थु़र्मा 18 - थुलुङ राईपावल कोरिन्थ शहरडा 1 मेकोतिमा पावल एथेन्सलामका कोरिन्थ शहरडा लस्ता। 2 गुका मेसिन्डा पोन्टसडा बाट्पा अकिलास र्वाक्मा यहूदीलाई डार्रु़। हप क्लौडियसका खोत्ले यहूदीमिमलाई रोमलामका लुनिमा लक्नी बु़डु़मिमका अकिलास उ नाइमे प्रिस्किलानुङ इटालियालामका रोक्चिम बाइडा। पावल मेर्चिपनुङ घ्रो़म्डा लस्ता, 3 हेङालोने पावल वो मेर्चिप होप्माम ङा पाल बनेबेपा मु़चु़ बाइडा, गु मेर्चिपनुङ बासाका कोयोङा खारी बु़डु़। 4 ङेम्सिमु-ङेम्सिमुनेमका पावल घ्रो़म्दीनेमडा लस्ता, मा यहूदीमिम नुङ ग्रीकमिमलाई जो़होमका येशूकु दुथाम सीत्तो थेसिथेन्बेथाल्लु़मी। 5 सिलास नुङ तिमोथी माकेडोनियालामका रोक्फाट्ची, मा पावलका हेल्लो लोवो माम्चु़नीकु सिजेम कोङङा दो़स्तु़होम बाइडा। गुका यहूदीमिमलाई येशू ङा ख्रीष्ट र्वाक्पा सीड्डु़मी। 6 लावो मेर्मिमका पावलकु ल्वा मेथो़मिवामा उ कोर्थो़लाम बम्डी। मेकोतिमा गुका उ येड्डाम फुर्कु थेप्तो आरे बु़डु़मी, “खोत्ले इनीमा मेजो़पा खारीमिम इनीमा बुइडला ङा बुसिनु़, गो देन्दे मेल्वाउनु़। आथाडा आरे गो वाङसामामिमकाडा लङु सो़।” 7 मेकोतिमा पावल मेलामका लुक्तामा घ्रो़म्दीनेमकु फार्डा बाट्पा माम्चु़नीकु सो़रलोले बेपा तीतस युस्तसकु नेमडा लस्ता। 8 मे घ्रो़म्दीनेमडाम साखामचो़ क्रिस्पस नुङ उ नेमडाममिम खोत्लेका येशूडा थो़र लु़म्डी। कोरिन्थ शहरडाम मु़चु़मिमका वो हापाका पावलकु सिजेम थो़साका येशूडा थो़र लु़म्डिमा कु-रु़दु़म रम्डी। 9 कोङ सिन्था मिक्सीलामडा पावललाई ङाचो़ येशूका र्वाम्डी, “मेङिसा, जेत्तो लक्सा, मा लिबा मेबाया, 10 हेङालोने गो गानानुङ बुङु। सु़का वो गानालाई हाम वो बोमु मेचाम्नामी। ओराम शहरडा आमा मु़चु़मिम हापा ङा बुमी।” 11 मेकोतिमा पावल कोरिन्थ शहरडा माम्चु़नीकु सिजेम सीत्तो को-लेत (१८) मुनामसम्म मेर्मिमनुङ बाइडा। 12 रोमी गलियोन अखैयाडाम डोक्पु साखामचो़ दु़स्ताम थारीका खोत्ले यहूदीमिम कोले दु़म्मिडी, मा पावललाई चु़म्साका अदालतडा रेट्मिडी, 13 मा र्वाम्डी, “ओरामका मु़चु़मिमलाई माम्चु़नीकु सो़रलोले बोमु इकीमा डु़म्लानुङ मेघ्रो़म्पा वाङमिमङा ल्वा सीत्तो लेडु़मिम बु।” 14 पावलका जेमु ङा खाप्डु़म थारीका गलियोनका मे यहूदीमिमलाई बु़डु़मी, “यहूदीनी, ओराम मु़चु़का कोङनिम मेजो़पा खारी नुङ छो़म मेजो़पा ख्लाम्या बु़वाम माला ने गो इनीमा ल्वा थो़उवा, 15 लावो सिजेममिम, नङमिम नुङ इनीमा त्वाकु डु़म्लाकु दुथाममिम ङा ल्वा लुक्तामका गानी इनी त्वाका ङा हाम बोनी लोवो बेनी। ओराम ल्वाडा गो हाम वो मेबेउ।” 16 आरे बु़डु़मिमा गलियोनका मेर्मिमलाई मे अदालतलामका खासोड्डु़मी। 