थु़र्मा 27 - थुलुङ राईकैसर हप बाट्पा रोम शहरडा पावल लस्ताम 1 दिरिदिनलामका गुकु इटालिया नेब्दी लमु बासी र्वाक्पा मुलु़ दु़स्ता। मेकोतिमा मेर्मिमका पावल नुङ याङ चक्मामिमलाई हप अगस्तकु सेनामिमगोडाम युलियस कप्तानकु ल्वाड्डा ग्वाम्डी। 2 मेकोतिमा गुकु एड्रामिटेनोस शहरलामका एशियाडाम बन्दरगाह मिमलाम दु़म्तो लक्पा कोले डोक्पु कुबी-बोक्साडला हुत्तोकोमा लाम्दित्तोको। माकेडोनियाडाम थेसलोनिके शहरडा बाट्पा अरिस्तार्खस वो गुकुनुङ बाइडा। 3 उ दिकाम गुकु सीदोन शहरडा लुक्तोको। युलियसका पावलडला न-थो़म रेम्बु़डु़मा पावल उ ङोप्सो़मिमकाडा थु़र्साका चाहेदु़म्पा ल्वामिम ख्लो़ला सो़सा बु़डु़। 4 मेकोतिमा मेलामका डोक्पु कुबी-बोक्सा लाम्दिमु चो़म्डु़, मा ब्लोजु़ गुकु लक्पा लाम्दीथो़ फुत्तोङा बु़डु़मका गुकु ब्लोजु़ मेफुट्पा साइप्रस टापुकु सो़पलाम लक्तोको। 5 गुकु मेराम ङा दिरिदिन दु़म्तो किलिकिया नुङ पामफिलिया रोक्थितोको, मा लुकियाकु कोङ शहर माइराडा रोक्फात्तोको। 6 मेसिन्डा कप्तान युलियसका अलेक्जेन्ड्रिया शहरलामका इटालिया नेब्दी लक्पा कोङ डोक्पु कुबी-बोक्सा डार्स्तु़मा मेरामडा गुकुलाई थु़र्सोक्तिकी। 7 गुकु लक्पा लाम्दीलाम ब्लोजु़ फुड्डु़मका गुकु हापा नेमङा वाखा-वाखावा लक्तोकोमा चाप्तो-मेचाप्तो क्नीडस शहर फार्डा रोक्थित्तोको। मेकोतिलो ब्लोजु़का आथावो ङादो लमु मेग्वाक्किवा। मेम्मिमका गुकु ब्लोजु़ मेफुट्पा क्रेट टापुकु सो़पलाम सालमोने फारभाल लक्तोको। 8 मेराम भाल चाप्तो-मेचाप्तो गुकु ‘जो़पा बन्दरगाह’ र्वाक्माडा रोक्फात्तोको। मेराम फार्डाङा लासिया शहर बाइडा। 9 गुकु छो़म छु़त्तोकोम बाइडा, मा डोक्पु कुबी-बोक्सालाम लमु वो छो़म ङिमलु़पा बाइडा। हेङालोने यहूदीमिमकु उपास बुमु चाडकु थारी वो हुक्ल्याड्डामका पावलका मेर्मिमलाई आरे र्वाक्तामा ङिमसाड्डु़मी, 10 “ङोप्सो़नी, ओराम डोक्पु कुबी-बोक्साडा ओम्लो गुइ लाम्दिइलो डोक्पु कुबी-बोक्सा नुङ ओराम गोडा बाट्पा हाम-हुम कोङङा ब्लाम-ब्लाम दु़म्पा मेएँ, गुइ इकी त्वाप ङा सिमु वो चाप्सी र्वाक्साका आमा ङिम लु़होम बु।” 11 लावो पावलका र्वाक्ताम ल्वाडा कप्तानका थो़रमेलु़साका डोक्पु कुबी-बोक्सा थो़पा नुङ डोक्पु कुबी-बोक्साकु मु़चु़का र्वाक्चिम ल्वाडा हापा थो़र बु़डु़। 12 ओराम बन्दरगाहडा जुनेमका बुमु मेझापामिमका हेसाका लोवो फोनिक्स शहरडा ङा रोक्थिसाका बुइ र्वाक्साका हापा सेर्पा मु़चु़का मेलामका डोक्पु कुबी-बोक्साडा लस्ल्याडी र्वाम्डी। मेकोतिमा जु थारीका मेसिन्डा बाम्डी। क्रेट टापुडाम कोले बन्दरगाह फोनिक्स बु, मेराम रायला-पश्चिम नुङ उत्तर-पश्चिमथो़ ख्लोसिक्पा बु। दिरिदिनडा ब्लोजु़ फोड्डु़म 13 रायलालामका जु वाखावा फुन्मु चो़म्डु़। मेर्मिम खोत्लेका आथा ने गुइ लमु चाप्सी र्वाक्पा मिम्सिसाका मेर्मिमका हाम्बेट्मिडिमा जु़ल्मिडिम लङ्गर थाट्मिडी। मेकोतिमा डोक्पु कुबी-बोक्सा क्रेटकु सो़पभाल थो़मु चो़म्मिडी। 