थु़र्मा 14 - थुलुङ राईआइकोनियन शहरडा पावल नुङ बारनाबास 1 पावल नुङ बारनाबास कोयोङा आइकोनियनडाम यहूदीमिमकु घ्रो़म्दीनेमडा लक्ची। मेसिन्डा मेर्चिप छो़म जो़पा जेच्चिमका छो़म सेर्पा यहूदीमिम नुङ ग्रीकमिमका येशूडा थो़र लु़म्डी। 2 लावो थो़र मेलु़पा यहूदीमिमका ने वाङसामामिमलाई थो़रलु़पामिमकु कोर्थो़लाम कोम्डिमा थो़रलु़पामिमकु न खेबेट्मिडी। 3 मेसिन्डा पावल नुङ बारनाबास येशूकु दुथाममिम सिजेम मेङिसाका जेत्तो हापा ङा बाच्ची। मेम्मा येशूका मेर्चिपलाई उनीमा यु़म ग्वाम्डी। मेलामका हेल्लो वो मेल्वामिवाम खारीमिम नुङ छेखोपमिमका मेर्चिपका जेच्चिम दिदामकु सिजेम आच्छाङा र्वाक्पा रेम्बेम्डी। 4 लावो मेराम शहरडाम मु़चु़मिमगोडा गो फ दु़स्ता। मेकोतिमा याङ यहूदीमिमलाम मा याङ पावल नुङ बारनाबासलाम बाम्सिम्डी। 5 वाङसामा नुङ यहूदीमिमका उनी साखामचो़मिमनुङ दु़म्साका थु़र्माचिपलाई दु़खा ग्वामु नुङ लुङका ओम्मुमा सेन्मु माल्मिडी। 6 मेर्चिपका ओराम ल्वा थो़च्चिमा लुकोनियाडाम लुस्त्रा शहर, डर्बी शहर नुङ होनो-आथो़म देलबाडे स्वाच्ची। 7 मेसिन्डा वो मेर्चिपका येशूकु दुथाममिम जो़पा-सेला थो़बेच्चिम बाच्ची। लुस्त्रा नुङ डर्बी शहरडा पावल नुङ बारनाबास 8 लुस्त्रा शहरडा गस्तालोम ङा उ खेल ब्लेट्पा कोले मु़चु़ बाइडा। मेरामका हेल्लो वो लाम्दिमु चाप्स्तु़म मेबायावा। 9 पावलका जो़पा-सेला दो़स्तु़म मेरामका थो़स्तु़होम बाइडा। पावलका मेरामलाई रेप्डु़म-रेप्डु़म ङा बु़डु़, मा सपा मेरामकु थो़र ल्वास्तु़। 10 मेम्मा डोक्पु लो़लामका र्वाक्ता, “इ खेलका येम्सा।” मेकोतिमा मेराम हुबक्तामा लाम्दिमु चो़म्डु़। 11 पावलका बु़डु़म ओराम खारी सेर्पा मु़चु़मिमका ल्वाम्डिमा मेर्मिमका लुकोनिया ल्वाडा डोक्पु लो़लामका आरे र्वाम्डी, “नो़पमिम मु़चु़ लिम्सिम्डिमा इकीमाडा योम्डी रेछा।” 12 मेर्मिमका बारनाबासलाई जिउस नो़प र्वाम्डी, मा पावललाई ने हर्मेस नो़प र्वाम्डी। हेङालोने पावल ङा जेपामिमडाम डोक्पु मु़चु़ बाइडा। 13 शहरकु ङादोडा बाट्पा जिउस नो़पकु सो़रनेमडाम डु़म्लाचो़का शहरडाम डोक्पु लाम्चोकोमिमडा बेनोमिम नुङ बुङमा समामिम रेड्डु़मा, मेसिन्डाम मु़चु़मिमनुङ कोदेप दु़म्साका थु़र्माचिपकाम लागि सासेन्मु न बेम्डी। 