कलस्सी 4 - थुलुङ राई1 नेमहपनी, गानी इनीमा डु़ल्चो़मिमलाई जो़होम-नु़होम बेनी। मेम्मा मिम्नी, इनीमा वो नेमहप पाह्रीला बुमी। सो़म्दी बोमु सो हन्बेसी 2 चङचङया बासाका नुङ माम्चु़नीडला आला-तोमानुङमा दु़म्साका सो़म्दी बेनिमङा बानी। 3 मु़चु़मिमलाई गुकु उनीमा सिजेम थो़बेन्मु माम्चु़नीका जो़पा थारी ग्वाकिमिनु़ र्वाक्साका आकीमा लागि वो सो़म्दी बेसाट्किनी। ख्रीष्टकु दुथाममिम ङादो थक्मा ल्वा माम्चु़नीका थेसिथेन्बेत्तिकिम बु, मेराम गुकु वाङमिम मु़चु़नुङ सो़मु चाम्कुनु़ र्वाक्साका सो़म्दी बेसाट्किनी। गो ओराम ल्वा थो़बेट्पुमिमिमकाङा चसिट्पा बुङु। 4 मु़चु़मिमलाई थो़बेन्मु बासिक्पा सिजेम जो़होमका थेसिथेन्बेन्मु चापुनु़ र्वाक्साका सो़म्दी बेङसाङनी। 5 येशूडा थो़र मेबेपा मु़चु़मिमनुङ बुनी-दोनिलो चङको-चङको बान्सिट्नी। खोत्ले जो़पा थारीका ख्रीष्टकु दुथाम मेर्मिमनुङ सो़मु झो़म्जो़ल्सिट्नी। 6 गानी मेर्मिमनुङ जेनिलो हेल्लो लोवो गेर्सीबेट्पा, नडा लक्पा इनीमा जेसी दु़म्नु़, मेम्साका खोत्ले मु़चु़मिमलाई हेसाका तुमु बासिक्पा मेराम गानी चक्नी। सेलाखाजेम र्यामु दु़म्मु खाप्डु़लो सेव 7 तुखिकसका आमा दुथाममिम खोत्ले सेलामिम गानीनुङ सो़यु़। गु ङाचो़काम लागि खारी बोमुडा थो़रलु़इमिम नुङ गोनुङ कोयो खारी बेपा आमा द्वादीबुङ थो़र लु़पा ल्वाक सो़। 8 आकीमा दुथाममिम ल्वा गानी चक्नी र्वाक्साका सो़प्डा गो गुलाई इनीमाडा थु़र्तोङा लेट्पु। मेम्मा गुका इनीमा सो हन्बेन्सानी। 9 गु ओनेसिमसनुङ इनीमाडा रोक्तोङा लेडु़। मे ओनेसिमस गानी गोडामङा कोले मु़चु़, थो़रलु़इमिम नुङ थो़र लु़पा आकीमा द्वादीबुङ ल्वाक सो़। आसिन्डा हा-हाम दु़स्ताम मेर्मिम खोत्ले ल्वा मेर्चिपका गानीनुङ सो़ची सो़। 10 गोनुङङा चतासिक्पा अरिस्तार्खसका गानीलाई सेव र्वाक्ताम बु। बारनाबासकु रु़चु़ मर्कूसका वो गानीलाई सेव र्वाक्ताम बु। उमा दुथाम ङादो गो गानीलाई र्वामु दु़म्तोम बु। गु इनीमाडा रोक्ता माला जो़होमका हुनाखाना बेनी। 11 युस्तस र्वाक्मा येशूका वो गानीलाई सेव र्वाक्ताम बु। माम्चु़नीकु किब्दीकाम लागि गोनुङ खारी बेपामिमडा थो़र लु़पा यहूदीमिम ओर्मिम सुले कोङङा सो़। ओर्मिमका गोलाई भ्रसिबेट्ङिडिमिम बु। 12 गानी गोडामङा कोले इपाफ्रास, गु ख्रीष्ट येशूकु डु़ल्चो़का गानीलाई सेव र्वाक्ताम बु। मेम्मा इनीमा थो़र छो़म डोक्पु दु़म्नु़, मा गानी हाम वो मेख्लो़ट्पा दु़म्साका माम्चु़नीका न बोमिमिम होङङा खोत्ले बोमु चापा दु़म्निनु़ र्वाक्साका इनीमा लागि हेल्लो लोवो गुका छो़म न सोक्साका सो़म्दी बु़होम बु। 13 गो उमा दुथाम आच्छाङा सो़उ, गुका इनीमा लागि मा लाउडिकिया शहरडाम मु़चु़मिमकाम लागि मा हिरापोलिस शहरडा बाट्पामिमकाम लागि छो़म मेझापातो खारी बु़होम बु। 14 आकीमा द्वादीबुङ डाक्टर लूका नुङ डेमासका वो गानीलाई सेव र्वाक्चिम बु। 15 लाउडिकिया शहरडा बाट्पा थो़रलु़पा वा-ल्वाकमिमलाई मा नुम्फास नुङ उमा नेमडा खोम्सिक्पा मण्डलीलाई आमा सेव र्वाङ्साङ्नी। 16 ओराम सेलाखाजेम गानी डान्मु डु़म्निमा लाउडिकियाडाम मण्डलीलाई वो डान्मु ग्वाक्नी। मेम्मा मेर्मिमलाई र्याक्तोम सेलाखाजेम गानी वो डान्मु बासी। 17 अर्खिप्पसलाई आरे र्वाक्नी: “ङाचो़ येशूका गानालाई बेबेट्नामिम खारी बेसोका।” 18 गो पावल, ओराम सेव आमा त्वाकु ल्वाकाङा र्याक्तोङा बेउ। गो चसिक्पा बुङु र्वाक्पा मिम्साका सो़म्दी बेनी। माम्चु़नीकु दिदाम गानीनुङ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.