला मेएँ। कोङनिम मु़चु़का गानीलाई ब्लो़प्साका येशू ख्रीष्टलाममिम जो़पा-सेला कोर्थो़ हेर्मु माल्तोङा लेन्मिमिमका गो ओराम ल्वा र्वाक्तोङा बेउ। 8 गुकु थो़बेत्तोकोम जो़पा-सेलाडाम वाङमिङा जो़पा-सेला र्वाक्साका थो़बेडु़ माला गुकु गोडामङा कोङनिम लोवो पाह्रीलाम योक्पा पाह्रीचो़ङा लोवो मेराम पुयु़लुनु़। 9 ङादोङा गो गानीलाई र्वाङ्डोम बाइडा मा ओम्लो वो र्वाक्तोङा बेउ, ङादो गानी रन्निम सिजेमडाम वाङमिङा जो़पा-सेला र्वाक्साका कोङनिमका गानीलाई सीनी माला मेरामका पुयु़लुक्पा देन्दे ल्वासु़नु़। 10 हाम गो मु़चु़मिमलाई गेर्सी बेन्मु माल्तोङा लेट्पु र्वाक्पा गानी मिम्निमिम? गो ने मु़चु़मिमलाई मेएँ, माम्चु़नीलाई गेर्सी बेन्मु माल्तोङा लेट्पु। मु़चु़मिमलाई गेर्सी बेन्मु मालु माला ने गो येशू ख्रीष्टकु डु़ल्चो़ङा मेएँ। माम्चु़नीका पावललाई येशू ख्रीष्टकु डु़ल्चो़ दु़म्मु लागि येट्मिडिम 11 वा-ल्वाकनी, गानी ओराम ल्वा चन्जो़ल्नी र्वाक्पा न बेउ, गो दो़उतोम जो़पा-सेला मु़चु़मिमलाम रोक्पा सेला मेएँ। 12 हेङालोने ओराम जो़पा-सेला गो कोङनिम मु़चु़लाम ल्वाउतोम मेएँ मा कोङनिमका गोलाई सीट्ङिडिमिम वो मेएँ, लावो येशू ख्रीष्ट उनी त्वाकाङा गोलाई सीट्ङिडिमिम सो़। 13 गो यहूदीमिमकु डु़म्लागोडा बाङडोलोम आमा दुथाममिम ल्वा ने गानी थो़न्निमङा बु, मेम बिलि गो माम्चु़नीकु मण्डलीगोडाम मु़चु़मिमकु हाङको छो़म थो़मतेर्साक्तोमी मा पुयु़लुबेन्मु माल्तोमी। 14 यहूदी डु़म्लागोडाम गोनुङ कोयोम मु़चु़मिमगोडाम गो खोत्लेडाम लाम बसिक्पामा बेप-पापमिमकु डु़म्ला बोमुडा छो़म आमा सो हन्पा बाइडा। 15 लावो गो गमु ङादोङा गोलाई वाङ बेपा मा उनीमा दिदामलाम गोलाई येट्पा माम्चु़नीका, 16 वाङसामागोडा गोलाम जो़पा-सेला थो़बेन्मु लागि गुमीका उनीमा तारापाचो़ गेर्सी द्वाक्तो गोलाई रेम्बेम्डी। मेम्लो गो सु़नुङ वो हिलाहिसी मेबेउवा। 17 गोडाम ङादो दु़म्मिडिम येशू ख्रीष्टकु थु़र्मामिमकाडा मुलु़ बेप्डा यरूशलेम वो मेलक्ङुवा। लावो गो ने अरब नेब्दी लङ्ल्याङडो मा चङडा दमस्कस शहरडा ख्लोसिङ्डोमा रोङ्डो। 18 सु थ चङडा गो पत्रुसलाई क्रो़म्डा यरूशलेम लङ्डो मा गुनुङ को-ङोलेम बाङ्डो। 19 मेसिन्डा गो ङाचो़कु ल्वाक याकूबडाम वाङमिम थु़र्मामिम सु़लाई वो मेडारुमिवा। 20 गो र्याक्तोम ल्वा आच्छाङा सो़, माम्चु़नीका ओराम ल्वा चमी। उनीमा ङादोडा गो लिमा मेथेट्पु। 21 मेकोतिमा गो सिरिया नुङ किलिकिया इलाकाथो़ लङ्डो। 22 मेम्लोसम्म यहूदियाडाम ख्रीष्टकु मण्डलीमिमका हेल्लो वो गोलाई क्रो़म्ङिडिमिम मेबायावा। 23 मेर्मिमका आमा दुथाम आकोति कोङङा थो़म्डिम बाइडा, “ङादो इकीमा थो़मतेर्स्तु़मा थो़र पुयु़ लुबेन्मु माल्लु़म बाइडा, लावो ओम्लो मेराम थो़रकु दुथामङा सीत्तोङा लेडु़मी।” 24 आरेसाका माम्चु़नीका आमा न ख्लोङसाङ्डिमिमका मेर्मिमका माम्चु़नीकु नङ कोम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.