कलस्सी 2 - थुलुङ राई1 इनीमा नुङ लाउडिकिया शहरडा बाट्पा मण्डलीकाम नुङ गोलाई मेक्रो़म्ङिमिवाम थो़र लु़पा मु़चु़मिमकाम लागि गो हाङको छो़म ब्राम्दु़ल्वा बेउमिम बु मेराम गानीलाई थेसिथेबेन्मु आमा न बु। 2 इनीमा सो हन्नु़ मा रिखाम बेबोमुडा कोले दु़म्नी र्वाक्साका ओराम बेउतोम बु। इनीमा थो़रडा ने जो़पा दु़म्नी मा गानी मेमुर्पा दु़म्नी, हेङालोने गानी आच्छाङाकाम सिजेम जो़होमका थेसिथेट्निम बु। मेम्मा माम्चु़नीकु थक्मा ल्वा ख्रीष्टकु दुथाम आच्छाङाका थेसिथेनिनु़ र्वाक्पा आमा न बु। 3 ख्रीष्टङा माम्चु़नीकु न नुङ नेप्ची थेसिथेन्बेट्पा बुमी। मे न नुङ नेप्ची ने थक्मा खाप्ची होप्माम बु। 4 उहेम मु़चु़का वो गानीलाई मेर्मिमकु लिमा सीसिमिमथो़ थो़र लु़बेन्मु लेम्मु मेचाम्निमिनु़ र्वाक्साका ओराम ल्वा गानीनुङ र्वाङुमिम। मेर्मिमकु सीसि थो़रलु़इमिम होप्माम ल्वासी लावो आच्छाङा मेएँ सो़। 5 गानीडाम गो होनोवा बुङु लोवो गानीनुङ बाट्पा होङङा लु़ङु। मेम्मा इनीमा खोत्ले ल्वा जो़होमका घ्रो़म्पा नुङ ख्रीष्टडा छो़म थो़र लु़साका बुनिमिम ल्वानिनिलो गेर्सिक्पा बुङु। मु़चु़का बेम्खेप्मा डु़म्लामिमलाम वाङ दु़म्साका ख्रीष्टडा लाले नु़सी 6 मेम्मिमका ख्रीष्ट येशूलाई ङाचो़ र्वाक्साका रन्निम होङङा गुमीडा दोनिम बानी। 7 धु़प्पा फ्रु़प क्रोक्पा धक्सा होप्माम नुङ गुमीडला बनेबेम्मा नेम होप्माम गुमीडलाम इनीमा थो़र आनो मेनो मेदु़म्साका सीपा मु़चु़मिमका गानीलाई सीट्निमिम होङङा छो़म आच्छाङा लु़त्तो लमु बासी। मेम्मा आला-तोमानुङमा दु़म्मुम बुमु बासी। 8 मामासो़, सु़का वो गानीलाई हाम ना हामकाम नुङ वायम डक्पा मु़चु़कु नेप्चीका मेर्मिमकु सीसि होम्साका लाम्दिमु मेर्वामिनु़। मेराम सीसि ने ख्रीष्टलाममिम मेएँ, मु़चु़का बेम्खेम्डिम डु़म्ला नुङ सु़म्दिसेरकु दुथाममिम ल्वा सो़। 9 हेङालोने माम्चु़नीडा बाट्पा खोत्ले ल्वा मिनीचो़ दु़म्डिम ख्रीष्टडा ङा दु़म्मी बुमी। 10 गुमीका गानीलाई ख्रीष्टडा नु़मु ग्वाक्निम बु, मा खोत्लेका लिट्पा बेम्डिमका आथा ने हाम वो मेबासी। खोत्ले साखाम नुङ यु़मडला साखाम थो़पा ख्रीष्टङा बुमी। 11 गानी ख्रीष्टनुङ दु़म्मु ने आच्छाङा क्रिप्सी दु़म्मु ङा सो़। मु़चु़लाम मिरो़मडा दु़म्डिम खिरिरि क्रिप्सी मेएँ, लावो गानीलाई ख्रीष्टलाम क्रिप्सी दु़म्निम बु। ओराम क्रिप्सी ने इनीमा छु़ल बेपा न नुङ छु़लकु यु़मलामका सेल्सिमु ल्वामु सो़। 12 गानी कु-रु़दु़म रन्निलो ख्रीष्टनुङङा क्लु़म्सिट्निम बाइडा। मेम्मा ख्रीष्टलाई सिमुलाम फक्पा माम्चु़नीकु यु़मडा गानी थो़र बेन्निमलामका गानी वो ख्रीष्टनुङङा बक्निम बु। 