थु़र्मा 17 - थुलुङ राईथेसलोनिके शहरडा पावलका सिजेम दो़स्तु़म 1 पावल नुङ सिलास अम्फिपोलिस नुङ अपोल्लोनियालामका थेसलोनिके शहरडा रोक्ची। मेसिन्डा यहूदीमिमकु कोले घ्रो़म्दीनेम बाइडा। 2 उ बादु़खाम होम्साका पावल घ्रो़म्दीनेमगोनो हुङ्डा, मा सु ङेम्सिमुनेमसम्म मेर्मिमलाई सीत्तो मेसिन्डा बाइडा। गुका माम्चु़नीकु सिजेमलामका, 3 ख्रीष्टका दु़खा ल्वासाका सिम्डी। मेम्मा सिमुलाम बम्गेम्डी र्वाक्पा मेर्मिमनुङ रेम्बु़डु़। मेकोतिमा गुका र्वाक्ता, “ख्रीष्टकु दुथाम गो गानीनुङ सो़उहोम बुङुमिम गुमी येशू ङा सो़।” 4 मेर्मिमगोडाम कोङ-कोङका थो़र लु़म्डी, मा पावल, सिलासनुङ लाम्दिम्डी। छो़म सेर्पा माम्चु़नीकु-ङिम जु़ल्पा ग्रीक मु़चु़मिम नुङ कोले-नले डोक्पु मेसेममिम वो लाम्दिम्डिम बाइडा। 5 लावो वाङमिम यहूदीमिमका ने मेर्मिमडला उनी नाचु़रका बजारबाडेम ङाल्पामिमलाई खोप्साका शहरडा ङाल्बेट्मिडी। पावल नुङ सिलासलाई सेर्पा मु़चु़मिमकु ङादोडा रेन्मुमा येम्सिबेन्मु लागि मेर्मिम यासोनकु नेमथो़ लम्ल्याम्डी। 6 पावल नुङ सिलासलाई मेसिन्डा मेडार्मिवामका मेर्मिमका यासोन नुङ कोङ-कोङ थो़रलु़पामिमलाई शहरडाम साखामचो़मिमकाडा येत्तो रो़-रो़न्थु़त्तो रेट्मिडी, “सु़म्दिसेरडा खोत्लेथो़ ब्लो़ब्बाल्पा पावल नुङ सिलास आसिन्डा वो रोक्फाम्चिम बु। 7 ओ यासोनका मेर्चिपलाई उ नेमडा येड्डु़चिम रेछा। मेर्चिपका रोमी हपका र्वामिम मेथो़साका येशू र्वाक्मा वाङमी ङा हप बुमी र्वाची।” 8 ओराम थो़म्डिमा मु़चु़मिम नुङ शहरडाम साखामचो़मिम उनी छोक्चोका हाम बोमु-बोमु दु़म्मिडी। 9 मेर्मिमका यासोन नुङ गुनुङ बाट्पा वाङमिम थो़रलु़पामिमलाई धरौटी सोबेट्मिडिमा डिट्मिडी। पावल बेरियाडा 10 थो़रलु़पामिमका पावल नुङ सिलासलाई सिन्थाङा बेरिया शहरथो़ थु़र्थाम्डिची, मा मेर्चिप मेसिन्डा लुक्चिमा यहूदीमिमकु घ्रो़म्दीनेमगोडा लक्ची। 11 मेर्मिमका माम्चु़नीकु सिजेम छो़म गेर्सी द्वाक्तो थो़म्डिमा पावलका र्वाक्ताम ल्वा आछाङा डे मेएँ र्वाक्साका हेल्लो लोवो माम्चु़नीकु सिजेम डासाका थेन्मु माल्थाल्मिडी। 12 मेम्मिमका ओर्मिमगोडाम हापाका येशूडा थो़र लु़म्डी। मेकोतिमा नङ धोपा ग्रीक मेसेममिम नुङ ग्रीक वोस्चो़मिम वो हापाका येशूडा थो़र लु़म्डी। 