14 लावो घरिकोङका मे क्रेट टापुलामका “जेजु़-नेप्सुङ ओपालाम” र्वाक्मा छो़म डोक्पु ब्लोजु़ फुड्डु़। 15 मे ब्लोजु़का डोक्पु कुबी-बोक्सा बोहुप्डु़, मा मेरामकु ङादोडा गुकु हाम वो बोमु मेचाप्कुवामका डोक्पु कुबी-बोक्सा बान्ते ल लनु़ र्वाक्तोकोमा डिसोक्तोको। 16 क्लौडा र्वाक्मा ब्लोजु़ मेफुट्पा कोले याक्के टापु फार्डा लुक्तोको, मा गुकु डोक्पु कुबी-बोक्साडाम याक्के कुबी-बोक्सालाई र्वाप्डा सित्तो थु़साका डोक्पु कुबी-बोक्साडला जु़ल्मु चाप्तोको। 17 मेर्मिमका मेरामलाई थुट्मिडिमा डोक्पु कुबी-बोक्साडला जु़ल्साका कोङ डोक्पु रिवाका डोक्पु कुबी-बोक्साकु हानोलाम आथो़लाम बट्मिडी। मेम्मा सिरिटस र्वाक्मा सेक्रेधेप्देडा क्रोसि र्वाक्पा ङिमका मे लङ्गर धाली डम्सोम्डी, मा डोक्पु कुबी-बोक्सा उ त्वाप ङा लमु चो़म्डु़। 18 ब्लोजु़का गुकुलाई कोक्तिकिमा लेप्ले बोमु चो़म्तिकी, मा उ दिकाम मेर्मिमका डोक्पु कुबी-बोक्साडा बाट्पा मोमसोजाममिम घ्रोमु चो़म्मिडी। 19 उ नहाद्दामनेम डोक्पु कुबी-बोक्सा थो़मु चाहेदु़म्पा मोमसोजाममिम उनी त्वाका ङा घ्रोम्डी। 20 हापा नेम ङा नेप्सुङ नुङ सोरलुङ हाम वो मेल्वाकुवा। ब्लोजु़ छो़म फुड्डु़म-फुड्डु़मका गुकु सेल्सिमु वो हुक्ताम रेछा र्वाक्पा मिम्सिक्तोकोम बाइडा। 21 मेर्मिम हापा नेम ङा हाम वो मेपेसाका बाम्डिम बाइडा। मेकोतिमा पावलका मेर्मिमकु ङादोडा येम्स्तामा आरे र्वाक्ता, “ङोप्सो़नी, गानी गो र्वाङडोम थो़निवामा क्रेट टापुलाम डोक्पु कुबी-बोक्सा मेथो़निवा माला, गानी आरेप्माम दु़खा मेल्वानिवा मा इनीमा हाम वो मेदाम्सावा। 22 लावो ओम्लो गो गानीनुङ र्वाङु, मेङिनी, डोक्पु कुबी-बोक्सा ज लोवो गानीगोडा उहेम वो हाम वो मेदु़म्नी। 23 हेङालोने गो सो़रलोले बेउमिम आमा माम्चु़नीकु उनी पाह्रीचो़ बासिन्था आमाडा रोक्ता, 24 मा गोनुङ र्वाक्ता, ‘मेङिसा पावल, गाना रोमी हप कैसरकु ङादोडा येम्सिमु ङा बासी, मा गाना बुनामिमका गानानुङ लक्पा खोत्लेलाई माम्चु़नीका सेल्निमी।’ 25 मेम्मिमका ङोप्सो़नी मेङिनी, माम्चु़नीका गोलाई हे र्वाम्डिम बु, मेम ङा बोमी र्वाक्पा गो थो़र लु़ङु। 26 लावो गुइ हुङ्डिम डोक्पु कुबी-बोक्सा ने कोले टापुडा दुडु़मा ज।” डोक्पु कुबी-बोक्सा जस्ताम 27 गुकु मेम्साका को-ब्ल (१४) सिन्था भाल-आथो़ दु़म्तोकोम बाइडा, मा एड्रियास र्वाक्मा मेरामङा दिरिदिनडा उन्सिक्तो लेत्तोको। मेकोतिमा सिन्थाबिलि डोक्पु कुबी-बोक्सा थो़पामिमका गुइ कोङनिम बायफार्डा रोम्थिमु खाप्डिमिम बु र्वाक्पा मिम्डिम बाइडा। 28 मेकोतिमा मेर्मिमका कु थो़प्मिडिलो सु-येत (३७) मिटर घ्लु़म्पा डार्मिडी, मा किचो़ होनोक्थो़ लम्डिमा थो़प्मिडिलो नक-रु (२६) मिटर डार्मिडी। 