एफिसी 3 - थुलुङ राईपावलका वाङसामामिमलाई जो़पा-सेला दो़स्तु़म 1 मेम्मिमका गानी वाङसामा मु़चु़मिमलाई ख्रीष्टकु जो़पा-सेला दो़उतोलो चसिङडोम गो पावलका र्वाङु। 2 इनीमा लागि ङा गो माम्चु़नीकाम न-थो़मकु खारी बेपा खुन्चु़म ल्वाउतोम बु र्वाक्पा गानी थो़न्निमङा बु। 3 सु़का वो मेचक्मिवाम उनीमा मुलु़ माम्चु़नीका गोलाई चबेट्ङिडिमी। ओराम ल्वाकु दुथाम ङादोङा कि-कि र्यामु दु़म्तोम बु। 4 गो र्याक्तोम ल्वा गानी डाट्नी माला ख्रीष्टकु दुथाम सु़का वो मेचक्मिवाम ल्वा आच्छाङा गो चक्पु र्वाक्साका गानी थेसिथेनी। 5 ओराम ल्वा ङादोम मु़चु़मिम सु़लाई वो चबेट्मा मेबायावा, लावो ओम्लो माम्चु़नीका उनीमा पेललामका ओराम ल्वा उनीमा सेपा थु़र्मामिम नुङ माम्चु़नीलाम जेपामिमलाई रेम्बेट्मिडिम बु। 6 मेराम सु़का वो मेचक्मिवाम ल्वा ने ओराम सो़: जो़पा-सेलालामका वाङ सामामिमका वो ख्रीष्ट येशूडा यहूदीमिमनुङ कोयोङा जि-वाकु खुन्चु़म ल्वामी, मा कोले मिरो़मडा कोयोङा दु़म्मी, मा माम्चु़नीका याचे जेम्डिम ल्वा कोयोङा ल्वामी। 7 माम्चु़नीकु डोक्पु दिदाम नुङ यु़मलामका माम्चु़नीका गोलाई राप्लावा ग्वाक्साका जो़पा-सेला थो़बेट्पा उनीमा डु़ल्चो़ दु़म्बेट्ङिडिमी। 8 ख्रीष्टकु सेपा मु़चु़मिमगोडा गो खोत्लेडाम याक्के लोवो मिम्मु वो मेझापा हापा थिकाम ख्रीष्टकु दुथाममिम जो़पा-सेला वाङसामामिमलाई थो़बेट्पा डोक्पु खारी बोमु गोलाई ग्वाङडिमी। 9 मेम्मा खोत्लेम थोक प्रङपा माम्चु़नीका सु़म्दिमोलो आथामङा थक्मिडिम ल्वा हाम र्वाक्साका खोत्लेनुङ सो़मु लागि गोलाई छेट्ङिडिमी। 10 ओम्लोम थारीका मण्डलीलामका दामुला बाट्पा साखामचो़मिम नुङ हपमिमका माम्चु़नीकाम हापा खालकु नेप्ची बु रेछा र्वाक्पा चमिनु़ र्वाक्साका मेराम थक्मा ल्वा रेम्बेम्डी। 11 सु़म्दि प्रङमु ङादोङा गुमीका ओराम मुलु़ बेम्डिम बाइडा, मा उनीमा मुलु़ होङङा ओम्लो इकीमा ङाचो़ येशू ख्रीष्ट थु़र्साका बेम्सोम्डी। 12 ख्रीष्टडा दु़म्साका मा गुमीडा थो़र बेसाका ङा गुइ माम्चु़नीकाडा रोमु मेङिपा मा इकी सो हन्पा दु़म्सी। 13 मेम्मिमका गो गानीलाई छो़म र्वाङु इनीमा लागि गो छो़म दु़खा ल्वाउलो इनी पाउ मेसोनु़। हेङालोने आमा दु़खाका इनीमा लागि जो़पा जि-वा रेडु़। एफिसी मण्डलीकाम लागि सो़म्दी 14 मेम्मिमका माम्चु़नी पापकु ङादोडा क्रचु़खुम बेसाका सो़म्दी बेउ, 15 गुमी सु़म्दिसेर नुङ पाह्रीला बाट्पा खोत्ले थो़रलु़पामिमकु पापङा सो़। 16 उनीमा हेल्लो वो मेहुक्पा जि-वाका सासाका उनीमा पेललामका गानीलाई यु़म ग्वाक्साका इनीमा न-गो सोनुङमा दु़म्बेन्मिनु़ र्वाक्साका यु़मनुङमा माम्चु़नीनुङ सो़म्दी बेउ। 17 गानी थो़र बेनिम बानी मा ख्रीष्ट इनीमा नगोडा बुमिनु़म बुमिनु़, रिखामडा फ्रु़प क्रोसिसाका गानी होनो आथो़ मेदु़म्पा डोक्पु थो़रनुङमा दु़म्नी, 18 मा गानी नुङ माम्चु़नीकु खोत्ले सेपा मु़चु़मिमका ख्रीष्टकु रिखाम हाङको भापा, हाङको धु़पा, हाङको येपा, हाङको घ्लु़म्पा मिम्मु मेझापा डोक्पु बु र्वाक्पा थेसिथेन्मु चाम्निनु़ र्वाक्साका गो सो़म्दी बेउ। 19 खोत्ले थेसी-चक्सी नुङ नेप्चीका मिम्मु मेचापा ख्रीष्टकु रिखाम गानी थेसिथेट्नी, मा इनीमा खोत्ले बासी-दोसीडा माम्चु़नीका द्वाक्पा मु़चु़ दु़म्निनु़ र्वाक्साका सो़म्दी बेउ। 20 गुइगोडा खारी बेपा उनीमा यु़मलामका गुइ मिम्डिम नुङ बिइडिमडाम वो हापा ग्वामु चापा माम्चु़नीकु नङ, 21 येशू ख्रीष्टलाम मण्डलीडा खोत्लेका हेल्लो लोवो कोमिनु़। आमेन। |
© Wycliffe Bible Translators, Inc. All rights reserved.
Wycliffe Bible Translators, Inc.