13 लावो पावलका बेरियाडा वो माम्चु़नीकु सिजेम दो़सु़म बु र्वाक्पा थेसलोनिकेडाम यहूदीमिमका थो़म्डी। मेकोतिमा मेर्मिम मेसिन्डा वो रोम्डी। मेम्मा सेर्पा मु़चु़मिमलाई सिल्साका पावलकु कोर्थो़लाम फम्डी। 14 मेम्मिमका थो़रलु़पामिमका पावललाई दिरिदिनकु सो़पथो़ थु़र्थाम्डी, लावो सिलास नुङ तिमोथी ने मेसिङा बाच्ची। 15 पावललाई सोक्थिड्डा लक्पामिमका गुलाई एथेन्सडा रेट्मिडी। मेसिन्डा रोक्थिड्डामा उ त्वापलाई सोप्डा रोक्पामिमनुङ पावलका सिलास नुङ तिमोथी दालाङा रोचिनु़ र्वाक्पा सेला थु़र्सोड्डु़। पावलका एथेन्सडा सिजेम दो़स्तु़म 16 पावलका एथेन्सडा सिलास नुङ तिमोथीलाई लथाड्डु़चिलो मेराम शहरडा बान्तेमेनो ङाटा कोङङा बाइडाम ल्वास्तु़मका छो़म उ न-गो ख्राप्डा। 17 मेम्मिमका पावलका यहूदीमिम नुङ माम्चु़नीकु ङिम जु़ल्पा ग्रीकमिमलाई घ्रो़म्दी नेमडा ल्वालामका खाल्थाल्लु़मी। मेम्साका ङा बजारबाडे क्रो़म्डु़मिम मु़चु़लाई वो हेल्लो लोवो ल्वालामका खाल्थाल्लु़मी। 18 इपिक्युरी नुङ स्तोइकी र्वाक्मा नले समूहडाम नेप्चीनुङमा कोङ-कोङ मु़चु़मिम बाम्डी। मेर्मिम आच्छाङाकाम ल्वा नुङ त्वारो़मकु दुथाम मिम्पा, माल्पा मा सीपा दार्शनिक बाम्डी। मेर्मिमका पावललाई वाङ-वाङ ल्वामिमलाम छो़म खाल्मिडी। मेर्मिमगोडाम कोङ-कोङका आरे र्वाम्डी, “हाम सो़यु़मिम ओ उ न ना थो़म जेपाका?” वाङमिमका र्वाम्डी, “ओरामका ने विदेशी नो़पमिमकु दुथाम डे सो़त्तोङा बु़मिम रो ओ!” हेङालोने पावलका येशू नुङ सिमुलाम बग्गेट्पाकु दुथाम सो़यु़डु़म बाइडा। 19 मेर्मिमका पावललाई अरियोपागस र्वाक्मा शहरडाम डोक्पु घ्रो़म्दीडा लम्डी, मा हिलाहिसी बेम्डी, “ओ लाले सीसिकु दुथाम गुकुनुङ सो़नीका। 20 हेङालोने हेल्लो वो मेथो़कुवाम ल्वामिम गानीलाम गुकु थो़त्तोङा बोकु। मेम्मिमका ओर्मिम खोत्ले ल्वामिमकु दुथाम थेसिथेन्मु आकी न बु।” 21 खोत्ले एथेन्सडा बाट्पामिम नुङ वाङमिम नेब्दीलामका एथेन्सडा बाप्डा रोक्पामिमका हेल्लो वो मेथो़मिवाम लाले ल्वामिम जेमु नुङ थो़मुडा कोङङा नेम्ताली न सोम्थाल्मिडी। 22 पावलका अरियोपागस घ्रो़म्दीकु ङादोडा येम्स्तामा र्वाक्ता, “एथेन्सडा बाट्पा वा-ल्वाकनी, गानी इनीमा नो़पमिमकु सो़रलोले खोत्लेडा बोनिमिम गो ल्वानिनी। 