कलस्सी 1 - थुलुङ राईपावलकु सेव 1 माम्चु़नीकु नलामका ख्रीष्ट येशूकु थु़र्मा मु़चु़ दु़म्ङोडोम गो पावल नुङ गुइ होम्साकाङा येशूडा थो़र बेपा ल्वाक तिमोथीका, 2 कलस्से शहरडा बाट्पा माम्चु़नीकु मु़चु़मिम गानी ख्रीष्टडा थो़र लु़इमिम आकीमा वा-ल्वाकमिमलाई ओराम सेलाखाजेम र्याक्तोङा बोचुकु। माम्चु़नी इकीमा पापका दिदाम नुङ न भ्रसी ग्वानिमिनु़। पावलकु आलासो़ नुङ सो़म्दी 3 इनीमा लागि गुकु सो़म्दी बोकुलो इकीमा ङाचो़ येशू ख्रीष्टकु पाप माम्चु़नीलाई हेल्लो लोवो आलासो़ ग्वाकु। 4 हेङालोने ख्रीष्ट येशूडलाम इनीमा थो़र नुङ माम्चु़नीकु खोत्ले मु़चु़मिमडलाम इनीमा रिखामकु दुथाम गुकु थो़त्तोकोम बु। 5 इनीमा लागि पाह्रीला जु़ल्थाप्मा ल्वा ल्वापा न बोनिमिमलामका मेराम थो़र नुङ रिखाम लु़मिम सो़। मेम्मा मेराम ल्वामुकु दुथाम आच्छाङाकु सिजेम, जो़पा-सेलालामका गानी थो़मु दु़म्निम बु, 6 मेराम जो़पा-सेला इनीमाडा रोक्ताम बु। सु़म्दिसेर खोत्लेथो़म हापा छो़म मु़चु़मिमका मेराम सेलाडा थो़र लु़मिम बुमी, मा मेराम जो़पा-सेलाका उनीमा बासी-दोसीडा जो़पा बु़डु़म बु। माम्चु़नीकु दिदाम गानी थो़न्नी मा आच्छाङा थेसिथेट्निलो आथाम मेराम सेलाका गानीगोडा वो मेमकाङा खारी बु़होम बु। 7 गानी माम्चु़नीकु दिदामकु जो़पा-सेला आकीमा द्वादीबुङ ङोप्सो़ इपाफ्रासलामका थो़न्नी। गुकु होङङा गु वो ख्रीष्टकु खारी बेपाङा सो़। गु आकीमालाममिम थो़र लु़इमिम ख्रीष्टकु खारीचो़ सो़। 8 माम्चु़नी-पेलका गानीलाई वाङमिम मु़चु़नुङ रिखाम बेबेट्निमकु दुथाम वो इपाफ्रासका गुकुनुङ सो़यु़डु़म बु। 9 मेम्मिमका इनीमा दुथाम थो़त्तोकोलो आथाम इनीमा लागि सो़म्दी बोकुमिमङा बुकु। गानी माम्चु़नीकु नलाई थेसिथेन्मुकाम लागि उनीमा पेललामका खोत्ले नेप्ची नुङ थेसिथेट्पा न लिट्पा बेसाका माम्चु़नीका ग्वानिमिनु़ र्वाक्साका गुमीनुङ सो़म्दी बोकुम बुकु। 10 मेम्मा ङाचो़का न बोमिमिम होङङा गानी बुमु चाम्नी मा गुमीलाई गेर्सीबेट्पा खारी हेल्लो लोवो बोनी, गानी खोत्ले जो़पा खारी बोनी मा माम्चु़नीलाई हापा छेत्तो लनी। 11 माम्चु़नीका गानी आनो मेनो मेदु़म्साका इम्सिक्साका बाट्पा दु़म्मु लागि उनीमा डोक्पु यु़मका गानीलाई सोनुङमा दु़म्बेनिमिनु़। 12 भ्रसिक्साका पापलाई आलासो़ ग्वाक्नी। हेङालोने गुमीका ओलकु किब्दीडा उनीमा मु़चु़मिमका ल्वापा ल्वा गानीलाई वो ल्वामु घ्रेट्पा दु़म्बेट्निम बु। 13 गुमीका गुइलाई तुकुम्चिम गोडा साखाम थो़पा शैतानकु किब्दीलामका गेसाका ख्लुक्साड्डामी मा उनीमा द्वादीबुङ तारापाचो़कु किब्दीगोडा रेसाड्डामी। 14 उनीमा तारापाचो़का गुइलाई फ्वामु थि सोक्साड्डामी, मेराम र्वाक्मा, इकीमा छु़लमिम हेप्साक्साड्डामिम सो़। खोत्लेडाम डोक्पु ख्रीष्ट 15 मिक्सीका ल्वामु मेझापा माम्चु़नी गुइ ख्रीष्टडा ल्वामु चाप्सी। माम्चु़नीका प्रङ्मिडिम खोत्लेडला ख्रीष्टकु साखाम बु। 