थु़र्मा 8 - थुलुङ राईशाऊलका थो़रलु़पामिमलाई दु़खा ग्वाक्तु़मिम 1 मु़चु़मिमका स्तिफनसलाई आरेसाका लुङका ओम्मुमा सेन्मु शाऊल वो बिस्ताम बाइडा। मेनेम आथामङा यरूशलेमडाम मण्डलीडा छो़म डोक्पु दु़खा दु़म्मु चो़म्डु़। मेकोतिमा थु़र्मामिमडाम वाङमिम थो़रलु़पामिम खोत्लेङा स्वाम्डी, मा यहूदिया नुङ सामरियाथो़ फोन्सिम्डी। 2 माम्चु़नीकु सो़रलोले बेपामिमका स्तिफनसलाई लम्डिमा क्लु़म्मिडी, मा उमा दुथाम छो़म ख्राप्मिडी। 3 शाऊलका ने उनी नेम-नेमडा लस्तामा मण्डलीमिमलाई पुयु़ लुमु माल्लु़मिम बाइडा। गुका वोस्चो़-मेसेममिमलाई थु़त्तो लडु़मिमा झ्यालखानडा चक्थाल्लु़मी। सामरियाडा फिलिपका जो़पा-सेला थो़बेड्डु़मिम 4 यरूशलेमलामका फोन्सिक्पामा लक्पा थो़रलु़पामिम खोत्लेथो़ लम्डी, मा येशूकु दुथाम जो़पा-सेला थो़बेन्मु चो़म्मिडी। 5 फिलिप ने आयु़म सामरिया शहरयु़ योक्ता, मा मेसिन्डाम मु़चु़मिमलाई ख्रीष्टकु दुथाम जो़पा-सेला थो़बेड्डु़मी। 6 फिलिपकु ल्वा थो़म्डी, मा हेल्लो वो मेल्वामिवाम खारी गुका बु़डु़म ल्वाम्डिमा सेर्पा मु़चु़मिमका गुका र्वाक्ताम ल्वा जो़होम न-गो सोक्साका थो़म्डी। 7 हेङालोने सेर्पा मु़चु़मिमलामका मुनाङपेलमिम छो़म डोक्पु लो़लामका येत्तो लुम्डी, मा उनी ल्वा-खेल सोक्पामिम हापा ङा सम्डी। मेकोतिमा उनी खेल ब्लेट्पामिम वो सम्डी। 8 मेम्मिमका मेसिन्डाम मु़चु़मिम छो़म गेर्सी द्वाम्डी। जादु रेम्बेपा सिमोनका येशूडा थो़र बु़डु़म 9 मेराम शहरडा सिमोन र्वाक्मा कोले मु़चु़ बाइडा। मेरामका ङादो आथामङा सामरियाडाम मु़चु़मिमलाई उ जादुका ङाङाया बु़डु़मिम बाइडा। मेरामका उ त्वापलाई छो़म डोक्पु र्वाक्थाल्ला। 10 मेराम मु़चु़लाई डोक्पु-याक्के खोत्लेका “ओराम मु़चु़नुङ ‘छो़म डोक्पु यु़म’ र्वाकिमिम माम्चु़नीकु यु़म बु” र्वाक्पा मिम्थाल्मिडी। 11 मेरामका र्वाक्ताम मेर्मिमका थो़म्थाल्मिडी, हेङालोने हापा ङादो आथामङा मेरामका उ जादुलामका मु़चु़मिमलाई ङाङाया बु़डु़मिम बाइडा। 12 लावो फिलिपका मेर्मिमलाई माम्चु़नीकु किब्दीकु दुथाम नुङ येशू ख्रीष्टकु नङकु दुथाम जो़पा-सेला थो़बेड्डु़मी, उमा ल्वा थो़म्डिमा वोस्चो़-मेसेममिमका येशूडा थो़रलु़म्डिमा कु-रु़दु़म रम्डी। 13 सिमोनका वो थो़रबु़डु़मा कु-रु़दु़म रङडु़। मेकोतिमा गु हेल्लो लोवो फिलिपनुङ लाम्दिथाल्ला। फिलिपका बु़डु़म यु़मखारीमिम नुङ हेल्लो वो मेल्वासु़वाम खारीमिम ल्वास्तु़मा ङाङाया दु़स्थाल्ला। 