13 कोबिलि गानी सिन्निम बाइडा, हेङालोने गानी माम्चु़नीकु मु़चु़ मेबानिवा मा छु़ल बेपा मु़चु़ बान्नी, लावो माम्चु़नीका ख्रीष्टनुङङा फक्निमी। माम्चु़नीका खोत्ले इकीमा छु़ल हेप्साड्डामी। 14 गुइ छु़ल बिडिमका देन्दे ल्वामु बासी र्वाक्साका इकीमा कोर्थो़लाम र्याक्मा ल्वा ख्रीष्टकु क्रूसडा काँटीका चेसाका पार्साड्डामी। 15 मेम्मा येशू ख्रीष्ट क्रूसडला सिम्डिमलामका माम्चु़नीका साखाम नुङ यु़म बाट्पा खोत्ले पेलमिमडला घ्ल्वाम्डिमी। मेकोतिमा खोत्लेकु ल्वाहोमडा मेर्मिमकु क्रो़म फुल्साम्डी। 16 मेम्मिमका पोनी-डुनिमिमकु दुथाम, लाले पाङके बेपा चाड लोवो, ख्लो़मु-द बोमु चो़म्डु़लोम चाड लोवो, ङेम्सिमुनेमकाम लावो, हेङा मानेमेबोनिमिम र्वाक्साका सु़का वो मेजो़पा ल्वा इनीमा बुइडला मेउन्मिनु़। 17 ओर्मिम खोत्ले बेम्खेप्मा डु़म्लामिम ने घरिकोङ ल्वासिक्पा पेल होप्मामङा सो़, लावो ख्रीष्टङा आच्छाङा मिरो़म सो़। 18 गुकु माम्चु़नीका रेम्बेम्डिम ल्वा ल्वात्तोकोम बु र्वाम्डिमा त्वापलाई याक्के दु़म्मु होङङा रेम्बेसाका पाह्रीचो़मिमकु सो़रलोले बेत्तो त्वापलाई डोक्पु लिसिक्पा बेपामिम बुमी। मेर्मिमकु लिमा थेसाका गानी ल्वामु बासिक्पा पुरस्कार मेदाम्सोक्नी। मेर्मिम ने हाम वो मेबाट्पा सु़म्दिसेरडाम ल्वा रेसाका त्वापलाई डोक्पु लिसिक्तो बुमी। 19 मेराम मु़चु़ ने गुलाई थो़पा बुइ ख्रीष्ट नुङ मेदु़म्साका वाङ दु़म। ख्रीष्ट ने मिरो़मकु बुइ बुमी। गुमीका मिरो़मलाई डु़ल्मी। मेम्साका मिरो़मकु सेर नुङ सोरिप घ्रो़मबेसाका खोत्ले मिरो़म माम्चु़नीकु न होम्साका बर्तो लमी। 20 गानी ख्रीष्टनुङ सिन्नी मा सु़म्दिसेरडाम मु़चु़मिमका बेम्खेम्डिम डु़म्लाडाम वाङ दु़म्निम बु। मेम माला हेङा ओ सु़म्दिसेरडाम मु़चु़ होङङा दु़म्साका मेर्मिम बोनिम बुनी? 21 “मेझेट्नी, मेदो़प्नी, मेलु़प्नी” र्वाक्मा सु़म्दिसेरकु डु़म्लामिम हेङा बोनिमिम? 22 ओर्मिम खोत्ले ने मोकी मा पारी। ओर्मिम डु़म्ला ने मु़चु़का बनेबेम्डिमा सीट्मिडिम कोङङा सो़। 23 आरेप्माम डु़म्लामिम बिसिक्साका मु़चु़मिमका माम्चु़नी गेर्सिबेन्मु लागि छो़म छो़मी, याक्के दु़म्सी रेम्बोमी, मा त्वाकु मिरो़मलाई दु़खा वो ग्वामी। मेम्मिमका ओर्मिम ल्वा ने नेप्चीनुङमा होप्माम ल्वासी, लावो ओर्मिम ने मु़चु़मिमलाई त्वाकु मेजो़पा नमिम ल्वाडा जो़होमका जु़ल्मु हाम ना हामकाम दु़म। |
© Wycliffe Bible Translators, Inc. All rights reserved.
Wycliffe Bible Translators, Inc.