17 मेकोतिमा मेर्मिम खोत्लेका घ्रो़म्दीनेमडाम ङाउ सोस्थेनेसलाई चु़म्मिडिमा अदालतकु ङादोडा ङा याल्मिडी। लावो गलियोनका मेराम ल्वाथो़ हाम वो न मेसोकु़वा। पावल सिरियाडाम एन्टिओखियाडा ख्लोस्ताम 18 मेकोतिमा पावल कोरिन्थ शहरडा थो़रलु़पामिमनुङ हापा ङा बाइडा। थो़रलु़पामिमनुङ ब्र्वासिड्डामा अकिलास, प्रिस्किलानुङ गु डोक्पु कुबी-बोक्साडा हुङडामा सिरियाथो़ लस्ता। लावो लमु ङादो पावलका माम्चु़नीनुङ कोङनिम ल्वाडा याचे जेस्ताम बाइडा, मेम्मिमका गुका किंक्रियाडा उ सेम खुर्रु़। 19 मेकोतिमा मेर्मिम एफिसस शहरडा रोम्फाम्डी, मा पावलका अकिलास नुङ प्रिस्किलालाई मेसिङा पार्जो़ल्लु़ची। पावल उ त्वाप ने घ्रो़म्दीनेमडा लस्तामा यहूदीमिमलाई सिजेमकु दुथाम थेसिथेन्होम सीड्डु़मी। 20 मेर्मिमका पावललाई आथावो कोलेम-नलेम गुकुनुङ बानी र्वाम्डिम-र्वाम्डिमङा बेम्डी, लावो पावल मेबिसावा। 21 मेर्मिमनुङ ब्र्वासिड्डालो पावलका आरे र्वाक्ता, “माम्चु़नीकु न होङ्ङा दु़स्ता माला, आथावो गो गानीनुङ घ्रो़म्डा रोङु।” मेकोतिमा गु डोक्पु कुबी-बोक्साडा हुङडामा एफिसस शहरलामका लस्ता। 22 पावल कैसरियाडा रोक्फाड्डामा यरूशलेमथो़ लस्ता। मेम्मा मेसिन्डाम थो़रलु़पामिमनुङ सेव साबेम्डिमा गु एन्टिओखिया शहरथो़ लस्ता। 23 एन्टिओखियाडा कोलेम-नलेम बाइडामा पावल गलातिया नुङ फ्रिगिया दु़म्तो खोत्ले थो़रलु़पामिमकु सो हन्बेत्तो, खोत्लेथो़ खिर्सिड्डा। एफिसस शहरडा अपोल्लोस 24 मेराम थारीका अलेक्जेन्ड्रिया शहरडा गक्पा अपोल्लोस र्वाक्मा कोले यहूदी एफिससडा रोक्ता। गु जो़होमका जेमु थेट्पा, मा माम्चु़नीकु सिजेमकु दुथाम छो़म थेट्पा मु़चु़ बाइडा। 25 गुका ङाचो़काम लाम्दीकु दुथाम जो़होमका थेड्डु़म बाइडा, मा गुका थेड्डु़म येशूकु दुथाममिम ल्वा वाङमिमलाई वो उ सो हन्तो जो़होमका सीथाल्लु़मी। लावो यूहन्नाका सीड्डु़मिम कु-रु़दु़मकु दुथाम कोङङा गुका चडु़म बाइडा। 26 अपोल्लोस घ्रो़म्दीनेमडा मेङिसाका जेमु चो़म्डु़। गुका जेस्ताम ल्वा प्रिस्किला नुङ अकिलासका थो़च्ची, मा गुलाई उची नेमडा येट्ची। मेकोतिमा मेर्चिपका गुलाई माम्चु़नीकु लाम्दीकु दुथाममिम ल्वामिम मेरामडाम वो जो़होमका सीट्ची। 27 मेकोतिमा अपोल्लोस अखैयाडा लमु न बु़डु़। एफिससडा बाट्पा थो़रलु़पामिमका गुलाई लमु उ सो हन्बेन्साम्डी, मा अपोल्लोसलाई रनी र्वाक्साका मेसिन्डाम सीसिपामिमलाई कोले सेलाखाजेम वो र्याम्सोम्डी। अखैयाडा रोक्थिड्डामा गुका माम्चु़नीकु दिदामका येशूडा थो़रलु़पामिमलाई छो़म ख्लो़यु़डु़मी। 28 हेङालोने गुका माम्चु़नीकु सिजेमलामका जेस्तामा येशू ङा ख्रीष्ट र्वाक्पा ल्वा रेम्बु़डु़, मा यहूदीमिमलाई खोत्लेकु ङादोडा ल्वालाम खाल्तो हाम र्वामु-र्वामु दु़म्बेड्डु़मी। |
© Wycliffe Bible Translators, Inc. All rights reserved.
Wycliffe Bible Translators, Inc.