थु़र्मा 6 - थुलुङ राईथो़रलु़पामिमगोडा ख्लो़पा येतले मु़चु़ थुट्मिडिम 1 मेमबिलि येशूडा थो़रलु़पा मु़चु़मिम छो़म हापा दु़म्तो लम्डी। मेकोतिलो हिब्रू ल्वा जेपा थो़रलु़पामिमकु कोर्थो़लाम ग्रीक ल्वा जेपा थो़रलु़पामिमका सु़म्बुर्मा किन्मु चो़म्मिडी। हेङालोने हेल्लो लोवो पोमु दो़म्थाल्मिडिलो मेर्मिमगोडाम अर्दोमेमिमडला चोमिक्सी बेम्थाल्मिडी। 2 मेकोतिमा मे को-न (१२) थु़र्मामिमका खोत्ले सीसिपामिमलाई येट्मिडिमा र्वाम्डी, “गुकु माम्चु़नीकु सिजेम दो़मु डिसाका पोमु-डुमु ग्वामुमिथो़ लमु जो़पा मेदु़म। 3 मेम्मिमका ए वा-ल्वाकनी, खोत्ले मु़चु़मिमका द्वामिमिम नेप्चीनुङमा नुङ माम्चु़नी-पेलका लु़न्सिपा येतले मु़चु़ गानीगोलामका ङा छेनिमी, मा मेर्मिमलाई गुकु ओराम खारी बोमु थुकु। 4 मेकोतिमा गुकु ने सो़म्दी नुङ सिजेमकु लाले-पाङके ङा बोमुम बुमु बासी।” 5 ओराम ल्वा खोत्लेकु नडा लस्ता, मा मेसिन्डा खोम्सिट्पा खोत्लेङा बिम्सिम्डी। मेम्मा माम्चु़नी-पेलका लु़न्सिपा नुङ खोत्लेका थो़रलु़म्डिम स्तिफनस, फिलिप, प्रखरस, निकनोर, तीमोन, पर्मिनास नुङ एन्टिओखियाडाम चङ्डा यहूदी दु़म्पा निकोलाउसलाई मेर्मिमका छेट्मिडी। 6 मेकोतिमा मेर्मिमका ओर्मिम मु़चु़ थु़र्मामिमकाडा रेट्मिडी, मा थु़र्मामिमका मेर्मिमडला ल्वा जु़ल्मिडिमा सो़म्दी बेम्डी। 7 माम्चु़नीकु सिजेम खोत्लेथो़ फोन्सिक्तो लस्ता। मेकोतिमा सीसिपामिम यरूशलेमडा छो़म बर्मिडी, मा डु़म्लाचो़मिमगोडाम वो हापाका माम्चु़नीडा थो़रलु़म्डी। स्तिफनसलाई चु़म्मिडिम 8 स्तिफनसकाडा माम्चु़नीकु दिदाम नुङ यु़म छो़म बाइडामका मु़चु़मिमगोडा छो़म डोक्पु-डोक्पु छेखोपमिम नुङ यु़मखारीमिम बु़डु़। 9 लावो याङ-याङ ने स्तिफनसकु कोर्थो़लाम बमु चो़म्मिडी। मेर्मिम फ्वाक्मा डु़ल्चो़मिमकु सामा घ्रो़म्दीनेमडाम मु़चु़मिम, मा कुरेनी, अलेक्जेन्ड्रिया, किलिकिया नुङ एशियाडाम खोत्ले मु़चु़मिम बाम्डी। 10 लावो उहेम नेप्चीका नुङ पेललामका स्तिफनस जेस्ता, मेर्मिमका गुनुङ हाम वो जेमु ङा मेचाप्मिवा। 11 मेकोतिमा मेर्मिमका लिबावा मु़चु़मिमलाई कोम्डिमा आरे र्वाबेट्मिडी, “ओरामका मोशा नुङ माम्चु़नीलाई डक्साका जेस्ताम गुकु थो़त्तोको।” 12 आरेसाका मेर्मिमका मु़चु़मिम, ङाउमिम नुङ यहूदीमिमकु डु़म्ला सीपा पातु़म्रीमिमलाई कोम्डी। मेकोतिमा स्तिफनसलाई चु़म्मिडिमा मे डोक्पु घ्रो़म्दीडा रो़-रो़न्थु़त्तो रेट्मिडी। 13 मेर्मिमका मेरामकु दुथाम लिमा थेट्पामिम मेसिन्डा रेट्मिडी, मा मेर्मिमका आरे र्वाम्डी, “ओरामका माम्चु़नीकु नङका साट्मा सो़रनेम नुङ डु़म्लाकु कोर्थो़लाम जेमु मेडिडु़। 14 हेङालोने ओरामका आरे र्वाक्ताम गुकु थो़त्तोकोम बु, ‘नासरतडाम येशूका ओराम सो़रनेम फाल्मी, मा मोशाका गुइलाई ग्वाक्साड्डाम डु़म्ला वो वाङमी ङा दु़म्बेन्मी’।” 15 मेकोतिलो मे डोक्पु घ्रो़म्दीडा बाट्पा खोत्लेका स्तिफनसलाई रेप्मिडिम-रेप्मिडिम ङा बेम्डी, मा स्तिफनसकु ङाली पाह्रीचो़कु ङाली होप्माम ङा ल्वाम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.