थु़र्मा 3 - थुलुङ राईखेल ब्लेट्पा मु़चु़ सस्ताम 1 कोलेम पत्रुस नुङ यूहन्ना सो़रनेमथो़ लक्तोङा बेच्ची। मेकोतिलो नेम्फुम सु जेस्ताम बाइडा। मेराम थारीका मेर्मिमका सो़म्दी बेम्थाल्मिडी। 2 मे सो़रनेमगोनो हुपा मु़चु़मिमनुङ बिमु गस्तालो आथामङा उ खेल ब्लेट्पा कोले मु़चु़ वाङमिम मु़चु़का कुर्साका हेल्लो लोवो मेसिन्डा रेन्थाल्मिडी। मेकोतिमा मे सो़रनेमकु ‘जो़पा लाम्चोको’ र्वाक्पा खोमडा जु़ल्थाल्मिडी। 3 पत्रुस नुङ यूहन्ना मे सो़रनेमगोनो हुत्तोङा बेच्चिम ल्वास्तु़मा मेरामका मेर्चिपनुङ बिमु चो़म्डु़। 4 मेर्चिपका मेरामलाई रेप्चिम-रेप्चिम ङा बेच्चिमा पत्रुसका र्वाक्ता, “गुचुकुथो़ रेप्डा!” 5 मेरामका मेर्चिपलाम हाम-हुम ल्वापा नका जो़होमका मेर्चिपथो़ रेप्डु़। 6 मेकोतिमा पत्रुसका र्वाक्ता, “सो़ना, मतो गोनुङ मिबु, लावो हाम गोनुङ बु, मेराम ङा ग्वानी। नासरतडाम येशू ख्रीष्टकु नङडा लाम्दिया!” 7 मेकोतिमा पत्रुसका मेरामकु उ जो़प ल्वाडा झेड्डु़मा फक्तु़। मेकोतिलोङा मेरामकु खेलकु मिक्सी नुङ खेलचिपडा सो बेड्डु़। 8 मेराम हुचिबक्तामा येम्स्ता, मा लाम्दिमु चो़म्डु़। मेकोतिमा लाम्दित्तो, प्रोक्तो, माम्चु़नीकु नङ कोक्तो मेर्चिपनुङ ङा सो़रनेमगोनो हुङडा। 9 खोत्ले मु़चु़मिमका मेराम लाम्दित्तो लेड्डु़म नुङ माम्चु़नीकु नङ कोक्तोङा बु़डु़म ल्वाम्डी। 10 मेर्मिमका सो़रनेमडाम ‘जो़पा लाम्चोकोडा’ बाट्पा मा बिपा मेराम ङा र्वाक्साका छेट्मिडी। मेकोतिमा मेर्मिमका मेराम हेल्लो वो मेल्वामिवाम ङा ल्वाम्डिमा ङाङाया दु़म्मिडी। सो़रनेमडा पत्रुसका सिजेम दो़स्तु़म 11 मेराम मु़चु़का पत्रुस नुङ यूहन्नाकु ल्वाडा झेसाका लाम्दिडाम ल्वाम्डिमका खोत्ले मु़चु़मिम ङाङाया दु़म्मिडी। मेम्मा ‘सोलोमनकु डोक्पु पिन्दी’ र्वाक्माडा कोयो-कोयोङा मेर्मिमकाडा ओन्तो रोम्डी। 12 मेराम ल्वास्तु़मा पत्रुसका मेर्मिमनुङ र्वाक्ता, “ए इस्राएलडाम मु़चु़नी, ओराम लाम्दिइडाम ल्वान्निमा हेङा गानी ङाङाया दु़म्निमा गुचुकुथो़ रेम्थानिमिम? गुचुकु आचीमा यु़मका नुङ माम्चु़नीकु सो़रलोले जो़होमका बेच्चोकोमका ओराम मु़चु़ लाम्दिइडाम र्वाक्पा मिम्थानिमिम? 13 अब्राहाम, इसहाक नुङ याकूबकु माम्चु़नी, इकी बेब-पापकु माम्चु़नीका उनी त्वाकु डु़ल्चो़ येशूलाई उनी यु़म-झ्वाक्सीडा कोम्डी, गुमीलाई गानी चु़म्बेट्निमी। मेकोतिमा पिलातसका गुमीलाई डिन्मु न बु़डु़, लावो गानी गुमीलाई उ ङादोडा ङा रमु मेबिन्सिट्निवा। 