एफिसी 2 - थुलुङ राईङादोम त्वारो़म नुङ ओम्लोम लाले त्वारो़म 1 इनीमा छु़लका नुङ माम्चु़नीकु कोर्थो़लाम खारी बेन्निमका ङादोम थारीबिलि गानी सिप्ल्याक्पा बान्नी। 2 मेराम थारीका गानी सु़म्दिसेरडाम छु़लचो़मिम होम्साका दोन्थाल्नी। गानी मुनाङ पेलमिमकु हपका र्वाक्ताम थो़न्थाल्नी। मेरामका ओम्लो माम्चु़नीका र्वामिमिम मेथो़पा मु़चु़मिमगोडा साखाम थो़त्तो बु़। 3 गुइ वो कोखेप मेर्मिम होप्मामङा बाइडी। त्वाकु मिरो़म नुङ नका र्वाक्ताम मेजो़पा ल्वा होम्साका दोस्थाल्ली। मेम्साका इकीमा त्वाकु मेजो़पा न होम्साका दोसिवाम माला गुइ वो वाङमिम होम्साकाङा माम्चु़नीकु देन्दे ल्वामु बासिक्पा बाइडा। 4 लावो माम्चु़नी छो़म न-थो़मनुङमा बुमी मा गुइलाई छो़म रिखाम बेसाड्डामी। 5 गुइ छु़ल बिइडिमका सिप्ल्याक्पा बाइडी लोवो माम्चु़नीका ख्रीष्टलाई सिमुलाम फम्डिलो गुमीनुङङा गुइलाई वो नु़बेसाड्डामी। आरेसाका गुमीका न-थो़म रेम्बेम्डिमा गानी सेल्सिट्निम बु। 6 माम्चु़नीका गुइलाई ख्रीष्टनुङङा सिमुलाम फक्साड्डामी मा पाह्रीलाम नेब्दीडा गुमीनुङङा साखाम थो़मु ग्वाक्साड्डामी। 7 रोक्पा थारीमिमडा हेल्लो लोवो गुइलाई बेसाड्डामिम डोक्पु रिखाम रेम्बोमुलाई ओर्मिम खोत्ले बेम्डी। ओराम रिखाम गुमीका गुइलाई ङाचो़ येशू ख्रीष्टलामका रेम्बेम्डिम बु। 8 माम्चु़नीकु दिदामकाङा गानी थो़र बेन्नी मा सेल्सिट्नी। इनी त्वापङा सेल्सिट्निम ने मेएँ, लावो ओराम सेल्सी ने माम्चु़नीका न बेम्डिमा मेडेङा ग्वाक्निमिम बु। 9 मु़चु़कु सेल्सी ने जो़पा खारी बेसाका ल्वापा मेएँ, मेम्मिमका मेरामकु दुथाम सु़का वो नो़ डोक्पु बोमु मेचाप्सु़। 10 गुइ ने माम्चु़नीका प्रङ्साड्डामिम सो़। गुइ जो़पा खारी बिइनु़ र्वाक्साका गुमीका गुइलाई ङाचो़ येशू ख्रीष्टडा प्रङ्साड्डामी। गुइ मेर्मिम जो़पा खारी बिइनु़ र्वाक्साका माम्चु़नीका ङादोङा मुलु़ बेम्डिम बाइडा। ख्रीष्टडा खोत्ले कोलेङा 11 कोबिलि गानी वाङसामामिम, हेप्माम बान्नी मेराम मिम्सिट्नी, ल्वाका खिरिरि क्रिप्सी बेम्मा यहूदीमिमका गानीलाई कोक्ते खिरिरि क्रिप्सी मेबेम्मा र्वामी। गानीलाई मेम र्वाक्पामिम त्वाप ने खिरिरि क्रिप्सी बेम्मा मिम्सिमी। 