एफिसी 4 - थुलुङ राईयेशू ख्रीष्टडा कोले दु़म्मु 1 मेम्मिमका ङाचो़ येशू ख्रीष्टकु खारी बेउतोमका झ्यालखानडा चसिक्पा गो पावलका गानीलाई छो़म र्वाङु, माम्चु़नीका गानीलाई उनीमा हेप्माम मु़चु़ दु़म्मुकाम लागि येट्निम बु मेराम होम्साका दोनी बानी। 2 हेल्लो लोवो याक्के दु़म्पा, मेक्रोक्पा मा इम्साका कोलेका कोङमीलाई रिखाम बेबेनी। 3 माम्चु़नी-पेललामका गानीलाई दु़बेट्निमिम बु, हेल्लो लोवो न-गो भ्रसिक्तो ओराम दु़सीगोडा बुमुम बुमु माल्नी। 4 माम्चु़नीका गुइलाई कोलेङा जो़पा ल्वा ल्वामुकाम लागि येसाड्डामी, मेम्साका गुइ ख्रीष्टडा दु़म्पामिम खोत्ले कोले मिरो़म सो़ मा माम्चु़नी-पेल वो कोलेङा बुमी। 5 गुइ खोत्लेनुङ कोलेङा ङाचो़, कोलेङा थो़र मा कोलेङा कु-रु़दु़म बु। 6 गुइ खोत्लेकाम कोलेङा माम्चु़नी, मा उनीमा मु़चु़मिम खोत्लेकु पाप गुमी। गुमीका उनीमा खोत्ले मु़चु़मिमडला साखाम थो़मी, मेम्मा गुमीका उनीमा खोत्ले मु़चु़मिमलामका खारी बोमी, मा उनीमा खोत्ले मु़चु़मिमनुङ दु़म्मी। 7 लावो ख्रीष्टका गुइ त्वाप त्वापलाई हापा खालकाम खारी बेपा यु़म उनीमा मुलु़ होम्साका ग्वाक्साड्डामिम बु। 8 मेम्मिमका माम्चु़नीकु सिजेमडा आरेसाका र्याक्मा बु: “गुमी गेले लम्डिलो उनीमा स्वाक्चिमोमिमलाई घ्ल्वासाका चु़म्मा मु़चु़मिमलाई गुमीनुङ लम्डी, मा मु़चु़मिमलाई उपहार ग्वाम्डी।” 9 “गुमी गेले लम्डी” र्वाक्मा हाम? मेराम र्वाक्मा ने ङादो गुइ बाट्पा ओराम सु़म्दिडा ख्रीष्ट आकोम धाली योम्डिम बाइडा। 10 ओराम सु़म्दिडा योम्डिम गुमीकाङा खोत्लेम थोकडला साखाम थो़मु लागि येप्पा पाह्रीलाम खोत्लेडाम डोक्पु खोमडा लम्डी। 11 गुमीकाङा याङलाई थु़र्मा दु़म्बेट्मिडी, याङ माम्चु़नीलाम जेपा, याङलाई जो़पा-सेला दो़पा, याङ मण्डली रेपा मा याङ मण्डलीडा सीपा दु़म्बेट्मिडी। 12 माम्चु़नीकु न होम्साका खारी बोमु चाप्मिनु़ र्वाक्साका उनीमा त्वाकु मु़चु़मिमलाई झो़म्सिबेन्मु लागि आरेसाका बेम्डी, मा ओरामलामका ख्रीष्टकु मण्डली बर्तो ल। 13 गुइ खोत्लेका ख्रीष्टडा बिइमिम इकी थो़रडा कोले दु़म्पा, माम्चु़नीकु तारापाचो़लाई आच्छाङा छेपा, थो़रडा आच्छाङा सोनुङमा दु़म्पा, मा ख्रीष्ट होप्मामङा दु़म्सिमिमसम्म बर्तो लक्सी। 14 आरेसाका गुइ चो़च्चो़ होप्माम मेदु़म्सी। कुकु बाबारिमका होनो आथो़ बेपा मु़चु़ होप्माम मेदु़म्सी मा गुइलाई लु-फेले बेपा सीसिथो़ नुङ लिमालाम ख्लक्पा मु़चु़ होप्माम मेदु़म्सी। 15 लावो रिखामनुङ आच्छाङा ल्वा जेसाका खोत्ले ल्वाडा गुइ ख्रीष्टसम्म बर्तो लक्सी। गुइ मण्डली उनीमा मिरो़म सो़ मा गुमी इकीमा बुइ सो़। 