थु़र्मा 28 - थुलुङ राईपावल माल्टा टापुडा 1 गुकु जो़म-नु़मका दिरिदिनकु पाखानो लुक्तोकोमा मेराम टापुकु नङ माल्टा रेछा र्वाक्पा गुकु थेसिथेत्तोको। 2 मेसिन्डाम देल्पामिमका गुकुडला छो़म न-थो़म रेम्बेम्डी। व योक्तामा जु लु़डामका मेर्मिमका मु होट्मिडिमा गुकुलाई झु़ड्डा येत्तिकी। 3 पावलका वो को बालाम सङ रेड्डु़मा चायु़डु़। मुकु सामका कोले ब्लो लुक्तामा पावलकु ल्वाड्डा रिम्सिड्डा। 4 मे देल्पामिमका पावलकु ल्वाड्डा ब्लो रिम्तासिट्पा ल्वाम्डिमा उनी त्वाप-त्वापडा आरे र्वाबेम्डी, “ओराम मु़चु़ ने मु़चु़ सेट्पा ङा दु़म्मु बासी। ओराम मु़चु़ दिरिदिनलामका ने सेल्सिड्डामा लुक्ता, लावो नो़पमाकु नियालामका ने सेल्सिमु मेचाप्सु़।” 5 लावो पावलका मे ब्लो मुड्डा थिरक्तु़मा आल्स्तु़, मा पावल हे वो मेदु़प्सावा। 6 मेर्मिमका पावलकु रो़म होममा क्वायु़ पुलु़झारमा सि र्वाक्साका लम्थाट्मिडिम बाइडा। लावो थामासम्म लम्थाट्मिडी लोवो गु हे वो मेदु़प्सावामका मेर्मिमका उनी न ख्लोम्डिमा आरे र्वामु चो़म्मिडी, “ओराम ने नो़प डे रेछा।” 7 मेराम टापुडाम उनी डोक्पु मु़चु़ पब्लियसकु ये-द मेराम फारबाडे ङा बाइडा। पब्लियसका गुकुलाई उमा नेमडा लक्तिकिमा पोमु-डुमु ग्वाक्तिकी। गुकु मेरामकु नेमडा सुलेम बात्तोको। 8 पब्लियसकु पाप डार्चु़मोका नुङ सिसि-एपा सोमोरीका झार्ल्याक्पा बाइडा। पावलका गुलाई क्रो़म्डा लस्तामा मेरामडला ल्वा जु़ल्साका सो़म्दी बु़डु़मा सबेड्डु़। 9 ओराम थो़म्डिमा मेसिन्डा बाट्पा सोमोरीनुङमा वाङमिम हापा मु़चु़ वो रोम्डी, मा पावलका सबेड्डु़मी। 10 मेर्मिमका गुकुलाई जो़होम-नु़होम बेत्तिकी। गुकु डोक्पु कुबी-बोक्साडा हुमु थारीका आकीमा लागि चाहेदु़म्पा मोमसोजाममिम मेगोडा फिक्साक्तिकिमी। हप कैसर बाट्पा रोम शहरडा पावल रोक्फाड्डाम 11 सु मुनाम चङडा गुकु अलेक्जेन्ड्रिया शहरलाम रोक्पा डोक्पु कुबी-बोक्साडा हुत्तोको। ओराम डोक्पु कुबी-बोक्सा जुनेमका ओराम टापुडा ङा बाइडा। डोक्पु कुबी-बोक्साकु ङादोगोनो निची नो़पकु ङाली जु़ल्मा बाइडा। 12 मेकोतिमा सुराकुसाई र्वाक्पा शहरडा लुक्तोको, मा गुकु मेसिन्डा सुलेम बात्तोको। 13 मेलामका गुकु डोक्पु कुबी-बोक्साडला हुत्तोको, मा रेगियन शहरडा रोक्फात्तोको। उ दिकाम रायलालामका ब्लोजु़ फुन्मु चो़म्डु़, मा उ नहाद्दामनेम गुकु पटिओली शहरडा रोक्तोको। 14 मेसिन्डा गुकु येशूडा थो़रलु़पामिमलाई डार्तोको, मा मेर्मिमका येतलेमसम्म गुकुलाई बुइ र्वाम्डी। आरेसाका गुकु रोम शहरडा रोक्फात्तोको। 15 रोमडा बाट्पा थो़रलु़पामिमका गुकु रोक्तोङा बोकु र्वाक्पा थो़म्डिमा अप्पियसडाम बजार नुङ ‘सु पाटी’ र्वाक्माडा घ्रो़म्डा रोम्डिम बाइडा। ओर्मिमलाई ल्वास्तु़मिमा पावलका माम्चु़नीलाई आलासो़ ग्वाक्तु़मा उमा सो हन्डा। 16 गुकु रोमडा रोक्तोको, मा पावललाई उ त्वाप ङा बुमु ग्वाम्डी। लावो कोले सिपाहीका गुलाई रेप्थाल्लु़। पावलका रोमडा माम्चु़नीकु सिजेम दो़स्तु़म 17 सुलेम चङडा पावलका मेसिन्डाम यहूदीमिमकु ङाचो़मिमलाई येड्डु़मी। मेर्मिम खोम्सिम्डिमा गुका मेर्मिमनुङ र्वाक्ता, “वा-ल्वाकनी, गो ने त्वाकु मु़चु़मिम नुङ त्वाकु ङाउमिमका बेम्खेम्डिम डु़म्लाकु कोर्थो़लाम ने हाम वो बेउतोम मेबायावा। लावो यरूशलेमडा बट्ङिडिमी मा रोमीमिमकु ल्वाड्डा गोलाई ग्वाङ्डिमिम बु। 