29 मेकोतिमा कोङनिम दिप्लुङडला डोक्पु कुबी-बोक्सा दुडु़ र्वाक्पा ङिमका मेर्मिमका डोक्पु कुबी-बोक्साकु चङलाम ब्लले लङ्गर डम्डी, मा नेम्सोनु़ र्वाक्साका सो़म्दी बोमु चो़म्मिडी। 30 मेकोतिलोङा डोक्पु कुबी-बोक्सा थो़पामिमका ङादोनोम लङ्गर डक्पा लिम्सिम्डिमा याक्के कुबी-बोक्सालाई डोक्पु कुबी-बोक्सालामका डक्साका स्वामु माल्मिडी। 31 पावलका कप्तान नुङ सिपाहीमिमलाई र्वाक्ता, “ओर्मिम मु़चु़ डोक्पु कुबी-बोक्सागोनो मेबामिवा माला गानी सामनुङमा मेदु़म्नी।” 32 सिपाहीमिमका मेराम याक्के कुबी-बोक्सा बट्मा रिवा क्रिम्साम्डी, मा डिन्सोम्डी। 33 नेमसोमु खाप्डु़म बाइडा। पावलका मेर्मिम खोत्लेलाई पेनी-डुनी बु़डु़मी। गुका र्वाक्ता, “गानी इनीमा लो़ दाम्स्तामका हाम वो मेपेसाका मान्जाङा बुनिमिम आनेप को-ब्ल (१४) नेम दु़म्मु दु़म्स्तु़म बु। 34 मेम्मिमका गानी हाम-हुम पेनी र्वाङु। हाम-हुम पेन्नी माला इनीमा सो बेडु़, मा गानीगोडा सु़काम वो कोरिप सेम वो मेआल।” 35 आकोति र्वाक्तामा पावलका सो़बेम झेड्डु़, मा खोत्लेकु ङादोडा माम्चु़नीलाई आलासो़ ग्वाक्साका चस्तु़मा पोमु चो़म्डु़। 36 मेकोतिमा उनी सो हन्डामा मेर्मिमका वो हाम-हुम पोमु चो़म्मिडी। 37 (डोक्पु कुबी-बोक्साडा गुकु न सङ येत-रुले (२७६) बात्तोको) 38 मेर्मिमका खोहोम पेम्डी, मा डोक्पु कुबी-बोक्सा फाप्तेर्मा दु़म्बेन्मु मेगोनोम जेप्सेर दिरिदिनगोयु़ पार्मिडी। 39 नेम्सोङडामा दिरिदिनकु सो़प ल्वाम्डी, लावो डोक्पु कुबी-बोक्सा थो़पामिमका छेमु मेचाप्मिवा। दिरिदिनकु फार्डा सेक्रेधेप्दे बेट्पा ल्वाम्डी, मा मेर्मिमका डोक्पु कुबी-बोक्सा मेनो ङा रेन्थिमु न बेम्डी। 40 मेर्मिमका लङ्गर डम्डिमा दिरिदिनगोयु़ ङा डिन्सोम्डी। मेकोतिलोङा कुबी-बोक्सा थो़खोप कोर्चो़ममिम बन्थाट्मा रिवा फ्रोम्डी। मेकोतिमा ङादोनोम पाल फम्डिमा ब्लोजु़थो़ हिम्डी, मा डोक्पु कुबी-बोक्सा दिरिदिनकु सो़पथो़ लमु चो़म्मिडी। 41 लावो नले दिरिदिन ङोल्सिखोपडा डोक्पु कुबी-बोक्सा दुड्डु़मा क्रोसिड्डा। डोक्पु कुबी-बोक्साकु बुइ हाप्डु़मा दोमुङा मेचाप्सु़वा, मा डोक्पु कुबी-बोक्साकु मेर ने कुकु बाबारिमका याक्तु़मा जमु चो़म्डु़। 42 चक्मामिम वाकु बेसाका स्वामी र्वाक्साका सिपाहीमिमका मेर्मिमलाई सेन्मु मुलु़ बेम्डी। 43 लावो कप्तानका पावललाई बोमु-थार्मु न बु़डु़मका सिपाहीमिमलाई मेम बोमुडाम भोप्डु़मी। मेकोतिमा वाकु बोमु थेट्पा-थेट्पा ङादोङा डोक्पु कुबी-बोक्सालामका प्रोक्निमा पाखानो लुक्नी बु़डु़मी। 44 मेकोतिमा मेमका लमु मेचापामिम ने सङडलामका नुङ डोक्पु कुबी-बोक्साकु फ्वाक्चो़लमिमलामका होम्बु लक्नी बु़डु़मी। आरेसाका खोत्लेङा हे वो मेदु़म्साका दिरिदिनकु होम्बुनो लुम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.