एफिसी 5 - थुलुङ राईओलडा बुमु 1 माम्चु़नीका रिखाम बेपा उनीमा चो़मिम दु़स्तिमका गानी उनीमा बेसी बोमु माल्नी। 2 येशू ख्रीष्टका गानीलाई रिखाम बेन्निमिमका इनी छु़ललाम वाङ बोमु लागि उनी त्वापङा सासेन्सिम्डी मा माम्चु़नीलाई गेर्सीबेट्पा भ्रपा मुर्नेम्पा धूप होप्माम दु़म्मिडी। मेम्साका गानी वो रिखामडा बानी-दोनी। 3 माम्चु़नीकु सेपा मु़चु़ दु़म्निमका गानी नाम्सु़रु़, रारी बेपा मा खोत्लेखालकाम मेसेपा ल्वाकु नङ वो मेरनी। 4 क्रो़मलु़पा नाम्सु़रु़ ल्वा, नेप्ची मान्थिम ल्वामिम मा नाले डाट्पा ल्वामिम इनीमा सिलामका मेलुनु़, लावो माम्चु़नीलाई आलासो़ ग्वाक्पा दु़म्नी। 5 गानी ओराम ल्वा चमुङा बासी: नाम्सु़रु़चो़, मेसेपा मु़चु़ नुङ रारीचो़, माम्चु़नी नुङ ख्रीष्टकु किब्दीगोनो हुमु मेल्वासु़। रारी बोमु ने ङाटा सेव साट्पा छु़ल होप्माम सो़। 6 सु़का वो गानीलाई हाम ना हामकु ल्वा बेसाका लु-फेले मेबोनिमिनु़। हेङालोने माम्चु़नीका र्वामिमिम मेथो़साका आरेप्माम मेजो़पा खारी बेपा मु़चु़मिमलाई गुमीका देन्दे ग्वामी। 7 मेम्मिमका आरेप्माम मु़चु़का बोमिमिम खारीडा ल्वा मेफिक्नी। 8 ङादो गानी तुकुम्चिमगोडा बान्नी, लावो आथा ने ङाचो़ येशूलाममिम ओलडा रोक्निम बु। मेम्मिमका आथाडा आनो गानी ओलचो़ होम्साका बानी दोनी। 9 हेङालोने ख्रीष्टकु ओलडा दु़म्पा मु़चु़ ने जो़पा बेपा, माम्चु़नीकु मिक्सीलामडा घ्रेट्पा मा थो़र लु़इमिम दु़म। 10 माम्चु़नी हेप्माम ल्वाका गेर्सिमी मेप्माम खारी बोमु माल्नी। 11 हाम वो जो़पा मेदु़म्पा तुकुम्चिमकु खारी बेपा मु़चु़मिमनुङ मेलाम्दिनी, लावो मेराम खारी ने मेजो़पा र्वाक्साका मु़चु़मिमलाई रेम्बेपा दु़म्नी। 12 मेर्मिमका थसिक्साका बोमिमिम खारीकु दुथाम सो़मु वो क्रो़म लु़पा बु। 13 लावो ओल मेर्मिमडला झ्वालो, मेर्मिमकु खारी हाङको छो़म मेजो़पा बु र्वाक्पा छ्याङलो छ्याङलो दो़। 14 मेम्मा बान्ते ओल झ्वा, मेरामका खोत्ले ल्वा दो़बेडु़। मेम्मिमका आरे र्वाक्मा बु, “अम्चेट्पामिम ङोन्सिट्नी, मा सिमुलाम बग्गेट्नी, मा ख्रीष्टका उनीमा ओल गानीडला झ्वाबेन्मी।” 15 मेम्मिमका हेसाका बुमु दोमु बासी चङचङया बानी, नेप्ची मान्थिम होम्साका मेएँ नेप्चीनुङमा दु़म्साका बानी-दोनी। 16 हेल्लो लोवो जो़पा खारी बोमु माल्नी, जो़पा खारी बेपा इनीमा थारी ब्लाम-ब्लाम मेबेनी। हेङालोने आथामबिलि हापा मु़चु़मिम मेजो़पा बेपाम बाट्पा बुमी। 17 मेम्मिमका नेप्ची मान्थिम मेदु़म्नी, लावो माम्चु़नीका गानी हाम बोमिनु़ र्वाक्पा न बोमी मेराम थेसिथेन्मु माल्नी। 