18 रोमीमिमका गोलाई हिलाहिसी बेङ्डिमी, मा सेन्मुका घ्रेट्पा ल्वा हाम वो मेडार्मिवामका गोलाई डिन्सोमु न बेम्डिम बाइडा। 19 लावो यहूदीमिम ने आमा कोर्थो़लाम बम्डिमका गो रोमी डोक्पु हप कैसरका आमा रिबुसी ल्वाकु दुथाम रेम्साङनु़ र्वाङ्डो। आमा त्वाकु मु़चु़मिमकु कोर्थो़लाम जेमु गोनुङ हाम वो ल्वा मेबायावा। 20 मेम्मिमका गो गानीनुङ घ्रो़म्मुमा ल्वा बोमुलाई येट्निनिम बु। हेङालोने इस्राएलीमिमका हाम ल्वापा न बेम्डिम बाइडा, मेरामडा थो़र लु़ङडोमका ओराम सेल रिवाका गो बन्सिङ्डोम बु।” 21 मेकोतिमा मेर्मिमका पावलनुङ र्वाम्डी, “गुकु ने इनीमा दुथाम यहूदियालामका कोले वो सेलाखाजेम डोर्तोकोम मिबु। इनीमा कोर्थो़लाम मेजो़पा ल्वा मेलाम रोक्पा सु़का वो आसिन्डा र्वाम्डिम, जेम्डिम मिबु। 22 लावो गानी हाम र्वामु माल्निमिम बु, मेराम थो़मु आकीमा न बु। हेङालोने ओराम दलकु कोर्थो़लाम खोत्लेका बान्तेमेनो जेम्बाल्मि र्वाक्पा कोङङा गुकु चकुमिम बु।” 23 मेकोतिमा मेर्मिमका पावलकु ल्वा थो़मु लागि कोलेम नेम घ्रो़म्सी र्वाबेम्डी। सेर्पा मु़चु़ पावल बाट्पाडा खोम्सिम्डी। पावल मेर्मिमनुङ नेमसोसोलो आथाम नेम गाम्डामसम्म ङा जेस्ता, मा गुका माम्चु़नीकु किब्दीकु दुथाम सीड्डु़मी, मा मेर्मिमलाई थो़र लु़बेन्मु नका येशूकु दुथाममिम ल्वा मोशाकु डु़म्ला नुङ माम्चु़नीलाम-जेपामिमकु खाजेमलाम सीड्डु़मी। 24 गुका र्वाक्ताम ल्वाडा याङ-याङका थो़रलु़म्डी, याङ-याङका थो़र मेलु़मिवा। 25 मेर्मिम उनी त्वाप-त्वापडा ङा गो फ दु़म्मिडी, मा मेलाम ब्र्वाम्सिमु खाप्मिडिलो मेर्मिमनुङ पावलका ओराम कोले ल्वा र्वाक्ता, “इनीमा ङाउ-खुउलाई माम्चु़नीलाम-जेपा यशैयाकु सिलामका माम्चु़नी-पेलका र्वाम्डिम ल्वा आच्छाङा रेछा: 26 ‘ओर्मिम मु़चु़मिमकाडा लक्सामा र्वाका, “गानी थो़मु ने थो़नी, लावो हेल्लो वो थेसिमेथेनी, रेमु ने रेम्नी, लावो हेल्लो वो मेल्वानी।” 27 हेङालोने ओर्मिम मु़चु़कु न-गो लुङ होप्माम दु़स्ताम बु, मा मेर्मिमकु नोफ्ला मेथो़पा दु़स्ताम बु, मा मेर्मिमका उनी मिक्सी क्रिम्मिडिम बु, मेएँ माला ने मेर्मिमका उनी मिक्सीका ल्वामिवा, नोफ्लाका थो़मिवा, न-गोका थेसिथेट्मिवा, मा ख्लोम्सिट्मिवा, मेम्मा गो मेर्मिमलाई सबेट्पुमिवा।’ 28 “मेम्मिमका गानी ओराम चनी, माम्चु़नीकाम सेल्सिक्पा ओराम सेला गुमीका वाङसामामिमकाडा थु़र्मिडिम बु, मा मेर्मिमका थो़मी।” 29 [पावलका आरे र्वाक्ताम चङडा यहूदीमिम उनी त्वाप-त्वापडा ङा ल्वालाम खाल्बेबेत्तो ब्र्वाम्सिम्डी।] 30 पावल खउलुङ सोक्साका बाट्पा नेमडा नक थ बाइडा, मा उमाडा रोक्पामिम खोत्लेलाई गेर्सिक्तो हुनाखाना बु़थाल्लु़मी। 31 पावलका मेङिसाका ङा माम्चु़नीकु किब्दीकु दुथाम मु़चु़मिमलाई थो़बेड्डु़मी, मा येशू ख्रीष्टकु दुथाम सीड्डु़मी, मा सु़का वो गुलाई मेम बोमुडाम मेभोप्मिवा। |
© Wycliffe Bible Translators, Inc. All rights reserved.
Wycliffe Bible Translators, Inc.