12 मेराम थारीका गानी ख्रीष्टडाम वाङ बान्नी। गानी माम्चु़नीका छेट्मिडिम सामा इस्राएलीनुङ हेमकेमङा मेबाट्पा वाङ नेब्दीलाम रोक्पा मु़चु़ होप्माम बान्नी, मा माम्चु़नीका मेर्मिमनुङ जेम्डिम याचे गानी मेचन्थाल्निवा, मा गानी सु़म्दिसेरडा बान्निलो हाम हुम ल्वामु न मेबेपा मा माम्चु़नी मान्थिम बान्नी। 13 गानी मेराम थारीका माम्चु़नीडाम होनोवा बान्नी, लावो आथा ने माम्चु़नीका ख्रीष्टकु सिसिलाम गानीलाई उनीमा फार्डा रेट्निमिम बु। 14 ख्रीष्ट उनी त्वाकाङा यहूदी नुङ गानी मेयहूदीमिम खोत्लेलाई कोले बनेबेसाका इकीमा न-गो दु़बेट्मिडी। गुमीका यहूदी नुङ मेयेहूदीमिमलाई दु़मु मेग्वाक्साका स्वाक्चिमो रेट्पा ब्रोलुङ क्रूसडा सिसाका फाल्मिडी। 15 यहूदीमिमकु डु़म्लाका र्वामिम थो़मुबासिक्पा ल्वा ने हापा बाइडा। लावो ख्रीष्ट उनी त्वाप क्रूसडा सिसाका मेराम डु़म्ला डाम्सोम्डी। गुमीका यहूदी नुङ वाङसामा मु़चु़मिमलाई त्वाकु कोलेङा लाले सामा बनेबेसाका उनी न-गो दु़बेट्पा ख्रीष्टकाम न बाइडा। 16 ङाचो़ येशू ख्रीष्ट क्रूसडा सिसाका यहूदी नुङ मेयहूदी नले सामालाई कोङ सामा बनेबेसाका निफिलाई माम्चु़नीनुङ न-थो़म घ्रो़म्बेट्मिडी, मा दु़मु मेग्वाक्पा स्वाक्चिमो पुयु़लुबेट्मिडी। 17 गुमी योम्डिमा माम्चु़नीडाम होनोवा दु़म्पा गानी मेयहूदीमिम नुङ माम्चु़नी फार्डा बाट्पा यहूदीमिमलाई उनी न-थो़म घ्रो़म्बेट्पा जो़पा-सेला थो़बेट्मिडी। 18 येशू ख्रीष्ट क्रूसडा सिम्डिमका यहूदी नुङ मेयेहूदी गुइ खोत्ले कोलेङा माम्चु़नी पेललामका माम्चु़नीकु ङादोडा रोमु चाप्स्तिम बु। 19 मेम्मिमका आथाडा आनो गानी वाङ नेब्दीलाम रोक्पा मा मेछेडिमिम मु़चु़ होप्माम मेएँ, लावो माम्चु़नीकु मु़चु़मिमनुङ उनीमा किब्दीगोडा बाट्पा साखाम ल्वान्निम बु, मा माम्चु़नीकु नेमगोडाम मु़चु़मिम दु़म्निम बु। 20 गानी ने नेम होप्माम सो़ मा मेराम नेमकु जग ने थु़र्मामिमनुङ माम्चु़नीलाम जेपामिम ङा सो़, ख्रीष्ट येशू उनी त्वाप ने मेराम नेमकु जगडाम डोक्पु लुङ सो़। 21 मे खोत्ले नेमङा ङाचो़ येशूका झेट्मिडिम बु। गुमीकाङा ओराम बर्बेसाका माम्चु़नी बाट्पा सेपा सो़रनेम दु़म्बेन्मी। 22 गानी वो ख्रीष्टनुङ कोदेप दु़म्साका वाङमिम खोत्लेनुङ कोयोङा माम्चु़नी-पेललामका माम्चु़नी बाट्पा खोम दु़म्तो लक्नी। |
© Wycliffe Bible Translators, Inc. All rights reserved.
Wycliffe Bible Translators, Inc.