14 सामरियाडाम मु़चु़मिमका माम्चु़नीकु सिजेमडा थो़रलु़म्डी र्वाक्पा थो़म्डिमा यरूशलेमडा बाट्पा थु़र्मामिमका पत्रुस नुङ यूहन्ना मेर्मिमकाडा थु़र्मिडिची। 15 मेर्चिप मेसिन्डा योक्चिमा मेर्मिमका माम्चु़नी-पेल ल्वामिनु़ र्वाक्साका मेर्मिमकाम लागि सो़म्दी बेसाट्चिमी। 16 मेर्मिमका येशू ख्रीष्टकु नङडा कु-रु़दु़म रम्डिम बाइडा, लावो मेर्मिम सु़काडा वो माम्चु़नी-पेल योम्डिम मेबायावा। 17 पत्रुस नुङ यूहन्नाका मेर्मिमडला उची ल्वा जु़ल्ची, मा मेर्मिमडला माम्चु़नी-पेल योम्डी। 18 थु़र्माचिपका थो़रलु़पामिमडला उची ल्वा जु़ल्चिलो मेर्मिमडला माम्चु़नी-पेल योम्डिम ल्वास्तु़मा सिमोनका मेर्चिपलाई खउलुङ ग्वाक्तु़, 19 मा र्वाक्ता, “ओराम यु़म गोलाई वो ग्वाङ्ची, मा गो उहेमडला ल्वा जु़लुलो मेरामका माम्चु़नी-पेल ल्वास्नु़।” 20 लावो पत्रुसका मेरामनुङ र्वाक्ता, “गाना नुङ इमा खउलुङ निफि ङा पुयु़ लुची। हेङालोने माम्चु़नीकु र्वाप्लावा खउलुङडा भ्रेमु ल्वासी र्वाक्पा मिम्ना। 21 ओराम खारीलामका गाना गुकुलाम हाम वो मेल्वाना, हेङालोने माम्चु़नीकु ङादोडा इमा न-गो जो़पा मिबु। 22 इमा मेजो़पा न-गोलामका ख्लोसा मा माम्चु़नीडा सो़म्दी बे। गाना मिम्नाम मेजो़पा ल्वा गुमीका हेम्सानामी डे। 23 गाना नाचु़र नुङ मेजो़पा ल्वामिम इमा नगोडा कुर्थानामिम गो ल्वाउ।” 24 मेकोतिमा सिमोनका पत्रुस, यूहन्नानुङ र्वाक्ता, “आमा लागि माम्चु़नीडा सो़म्दी बेङ्साङ्नी, गानी र्वाक्निम ल्वा उहेम वो गोडला मेरोनु़।” 25 येशूका बेम्डिम खारी पत्रुस नुङ यूहन्नाका ल्वाच्चिमकु दुथाम नुङ येशूकु दुथाममिम सिजेम मे मु़चु़मिमनुङ दो़च्ची। मेकोतिमा सामरियाडाम देलबाडे लक्ची, मा मेसिन्डाम मु़चु़मिमलाई जो़पा-सेला थो़बेत्तो मेर्चिप यरूशलेमथो़ ख्लोसिक्ची। इथियोपियाडाम डोक्पु मु़चु़का येशूडा थो़र बु़डु़म 26 मेकोतिमा कोङ पाह्रीचो़का फिलिपनुङ र्वाक्ता, “बकामा रायलाथो़ लक्सामा यरूशलेमलामका गाजाथो़ लक्पा र्याङगो-र्याङगोडाम लाम्दी लक्सा।” 27 मेकोतिमा फिलिप बक्तामा लस्ता, मा कोले इथियोपियाडाम नपुंसकनुङ घ्रो़म्ची। मेराम मु़चु़ इथियोपिया नेब्दीडाम मेसेम हप कन्दाकीकु डोक्पु साखामचो़नुङ खोत्ले उ खाप्ची रेप्साक्पा मु़चु़ बाइडा। गु यरूशलेमडा माम्चु़नीकु सो़रलोले बेप्डा लस्ताम बाइडा, 28 मा गु ख्लोसिक्तोङा लेड्डु़, मा उ रथडला गन्तासिट्डामा माम्चु़नीलाम-जेपा यशैयाका र्याक्तु़म खाजेम डात्तोङा लेड्डु़म बाइडा। 