14 लावो गानी ने माम्चु़नीकु नङका साट्मा नुङ माम्चु़नीकु न-गोनुङमा येशूलाई डिन्मु मेबिन्सिट्निवा, मा मु़चु़ सेट्पालाई डिन्बेट्नी, 15 मा त्वारो़म ग्वाक्पा ङाचो़लाई गानी सेट्नी, लावो गुमीलाई माम्चु़नीका सिमुलाम फम्डी, मा गुकु मेराम आकी मिक्सीका ङा ल्वात्तोकोम बु। 16 उनी नङडा बु़डु़म थो़रका नुङ उनी नङका ङा गानी ल्वान्निम नुङ चनिम ओराम मु़चु़लाई सो ग्वाक्तु़म बु। येशूडा बु़डु़म थो़रका ओराम मु़चु़लाई गानी खोत्लेकु ङादोडा जो़होमका सबेड्डु़म बु। 17 “वा-ल्वाकनी, गानी मेचक्साका मेम बेन्नी र्वाक्पा गो चक्पु, मा इनी साखामचो़मिमका वो मेम ङा बेम्डी। 18 ख्रीष्टका दु़खा ल्वामु बासी र्वाक्साका माम्चु़नीका खोत्ले माम्चु़नीलाम-जेपामिमकु सिलामका जेम्डिम सिजेम आरेसाका रोक्थिड्डा। 19 मेम्मिमका इनीमा छु़ल न-गोलामका मिम्सिट्निमा ख्लोन्सिट्नी, मा इनीमा छु़ल हेम्सिनु़। मेकोतिमा इनीमा गेर्सिमु थारी माम्चु़नीलाम रोनु़, 20 मा गुमीका इनीमा लागि ङादो ङा थुट्मिडिम ख्रीष्ट थु़र्मी, मेराम ने येशू ङा सो़। 21 माम्चु़नीका माके आथामङा उनी नङका साट्मा गुमीलाम-जेपामिमकु सिलामका जेम्डिम खोत्ले ल्वा होम्साका दु़म्मुथारी मेरोक्थु़म ख्रीष्ट पाह्रीला बुमु ङा बासी। 22 मोशाका आरे र्वाक्ताम बाइडा, ‘मिप्रङमा माम्चु़नीका इनी वा-ल्वाकमिमगोलामका इनीमा लागि गो होप्मामङा माम्चु़नीलाम-जेपा मु़चु़ थुमी। मेकोतिमा गुमीका गानीलाई हा-हाम र्वामी मेर्मिम खोत्ले गानी थो़मु बासी। 23 लावो मेराम माम्चु़नीलाम-जेपाका र्वामिमिम मेथो़पा ने माम्चु़नीकु मु़चु़मिमलामका वाङ दु़म्साका पुयु़लुमी।’ 24 “शमूएल नुङ उमा चङडा रोक्पा खोत्ले माम्चु़नीलाम-जेपामिमका ओर्मिम थारीकु दुथाम ङा जेम्डिम बु। 25 गानी मे माम्चु़नीलाम-जेपामिम नुङ माम्चु़नीका सो़रख्रेप्मिडिम बेप-पापकु चो़-चु़सु़ ङा बुनी, उहेम सो़रख्रेप्सी अब्राहामनुङ आरे र्वाम्डिमा ख्रेप्मिडिम बाइडा, ‘इमा चो़-चु़सु़लामका ङा सुबुडाम खोत्ले मु़चु़मिमका जि ल्वामी।’ 26 खोत्ले इनी मेजो़पा खारीलामका ख्लोक्साका जि ग्वामुलाई माम्चु़नीका उनी त्वाकु डु़ल्चो़ थुट्मिडिमा ङादो इनीमाडा ङा थु़र्मिडी।” |
© Wycliffe Bible Translators, Inc. All rights reserved.
Wycliffe Bible Translators, Inc.