18 डु़का सेट्पा मेदु़म्नी, हेङालोने मेरामका इनी त्वापलाई पुयु़ लुबेनी, लावो हेल्लो लोवो माम्चु़नी-पेलका लु़न्सिट्पा दु़म्नी। 19 मेम्मा इनी त्वाप त्वापगोडा माम्चु़नीकु सिजेमगोडाम काम्सो, उनीमा नङ कोमु काम्सो, उनीमा दुथाममिम वाङमी काम्सोमिम बेत्तो न-गोलामका उनीमा नङ कोक्नी। 20 खोत्ले थोककाम लागि इकीमा ङाचो़ येशू ख्रीष्टकु नङडा माम्चु़नी पापलाई आलासो़ ग्वाक्नी। वोचु़ मोचु़कु दुथाममिम लु़म्ला 21 ख्रीष्टलाई डोक्पु मिम्निमिमका इनी त्वापगोडा वो कोले कोङमीकु ल्वाडा बाट्पा दु़म्नी। 22 गानी नाइमेनी, ङाचो़कु ल्वाडा बान्निम होम्साकाङा इनीमा वोचु़कु ल्वाडा बाट्पा दु़म्नी। 23 हेङालोने ख्रीष्ट मण्डलीकु बुइ दु़म्मिडिम होप्मामङा वोचु़ वो उमा मोचु़कु बुइ सो़। मण्डली ने ख्रीष्टकु मिरो़म, मा मेराम सेल्पा ने गुमी सो़। 24 गुइ मण्डलीडाम थो़रलु़पामिमका ख्रीष्टका र्वामिमिम थो़सिमिम होम्साकाङा मोचु़मिमका वो खोत्ले ल्वाडा त्वा-त्वाहोम वोचु़का र्वामिमिम थो़मिनु़। 25 गानी वोचु़नी, ख्रीष्टका मण्डलीलाई रिखाम बेम्डी मा मेरामलाई सेल्मु उनी त्वापङा सिम्डिम होम्साका गानी वो त्वाकु नाइमेलाई रिखाम बेनी। 26 गुमीका थो़रलु़पामिमलाई कुका सो़ल्साका नुङ सिजेमका छेको छेको बेसाका सेपा दु़म्बेन्मु, 27 मा गुइ थो़रलु़पामिम मेजो़पा खारी मान्थिम, छु़ल मान्थिम, मा वाङमी हाम वो मेजो़पा ल्वा मान्थिम बनेबेसाका उनीमा ङादोडा सेपा नुङ मेख्लो़ट्पा मण्डली दु़म्बेन्मु लागि गुमीका उनी त्वापलाईङा सासेन्सिम्डी। 28 मेम्साकाङा वोचु़मिमका वो त्वा-त्वाहोम नाइमेलाई त्वाकु मिरो़मलाई होम्साकाङा रिखाम बोमु बासी। त्वाकु नाइमेलाई रिखाम बेपाका त्वापलाई रिखाम बु़। 29 उ त्वाका त्वापलाईङा मेद्वाक्पा मु़चु़ मेदु़म, लावो उ त्वाकु मिरो़मलाई पोमुडुमु ग्वाक्तो जो़होमनु़म बु़। मेम्साकाङा ख्रीष्टका वो उनी त्वाकु मण्डलीलाई जो़होमनु़म बोमी, 30 हेङालोने गुइ ख्रीष्टकु मिरो़मडाम अंगमिम सो़। 31 माम्चु़नीकु सिजेमका आरे र्वा, “मेम्मिमका मु़चु़का उमा माम-पाप डिडु़, मा गु उमा नाइमेनुङ दु़साका बु, मा मेर्चिप कोले मिरो़म दु़म्ची।” 32 ओराम ने सु़का वो थेसिथेन्मु मेचापा ल्वा बाइडा, लावो मेराम ने ख्रीष्ट नुङ थो़रलु़पामिमकु दुथाम ल्वा सो़। 33 मेम्मिमका गो आथावो र्वाङु, खोत्ले वोस्चो़मिमका त्वा-त्वाहोम नाइमेलाई त्वाप होम्साकाङा रिखाम बोमु बासी, मा खोत्ले नाइमेमिमका त्वा-त्वाहोम वोचु़लाई डोक्पु मिम्मु बासी। |
© Wycliffe Bible Translators, Inc. All rights reserved.
Wycliffe Bible Translators, Inc.