23 ओराम शहरडा खिर्सिङडोलो इनीमा नो़पखोममिम वो रेप्तो। कोङ सासेन्खोप खोमडा ‘उ नङ मेचमा नो़पकाम लागि’ र्वाक्साका र्याक्मा बाइडा। गानी मेछेसाका ङा सेव साट्निम मेराम नो़पकु दुथाम ओम्लो गो सो़त्तोङा बेउ। 24 “सुबु नुङ मेगोडा बाट्पामिम खोत्ले प्रङपा माम्चु़नी गुमी ङा सो़। गुमी सुबु नुङ पाह्रीकाम मिप्रङमा सो़, मेम्मिमका मु़चु़का बनेबोमिम सो़रनेमडा मेबुमी। 25 मु़चु़मिमका ग्वामिमिम हाम वो गुमीका चाहेमेबोमी। गुमीका ने मु़चु़मिमलाई त्वारो़म, साम नुङ चाहेदु़म्पा खोत्लेङा ग्वामी। 26 माम्चु़नीका कोले मु़चु़लामका ङा सुबुडा बाट्पा खोत्ले सामामिम प्रङ्मिडी, मा मेर्मिम हाम्सिसम्म बान्ते बुमु बासी र्वाक्पा गुमीका ङादो मुलु़ बेम्डिम बु। 27 मु़चु़मिमका गुमीलाई माल्मिनु़, मा मोप्साली बेत्तो गुमीलाई डार्मी डे र्वाक्साका आरे बेम्डिम सो़। मेम ङा लोवो गुमी गुइ सु़डाम वो होनोवा मेबुमी। 28 हेङालोने, ‘गुइ गुमीडा बुइ, गुमीडा दोसी, मा गुमीडा दु़प्सी।’ गानीगोडाम इनी कुरुवाचो़मिमका वो आरे र्वाम्डिम बु, ‘गुइ उनीमाङा चो़-चु़सु़मिम सो़।’ 29 “मेम्मिमका गुइ माम्चु़नीकु चो़-चु़सु़ दु़स्तिमका, सो़ना, मत्तो नुङ लुङलामका मु़चु़कु ल्वाका बनेबेम्मा मेराम ङाली होप्माम माम्चु़नी बुमी र्वाक्पा गुइ मिम्सी मेनु़। 30 ङादोम थारीबिलि गुइ माम्चु़नीलाई मेचक्साका मेथेसाका बिइडिम ल्वाडा माम्चु़नीका न मेसोक्मिवा। लावो गुमीका आथा ने खोत्लेथो़ बाट्पा खोत्ले मु़चु़मिमलाई उनी छु़लमिमलामका ख्लोसिमिनु़ र्वाम्डिम बु। 31 हेङालोने माम्चु़नीका उनी त्वाका ङा थुट्मीडिम येशूलामका सुबुडा बाट्पा मु़चु़मिमकाम जो़होमका निया दु़म्पा कोङ थारी जु़ल्मिडिम बु, मा गुमीलाई सिमुलामका फम्डिमा खोत्ले मु़चु़मिमलाई ओराम आच्छाङा र्वाक्पा रेम्बेम्डिम बु।” 32 मेर्मिमका सिमुलाम बम्गेमुकु दुथाम थो़म्डी, मा याङ-याङका पावललाई रिम्साम्डी। लावो वाङमिमका ने “गुकु ओरामकु दुथाम आथावो थो़कु” र्वाम्डी। 33 मेकोतिमा पावल मेलामका लस्ता। 34 मेकोतिलो कोङ-कोङ मु़चु़मिमका येशूडा थो़र लु़म्डी, मा पावलनुङ लाम्दिम्डी। मेर्मिमगोडाम मे अरियोपागस घ्रो़म्दीडाम डियनुसियस, दामारिस र्वाक्मा कोङ मेसेम नुङ वाङमिम वो बाम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.