एफिसी 6 - थुलुङ राईचो़च्चो़मिम नुङ माम-पापकु दुथाम लु़म्ला 1 चो़च्चो़नी, गानी ङाचो़कु मु़चु़ दु़म्निमका त्वाकु माम-पापका र्वामिमिम थो़नी, हेङालोने गानी आरे बोनिमिम ङा जो़पा दु़म। 2-3 माम्चु़नीकु सिजेमडा आरेसाका र्याक्मा बु, “त्वाकु माम-पापलाई डोक्पु मिम्नी। ओराम थो़न्नी माला गानीलाई जो़पा दु़म मा हापा थ जेनी।” (ओराम ने गुइ बोमु बासिक्पा ल्वागोडाम माम्चु़नीका याचे जेसीनुङङा ग्वाक्साड्डामिम ङादोम ल्वा सो़।) 4 गानी पापनी, चो़मिमकाम छोक्चो मेफन्साट्नी, लावो मेर्मिमलाई ङाचो़कु सीसि ग्वाक्साका मेराम होम्साका बासीदोसीगोडा सीत्तो चेत्तो बर्बेट्नी। डु़ल्चो़ नुङ नेमहपकु दुथाम लु़म्ला 5 गानी डु़ल्चो़नी, ख्रीष्टका र्वामिमिम इनी न-गोलामका थो़निमिम होम्साका इनीमा नेमहपलाई छो़म डोक्पु मिम्साका गुका र्वामिम थो़नी। 6 इनी खारी बेसी मु़चु़मिमकु मिक्सीलामडा जो़पा रेम्बेपा मा मेर्मिमलाई गेर्सिबेन्मु लागि कोङङा मेएँ, लावो ख्रीष्टकु डु़ल्चो़ होङङा इनीमा न-गो सोक्साका माम्चु़नीकु न-गो होम्साका खारी बेपा दु़म्नी। 7 गानी खारी बोनिलो मु़चु़मिमकाम लागि मेएँ, माम्चु़नीकाम लागि बेत्तो बेउ र्वाक्साका छो़म इनी बेबे द्वाक्तो बेनी। 8 गानी ओराम ल्वा मिम्नी, गानी डु़ल्चो़ लोवो, मेएँ लोवो, जो़पा खारी बेपा खोत्लेलाई मेर्मिमकु खारी बेसी होम्साका ङाचो़का ग्वामी। 9 गानी नेमहपनी, इनीमा डु़ल्चो़मिमलाई जो़होम नु़म बेनी मा ङिम सान्मु डिट्नी। नेमहप नुङ डु़ल्चो़ निफिकाम पाह्रीला नेमहप कोलेङा बुमी मा गुमीका चोमिक्सी मेबोमी र्वाक्पा ल्वा मिम्सिट्नी। माम्चु़नीकाम गिजो-वाजो 10 हुम-दडा, गानी ङाचो़कु डोक्पु यु़मका यु़मनुङमा दु़म्नी। 11 गुइलाई मेजो़पा बेपा शैतानकु खोत्ले खापमिमडा घ्ल्वामुकाम लागि माम्चु़नीका ग्वानिमिम क्वाल्बा बेखोप खोत्ले सोजाममिम बिम्सिट्निमा क्वाल्बा बिइलो फसिडिमिम येमिम फसिट्नी। 12 इकीमा क्वाल्बा मु़चु़मिमनुङ मेएँ, लावो धामुडा बाट्पा मुनाङ पेलमिमकु हपमिम, आथामबिलिम तुकुम्चिमगोडाम सु़म्दिसेरकु साखामचो़मिम, शैतानका थो़पा खोत्लेकु कोर्थो़लाम सो़। 13 मेम्मिमका माम्चु़नीका गानीलाई ग्वानिमिम खोत्ले क्वाल्बा बेखोप गिजो-वाजोमिम बिम्सिट्नी मा गानीडला मेजो़पा थारी रोलो क्वाल्बा बोमु चापा दु़म्नी मा क्वाल्बा हुमिम चङडा वो गानी सो नुङमा दु़म्साका येम्सिमु चापा दु़म्नी। 14 मेम्मिमका झो़म्सिसाका येम्सिट्नी। आच्छाङाकाम ल्वाकु खिम्खिरी खिम्सिट्नी, मा धक्ची बोपा-थार्पा जो़पा न-गोनुङमा धक्चीख्रेम फन्सिट्नी। 15 न-गो भ्रसिबेट्पा माम्चु़नीकु जो़पा-सेला थो़बेड्डा लक्पा सो़लो़प ख्लु़न्सिट्निमा झो़म्जो़ल्सिट्नी। 16 मेम्मा शैतानका गानीलाई मुनुङमा नो़प्लीमिमका ओम्निलो त्वाप भोम्सिमु लागि वाजो होप्माम इनी थो़र हेल्लो लोवो नगोडा बेन्जो़ल्नी। 17 माम्चु़नीका सेल्निमिम ल्वा इनी बुइ बोपा-थार्पा सेलकु खुचु़खुम खुन्सिनिमिम होम्साका खुतासिट्नी। माम्चु़नी पेलका ग्वानिमिम कातु़रु़ बिम्तासिट्नी। मेराम कातु़रु़ ने माम्चु़नीकु सिजेम सो़। 18 हेल्लो लोवो सो़म्दी बेनी, माम्चु़नीनुङ ख्लो़ला सो़न्सिट्नी। खोत्ले थारीका माम्चु़नी-पेलनुङ दु़म्साका सो़म्दी बेनिम बानी। ओर्मिम ल्वा नडा जु़ल्साका चङचङया दु़म्तो कुदु़मार सो़म्दी बेनी, मेम्मा खोत्ले थो़रलु़पामिमकाम लागि सो़म्दी बेनी। 19 मेकोतिमा गो जेमु खापुलो माम्चु़नीका उनीमा सिजेम ग्वाङिमिनु़, मा ङादो सु़का वो मेचक्मिवाम जो़पा-सेला वाङमिलाई मेङिसाका थेसीथेन्बेन्मु चापुनु़ र्वाक्साका आमा लागि सो़म्दी बेनी। 20 मेराम जो़पा-सेला दो़मु लागि ङा गुमीका गोलाई थु़र्ङिडिमिम बु। सो़म्दी बेङसाङनी, गो झ्यालखानडा चसिक्पा बुङु लोवो गो जेमु बासिक्पा होम्साका मेङिसाका जेमु चापुनु़। हुम-दडाम पावलकु सेव 21 इकीमा छो़म द्वादीबुङ ल्वाक मा ङाचो़कु थो़रलु़इमिम डु़ल्चो़ तुखिकसकाङा गो हेप्माम बुङु मा हाम बेत्तो बेउ र्वाक्पा खोत्ले गानीनुङ सो़यु़। 22 गुकु हे हेप्माम बुकु र्वाक्पा गानी थो़नी मा इनीमा सो हन्नु़ र्वाक्साका गुलाई इनीमाडा थु़र्तोम बु। 23 माम्चु़नी पाप नुङ ङाचो़ येशू ख्रीष्टका गानी वा-ल्वाकमिमलाई न भ्रसी, रिखाम मा थो़र ग्वानिमिनु़। 24 इकीमा ङाचो़ येशू ख्रीष्टलाई रिखाम बेपाम बाट्पा खोत्लेडला हेल्लो लोवो माम्चु़नीकु दिदाम दु़म्नु़म बुनु़। |
© Wycliffe Bible Translators, Inc. All rights reserved.
Wycliffe Bible Translators, Inc.