16 हेङालोने पाह्रीला मा सुबुडा बाट्पामिम, मिक्सीका ल्वासिमिम, मेल्वासिमिम, साखाम थो़पा गन्खोपमिम दु़म्नु़का यु़ममिम, साखामचो़मिम दु़म्नु़का डोक्पुमिम, खोत्लेलाई माम्चु़नीका ख्रीष्टलामका प्रङ्मिडी। माम्चु़नीका खोत्ले ख्रीष्टलामका मा ख्रीष्टकाम लागि प्रङ्मिडी। 17 खोत्लेडाम ङादो गुमीङा बुमी, मा प्रङ्सिट्पा खोत्ले गुमीकाङा जेन्थाप्मिमिम बु। 18 ख्रीष्ट मण्डली थो़पा बुइ बुमी, मे मण्डली उनीमा रो़म सो़। ख्रीष्टका लाले नु़सी ग्वाक्सामी। सिमुलाम बग्गेट्पा मा आथावो मेसिपा गुमीङा ङादोम सो़। मेम्मिमका खोत्लेकु डलाम गुमी ङा सो़। 19 हेङालोने माम्चु़नीका उनी त्वापडा बाट्पा खोत्ले ल्वा ख्रीष्टडा जु़ल्मु मुलु़ बोमु द्वाम्डी। 20 माम्चु़नीका क्रूसडला ख्रीष्ट सासेन्सिम्डिम सिसिका न-थो़म घ्रो़म्बेसाका सुबुडाम नुङ पाह्रीलाम खोत्लेलाई ख्रीष्टलामका गुमीनुङ कोदेप बोमु वो द्वाम्डी। 21 कोबिलि गानी माम्चु़नीडाम वाङ बान्नी। इनीमा मेजो़पा बेसी-दोसी बाइडामका इनीमा नडा गानी उनीमा स्वाक्चिमो मु़चु़ बान्नी। 22 लावो माम्चु़नीका गानीलाई उनी त्वापनुङ न-थो़म घ्रो़म्बेट्मिडिम बु। उनीमा मिक्सीलामडा गानी सेपा दु़म्मु, छु़ल मान्थिम दु़म्मु मा मुमा मान्थिम दु़म्मु लागि मिरो़मडा ख्रीष्ट सिम्डिमलामका गुमीका आरे दु़म्बेट्मिडी। 23 लावो गानी इनीमा नडा मेमुर्सिक्साका नुङ आनो-मेनो मेबासिक्साका थो़र बोमुम बुमु बासी, मा गानी जो़पा-सेला थो़न्निलो हाम-हुम ल्वापा न ल्वान्निम डिसिमेनु़। ओराम सेला माम्चु़नीकु खारीचो़मिमका सु़म्दिसेर खोत्लेथो़म मु़चु़मिमलाई थो़बेट्मिडी, मा गो पावल आ त्वाप वो ओराम सेला थो़बेट्पा सेलाचो़ दु़म्ङोडोम बु। मण्डलीकाम लागि पावलकु ब्राम्दु़ल्वा 24 इनीमा लागि गो दु़खा ल्वाउमिमडा गो भ्रसिक्पा बुङु। उनीमा मिरो़म मण्डलीकाम लागि आथावो बाट्पाम बाट्पा ख्रीष्टकु दु़खा गो इम्सोक्पु। 25 माम्चु़नीका ङा गोलाई उनीमा डु़ल्चो़ दु़म्बेट्ङिडिमी, मा गानीलाई खोत्ले उनीमा सिजेम सो़साका मण्डलीकु खारी बेपा खुन्चु़म गुमिकाङा ग्वाङ्डिमिम बु। 26 माके-माकेम मु़चु़मिम बाम्डिलो आथाम थक्मा ओराम सिजेम ओम्लो माम्चु़नीका उनीमा मु़चु़मिमकाडा रेम्बेम्डिम बु। 27 मेयहूदीमिमकाम लागि उनीमा थक्मा ल्वा हाङको जो़पा बु र्वाक्साका उनीमा मु़चु़मिमलाई रेम्बोमु माम्चु़नीका न बेम्डी। ओराम थक्मा ल्वा ने गानीगोडा ख्रीष्ट बुमिमिम सो़, मेम्मिमका माम्चु़नीका गानीलाई कोमी र्वाक्साका थो़र बोमु चाम्नी। 28 गुकु ख्रीष्टकु दुथाम खोत्ले मु़चु़मिमनुङ सो़कु। खोत्लेलाई ख्रीष्टडा सोनुङमा दु़म्बेसाका माम्चु़नीकाडा रेन्थिमु लागि आकी खोत्ले नेप्चीनुङ मेर्मिमलाई ङिमसान्कु, मा आकी थेसी सीकुमी। 29 ख्रीष्टका गोगोडा ग्वाङ्डिमिम डोक्पु यु़मलामका गो ओरामकाम लागि छो़म ब्राम्दु़ल्वा बेउ। |
© Wycliffe Bible Translators, Inc. All rights reserved.
Wycliffe Bible Translators, Inc.