16 गुमीलामकाङा मिरो़मडाम खोत्ले अंगमिम गुमीडाङा दु़म्साका त्वाप-त्वापडा जो़होमका हाम्सिम्डिम बु। खोत्ले अंगमिमका त्वा-त्वाहोम खारी बोमिलो रिखामलामका सोनुङमा दु़म मा मिरो़म बर्तो ल। ख्रीष्टडा लाले बासी दोसी 17 मेम्मिमका ङाचो़कु नङडा गो गानीलाई छो़म र्वाङु, इनी बासी-दोसी माम्चु़नीलाई मेछेपा होप्माम मेदु़म्नु़। मेर्मिमकु मिम्सी ने हाम ना हामकाम दु़म। 18 मेर्मिमकु न-गो तुकुम्चिमका हुप्डु़म बु मा माम्चु़नीका ग्वाम्डिम त्वारो़मलामका मेर्मिम होनोवा बुमी, हेङालोने मेर्मिमका उनीमा न-गो लुङ होप्माम बनेबोमिमा माम्चु़नीका ग्वाम्डिम ल्वा थेसिमेथेन्मी। 19 मेर्मिमकाम उनी लाजी प्वामु दु़स्तु़मका, मेजो़पा खारी बोमुडा उनी न-गो ग्वाम्डिम बु। मेर्मिमका खोत्ले खालकाम मिरो़मका बोमु माल्पा घ्रामलु़पा खारी बेपा नुङ रारीचो़ दु़म्साका बुमी दोमी। 20 लावो गानी ने ख्रीष्टकु सीसिलामका आरेप्माम बासी-दोसी मेसीन्सिट्निवा। 21 आच्छाङा गानी उनीमा सीसि थो़न्निमा उनीमा सीसिपा दु़म्निमका येशूकाम आच्छाङाकाम ल्वा सीन्सिट्नी। 22 मेम्मिमका लु-फेले बेसाका मेजो़पा दु़स्ताम ङादोम इनीमा बासी-दोसी नुङ इनी लाम्दीसी छा पार्नी। 23 मेम्मा इनी न-गो नुङ त्वारो़म आच्छाङा लाले दु़म्मु बासी। 24 लाले मु़चु़ ने माम्चु़नीका उनी त्वाप होप्माम बनेबेबेम्डिम बु मा मेरामका माम्चु़नीकु ङादोडा जो़पा न-गोकाम नुङ आच्छाङाकाम त्वारो़म रेम्बु़। ओराम लाले बासी-दोसीगोडा बानी। 25 मेम्मिमका लिमा जेमु डिट्नी मा कोलेका कोङमीनुङ आच्छाङाकाम ल्वा जेनी, हेङालोने गुइ खोत्ले ख्रीष्टकु मिरो़मडाम अंगमिम सो़। 26 इनी छोक्चो ब लोवो छु़ल मेबेनी। नेम्सुङ गाम्मु ङादोङा इनी छोक्चो सिनु़, 27 मा शैतानलाई खारी बोमु मेग्वाक्नी। 28 खुपाका आथाडा आनो खुमु डिट्नु़ मा त्वाकाङा ब्राम्दु़ल्वा बु़नु़। मेम्मा खेरेला दु़म्पामिमलाई ग्वामु चाप्सु़नु़। 29 वाङमिमलाई मेजो़पा दु़म्पा ल्वा मेजेनी, लावो थारी घ्रेट्पा नुङ नडा लक्पा ल्वा जेनी। मेराम ल्वाका मेर्मिमलाई जो़होमका ख्लो़पा दु़म्नु़। 30 गानीगोडा बाट्पा माम्चु़नी-पेललाई इनी बासी-दोसीलामका मेभ्रसिक्पा मेदु़म्बेट्नी, हेङालोने सेल्सिक्पा नेम गानी वो सेल्सिमु ल्वानी र्वाक्साका माम्चु़नीका उनी त्वाकु पेल ग्वाक्साका गानीडला छाप ओप्मिडिम बु। 31 मेभ्रसिक्पा, गो-गो छोक्चो बेपा, छोक्चोका येत्तो फपा, क्वाल्बा बेपा, मु़चु़लाई डक्साका जेपा, वाङमिमलाई मेजो़पा बेपा खोत्ले बादु़खाम ङेट्नी। 32 लावो न-थो़मनुङमा दु़म्नी मा कोलेका कोङमीलाई रिखाम बेबेनी। माम्चु़नीका गानीलाई ख्रीष्टलामका पाचो ग्वानिमिम होम्साका इनी त्वापगोडा पाचो ग्वाबेनी। |
© Wycliffe Bible Translators, Inc. All rights reserved.
Wycliffe Bible Translators, Inc.