29 मेकोतिमा माम्चु़नी-पेलका फिलिपनुङ र्वाम्डी, “लक्सामा मेराम रथडलाम मु़चु़लाई क्रो़म्डा।” 30 फिलिप मेरामकाडा ओन्तो लस्ता, मा मेराम मु़चु़का यशैयाका र्याक्तु़म खाजेमलाम डात्तोङा लेड्डु़म फिलिपका थो़स्तु़, मा मेरामनुङ हिलाबु़डु़, “गानी डात्तोङा लेनिमिम सिजेम थेसिथेनी?” 31 गुका र्वाक्ता, “कोङनिमका गोलाई मेसीथु़म ने ओराम गो हेसाका थेसिथेट्पु मा?” मेकोतिमा गुका फिलिपलाई उ त्वापनुङ गन्मु रथडला येड्डु़। 32 मेरामका डात्तोङा लेड्डु़म माम्चु़नीकु सिजेम ओराम बाइडा, “गुमी फल्डा लक्मा भेन्दाकु चो़ होप्मामङा बाम्डी, उ बोलुङ खुरिलो लिबा बाट्पा भेन्दा होप्माङा गुमी को सि वो मेजेमिवा। 33 गुमीलाई छो़म नाप्छु़ट्मिडिलो उनीमा लागि जो़पा निया वो मेदु़प्सावा। आथा ने उनी चो़-चु़सु़कु दुथाम सु़का सो़यु़ मा? हेङालोने मेर्मिमका सुबुडा उनीमा साम फ्याम्साम्डी।” 34 मेकोतिमा मे नपुंसकका फिलिपनुङ हिलाबु़डु़ “माम्चु़नीलाम-जेपाका ओराम ल्वा सु़कु दुथाम र्वाक्ताम उ त्वाकु दुथाम डे वाङमिमकु दुथाम डे गोनुङ सो़नीका।” 35 फिलिपका ओराम माम्चु़नीकु सिजेमलामका ङा मेरामलाई येशू ख्रीष्टकु दुथाममिम जो़पा-सेला थो़बेन्मु चो़म्डु़। 36 मेर्चिप लाम्दीडा लक्तोङा बेच्चिलो कु बाट्पाडा रोक्फाट्ची। मेकोतिमा मे नपुंसकका र्वाक्ता, “रेप्नी, आसिन्डा कु बु रेछा। गोलाई कु-रु़दु़म रमु सु़का भोम्मु चाम्ङी मा?” 37 [फिलिपका मेरामनुङ र्वाक्ता, “इनी न-गोलामका ङा थो़रलु़नी माला गानी कु-रु़दु़म रमु चाम्नी।” मेरामका र्वाक्ता, “आच्छाङा येशू ख्रीष्ट ङा माम्चु़नीकु चो़ र्वाक्साका गो थो़र बेउ।”] 38 मेकोतिमा मे नपुंसकका रथ थो़पालाई ङेसिबेबेड्डु़, मा फिलिप नुङ मे नपुंसक निफिङा कु बाट्पायु़ लक्ची, मा मेरामका नपुंसकलाई कु-रु़दु़म ग्वाक्तु़। 39 मेर्चिप कुलामका पाखाडा लुक्गेच्ची, मा कोचोत्ति माम्चु़नी-पेलका फिलिपलाई वाङथो़ ङा लम्डी, मा मेरामका आथा ने फिलिपलाई मेल्वासु़वा, मा मे नपुंसक गेर्सी द्वाक्तो उ नेम ख्लोस्ता। 40 लावो फिलिप ने अश्दोद र्वाक्मा शहरडा रोक्फाड्डा। मेम्मा कैसरिया मेरोक्थिट्थु़म खोत्ले शहरडा येशूकु दुथाममिम जो़पा-सेला थो़बेत्तो लस्ता। |
© Wycliffe Bible Translators, Inc. All rights reserved.
Wycliffe Bible Translators, Inc.