एफिसी 1 - थुलुङ राईपावलकु सेव 1 माम्चु़नीकु नलामका ख्रीष्ट येशूकु थु़र्मा दु़म्ङोडोम गो पावलका, गानी एफिसस शहरडा बाट्पा मा ख्रीष्ट येशूडा न-गोका थो़र बेपा माम्चु़नीकु मु़चु़मिमलाई ओराम सेलाखाजेम र्याक्तोङा बेउ। 2 माम्चु़नी इकीमा पाप नुङ ङाचो़ येशू ख्रीष्टलामका दिदाम नुङ न-भ्रसी ल्वानिनु़। ख्रीष्टडा त्वारो़मकु जि-वामिम 3 इकीमा ङाचो़ येशू ख्रीष्टकु पाप माम्चु़नीलाई आला दु़म्नु़। गुमीका पाह्रीलाम खोममिमडा त्वारो़मकु खोत्ले जि-वामिम ख्रीष्टडा दु़स्तिम गुइलाई ग्वाक्साड्डामिम बु। 4 माम्चु़नीकु मिक्सीलामडा गुइ छु़ल मान्थिम नुङ हाम वो मेख्लो़ट्पा दु़म्सिनु़ र्वाक्साका सु़म्दिसेर प्रङमु ङादोङा गुमीका गुइलाई ख्रीष्टडा छेसाड्डामी। गुमीका गुइलाई रिखाम बेसाड्डामिमका, 5 भ्रसिक्साका उनीमा न होम्साका येशू ख्रीष्टलाम गुइ उनी त्वाकु चो़मिम दु़म्सिनु़ र्वाक्साका माम्चु़नीका ङादोङा मुलु़ बेम्डिम बाइडा। 6 मेम्मिमका गुमीका द्वादीबुङ उनीमा चो़ ख्रीष्टलामका गुइलाई मेडेङा ग्वाक्साड्डामिम ङाङाया दु़म्सीमिम उनीमा डोक्पु दिदामकाम लागि गुइ आलासो़ र्वाकी। 7 माम्चु़नीकु छो़म डोक्पु दिदामका ख्रीष्टकु सिसिलामका गुमीडाङा गुइलाई सेल्साड्डामी, मा इकीमा छु़ल हेप्साड्डामिम बु। 8 मेराम दिदाम माम्चु़नीका गुइलाई उनी दाप होर्साका ग्वाक्साड्डामी। 9 माम्चु़नीका येशू ख्रीष्टलाम बेउसोक्पु र्वाक्साका नभ्रसिक्तो मुलु़ बेम्डिम मेराम थक्मा ल्वा खोत्ले उनीमा नेप्ची नुङ थेसीथेट्पा नका गुइलाई रेम्बेसाड्डामी। 10 माम्चु़नीकु नका र्वामिम ने थारी हुसोमिम चङडा पाह्री नुङ सु़म्दिसेरडा बाट्पा खोत्ले ख्रीष्टकु साखाम गोडा दु़म्बेन्मिम सो़। 11 ख्रीष्टनुङ कोदेप दु़स्तिमका गुइलाई वो माम्चु़नीका खुन्चु़म खुसिमु ल्वापा दु़म्बेसाड्डामिम बु। खोत्ले ल्वा उनीमा त्वाकु न होम्साका बेप्सोक्पा माम्चु़नीका इकीमा दुथाम ङादोङा आरेसाका मुलु़ बेम्डिम बाइडा। 12 ख्रीष्टडा खोत्लेडाम ङादो थो़र बेपा गुकु यहूदीमिमका यु़म झ्वाक्पा माम्चु़नीकु नङ कोमु चाम्कुनु़ र्वाक्साका गुमीका गुकुलाई छेत्तिकिमिम बु। 13 मेम्साका गानी वो आच्छाङाकु सिजेम, सेल्सिक्पा जो़पा-सेला थो़न्निमा ख्रीष्टडा थो़र बेन्नी। मेम्मिमका माम्चु़नीका ङादो याचे जेम्डिम माम्चु़नी-पेल गानीलाई ग्वाक्साका उनीमा मु़चु़ र्वाक्पा छाप ओप्मिडिम बु। 14 सेल्सिक्पा खुन्चु़म ग्वानिनी र्वाक्साका माम्चु़नीका उनीमा मु़चु़मिमनुङ याचे जेम्डिम बु। आच्छाङा जो़होमका सेल्सिमु मेदु़म्मिमसम्म माम्चु़नीका ङादो किचो़ ग्वाम्जो़ल्मा होप्माम दु़म्नु़ र्वाक्साका माम्चु़नी-पेललाई थु़र्मिडी। गुइ यु़म झ्वाक्पा माम्चु़नीकु डोक्पु नङ कोमु लागि गुमीका आरे बेम्डी। आलासो़ नुङ सो़म्दी 15 मेम्मिमका ङाचो़ येशूडा इनीमा थो़र बुमिम नुङ माम्चु़नीकु मु़चु़मिमडलाम इनीमा रिखामकु दुथाम गो थो़उतोमका, 16 गानीलाई आमा सो़म्दीडा मिम्तो इनीमा लागि आलासो़ ग्वामु डित्तोम मिबु। 17 इकीमा ङाचो़ येशू ख्रीष्टकु माम्चु़नी, डोक्पु पापका माम्चु़नी-पेल थु़र्साका गानीलाई ननुङमा दु़म्बेनिमिनु़ मा उनी त्वाप गानीडा रेम्बोमिनु़, मेम्साका गुमीलाई गानी जो़होमका छेनी र्वाक्साका सो़म्दी बेउहोम बुङु। 18 मेम्मा इनीमा नगोडा माम्चु़नीकु ओल झ्वाबेसाका, माम्चु़नीका गानीलाई हाम ग्वामु लागि येट्निमिम, मा उनीमा मु़चु़मिमलाई ग्वानिनी र्वाम्डिम डोक्पु जि-वामिम, 19 मा गुइ थो़र लु़पामिमकाम लागि उनीमा छो़म डोक्पु यु़म हाङको डोक्पु बु र्वाक्पा चनी र्वाङुमा वो सो़म्दी बेउ। ओराम डोक्पु यु़मलामका ङा, 20 माम्चु़नीका ख्रीष्ट सिमुलाम फम्डी मा पाह्रीला उनीमा जो़पलाम गट्मिडी। 21 माम्चु़नीका डोक्पुमिम, साखामनुङमामिम, यु़मनुङमामिम, किब्दी थो़पामिम, ओम्लोम थारीका कोङङा मेएँ लावो रोक्पा थारीकाम लागि वो वाङमिम नङकु खोत्लेडाम डला ने ख्रीष्टलाई जु़ल्मिडी। 22 मेम्मा माम्चु़नीका ख्रीष्टकु साखामडा खोत्ले जु़ल्मिडी मा मण्डलीकाम लागि खोत्ले ल्वाडा गुमीलाई ङा बुइ बनेबेम्डी, 23 मा मण्डली ने ख्रीष्टकु रो़म, गुमीडा बाट्पा खोत्ले ल्वा थो़र लु़पामिमनुङ बु, मा गुमीका खोत्लेम थोक खोत्लेथो़ उनी त्वाकाङा थो़मी। |
© Wycliffe Bible Translators, Inc. All rights reserved.
Wycliffe Bible Translators, Inc.