कलस्सी 3 - थुलुङ राईसेपा दु़म्साका बुमु सो हन्बेसी 1 माम्चु़नीका गानीलाई ख्रीष्टनुङ सिमुलाम बन्गेट्नीमा त्वारो़म ल्वानी माला पाह्रीलाम माम्चु़नीकु जो़पा ल्वा डार्पा न बेनी। मेड्डा ख्रीष्ट माम्चु़नीकु जो़पलाम गन्तसिट्मिमिम बु। 2 सुबुडाम ल्वा मेएँ, गेलेम ल्वाकु दुथाम न बेनिम बानी। 3 हेङालोने ङादोम इनीमा बासी-दोसी हुक्ताम बु मा इनीमा आच्छाङाकु त्वारो़म माम्चु़नीडा ख्रीष्टनुङ थक्मा बु। 4 ख्रीष्ट, इनीमा आच्छाङाकु त्वारो़म बुमी, मा गुमी सु़म्दिसेरडा रेम्बेम्सिमिलो गानी वो गुमीनुङ जो़पा नुङ डोक्पु दु़म्साका रेम्बेन्सिनी। 5 मेम्मिमका ङादो सु़म्दिसेरडाम मु़चु़मिम बान्निलो बेन्निम मेजो़पा इनी न सेट्नी। मेर्मिम ने, नाम्सु़रु़ बेसी, घ्राम्लु़पा खारी बेसी, वाङमिम मेसेमनुङ छो़म अमअम द्वाक्पा न, मेजो़पा खारी बेपा न, रारी बेसी। रारी बोमु ने ङाटा सेव सान्मु होप्मामङा सो़। 6 आरेप्माम मेजो़पा खारीका माम्चु़नीका र्वामिमिम मेथो़पामिमडला गुमीका छो़म डोक्पु छोक्चो रेम्बोमी। 7 ख्रीष्टडा थो़र बोमु ङादो कोबिलि गानी वो आरेङा बेन्थाल्नी। 8 लावो गानी आथावो रु़प्चु़मो लोमु, छोक्चो बोमु, वाङमिमलाई मेजो़पा बोमु, वाङमिमलाई डक्साका जेमु मा घ्राम्लु़पा जेमु डिट्नी। 9 लिमा थेन्मेबेनी, हेङालोने गानी ङादो बान्निम बेन्निम होप्माम बोमु डिट्निम बु, 10 मा गानी लाले मु़चु़ दु़म्निम बु। माम्चु़नीका गानीलाई लाले मु़चु़ बनेबोमी, मा गुमीका उनी त्वाप होप्मामङा गानीलाई बनेबोनिम बुनी, मेम्साका गानी गुमीलाई आच्छाङा छेनिमी। 11 माम्चु़नीका आरे बेम्डिमका ग्रीक ना यहूदी, कोक्ते खिरिरि क्रिप्मा ना मेक्रिप्मा मु़चु़, मेसीसिक्पा, सोक्मुचो़, डु़ल्चो़ ना मेडु़ल्चो़ हाम वो मेएँ। लावो ख्रीष्टङा खोत्लेडाम डोक्पु सो़, मा खोत्लेकाडा गुमी बुमी। 12 माम्चु़नीका गानीलाई उनीमा मु़चु़ दु़म्मु छेट्निमी, उनीमा नङका साट्निमी, मा रिखाम बेन्निमी। मेम्मिमका नाम्नाम्चो़ लु़पा, न-थो़मनुङमा, याक्के दु़म्पा, मेक्रोक्पा दु़म्पा मा इम्सिक्पा दु़म्नी। 13 इम्सी बेबेनी मा कोङनिमका कोङनिमडला सु़म्बुर्मा किसु़लो छु़ल हेम्बेबेनी। ङाचो़का इनीमा छु़ल हेम्साट्निम होङङा छु़ल हेम्बेबेनी। 14 ओर्मिम खोत्लेडलाम रिखाम काप्तो लक्नी। रिखामङा ओर्मिम खोत्ले ल्वालाई जो़होमका कोले बेसाका बट्पा रिवा सो़। 15 ख्रीष्टका इनीमा न-गो थो़मिनु़ मा खोत्लेनुङ दु़बेनिमिनु़। हेङालोने दु़साका बुमु लागिङा माम्चु़नीका गानीलाई कोले मिरो़मडा येट्निमिम बु। मेम्मा गुमीलाई आलासो़ ग्वामु हेल्लो वो मेप्ल्वानी। 16 ख्रीष्टकु सिजेम हाङकोलो लोवो इनीमा न-गोडा जु़ल्साका नु़निम बानी। सीबोनिलो नुङ मुलु़ ग्वाबोनिलो नेप्चीनुङमाका बेनी। माम्चु़नीकु सिजेमगोडाम काम्सो, उनीमा नङ कोमु काम्सो नुङ उनीमा दुथाममिम वाङमिम काम्सोमिम बेत्तो माम्चु़नीलाई न-गोलामका आलासो़ ग्वाक्नी। 17 जेमुडा लोवो खारी बोमुडा लोवो गानी हा-हाम बोनी ङाचो़ येशूकु नङडा ओर्मिम खोत्ले बेनी, मा गुमीलामका माम्चु़नी पापलाई आलासो़ ग्वाक्नी। येशूडा थो़र लु़पामिमकाम नेमडाममिमकु दुथाममिम सीसि 18 लालीकुन्दा बेपा गानी खोत्ले नाइमेनी, ङाचो़ येशूडा गानी बोमु बासिक्पा होङङा इनीमा वोचु़कु साखाम गोयु़ बानी। 19 वोचु़नी, इनीमा नाइमेलाई रिखाम बेनी मा मेर्मिमकाम लागि क्रोक्पा मेदु़म्नी। 20 चो़च्चो़नी, इनीमा मामपापका र्वामिमिम होङङा हेल्लो लोवो बेनी। हेङालोने गानी आरे बोनिलो ङाचो़ येशू गेर्सी द्वामी। 21 पापनी, इनीमा चो़मिमकु छोक्चो मेफन्साट्नी, मेएँ माला ने मेर्मिमकाम उनी गो ज। 22 डु़ल्चो़नी, खोत्ले ल्वाडा गानी इनीमा नेमहपमिमका र्वामिमिम होङङा बेनी। न-थो़म ल्वामु लागि मेर्मिमकु मिक्सीलामडा कोङङा र्वामिमिम होङङा बेपा मेएँ, लावो ङाचो़ येशूकु ङिम जु़ल्साका आच्छाङाकाम न-गोका बेनी। 23 गानी हाम बोनी न-गोका मेराम बेनी। मु़चु़काम लागि मेएँ, ङाचो़ येशूकाम लागि बोनिमिम होङङा बेनी। 24 ङाचो़का उनीमा मु़चु़मिमलाई ग्वाक्पुमी र्वाक्साका ङादो जेम्डिम पुरस्कार गुमीका ग्वानिमी र्वाक्पा चनिमिमङा बु। ङाचो़ ख्रीष्टकाम खारीङा गानी बोनिम बुनी। 25 उहेमका मेजो़पा बु़, मेम बु़डु़मका गु मेजो़पाङा बेला सो़सी मा माम्चु़नीका मेफ्वाक्साका मेर्मिम खोत्लेलाई देन्दे ग्वामी। |
© Wycliffe Bible Translators, Inc. All rights reserved.
Wycliffe Bible Translators, Inc.