14 लावो बारनाबास नुङ पावलका ओराम ल्वा थो़च्चिमा उची ये आ़क्चिमा आरे र्वाक्तो येत्तो मे सेर्पा मु़चु़मिमकाडा ओन्तो लक्साका र्वाक्ची, 15 “वा-ल्वाकनी, गानी हेङा आरेप्माम खारी बोनिमिम? गुचुकु वो गानी होप्माम मु़चु़ ङा सो़। हाम ना हामकु ल्वामिमलामका आच्छाङाकाम माम्चु़नीडा ख्लोमु जो़पा-सेला गानीनुङ सो़प्डा गुचुकु रोक्चोकोम सो़। सुबु, धामु, दिरिदिन नुङ मेगोडा बाट्पामिम खोत्ले गुमीका ङा प्रङ्मिडी। 16 ङादोम थारीबिलि माम्चु़नीका खोत्ले सामामिमलाई त्वा-त्वाहोम उनी न होम्साका ङा बुमु-दोमु ग्वाम्डिमिम बाइडा। 17 लावो माम्चु़नीका उनी न-थो़म मेर्मिमडला रेम्बेसाका गुमी बाम्डी र्वाक्पा ल्वा रेम्बेम्डी। गुमीका धामुलामका व थु़र्मिडिमा खोत्ले मा-के थारी-थारीका सिन्बेट्मिडी, मा हापा छो़म पोमु-डुमु ग्वाक्साका मु़चु़मिमकु न-गो गेर्सिबेट्मिडिम बु।” 18 आरे र्वाक्चिमा पावल नुङ बारनाबासका मे मु़चु़मिमलाई सासेन्मुलामका मेझाम्होमका ख्लोक्चिमी। 19 मेकोतिमा एन्टिओखिया शहर नुङ आइकोनियन शहरलामका यहूदीमिम रोम्डी, मा पावलकु कोर्थो़लाम बमु मे मु़चु़मिमलाई लेम्मिडी। मेर्मिमका पावललाई लुङका ओप्मिडी, मा सिडा र्वाक्पा मिम्सिम्डिमा शहरकु पाखाथो़ थु़त्तो लम्डी। 20 लावो थो़रलु़पामिम पावलकु होनोलाम-आथो़लाम खोम्सिम्डिलो गु बक्ता, मा शहरथो़ ख्लोम्सिम्डी। उ दिकाम नेम गु नुङ बारनाबास डर्बी शहरथो़ लक्ची। सिरियाकु एन्टिओखिया शहरडा ख्लोसिक्चिम 21 पावल नुङ बारनाबासका मेराम शहरडा जो़पा-सेला थो़बेच्चिमिमा सेर्पा सीसिपामिम दु़म्बेट्चिमी। मेकोतिमा मेर्चिप लुस्त्रा, आइकोनियन शहर नुङ पिसिदियाकु एन्टिओखिया शहरडा ख्लोसिक्ची। 22 मेसिन्डा मेर्चिपका थो़रलु़पामिमलाई उनी थो़र बर्बेसाक्चिमी, मा उनी थो़रलु़सीडा सो हन्बेट्साक्चिमी। मेर्चिपका र्वाक्ची, “गुइ माम्चु़नीकु किब्दीगोडा हुमु हापा मेझापातो दु़खा ल्वामु बासी।” 23 मेर्चिपका मेर्मिमकु मण्डली-मण्डलीडा एल्डरमिम थुच्चिमी। मेकोतिमा सो़म्दी नुङ उपास बात्तो मेर्मिमका थो़र लु़म्डिम माम्चु़नीकु ल्वाडा मेर्मिमलाई पार्जो़ल्चिमी। 24 मेकोतिमा मेर्चिप पिसिदियालामका पामफिलियाडा रोक्ची। 25 पर्गा टापुडा सिजेम दो़च्चिमा मेर्चिप अटालियायु़ योक्ची। 26 अटालियालामका डोक्पु कुबी-बोक्साडा हुच्चिमा मेर्चिप एन्टिओखिया शहरडा ख्लोसिक्ची। मेसिन्डाम थो़रलु़पामिमका पावल नुङ बारनाबासलाई माम्चु़नीकु दिदामडा जो़पा-सेला थो़बेड्डा थु़र्मिडिचिम बाइडा, मा मेराम खारी ओम्लो मेर्चिपका बोमु दु़म्ची। 27 मेर्चिप एन्टिओखियाडा रोक्फाट्ची, मा खोत्ले थो़रलु़पामिमलाई कोदेप येट्चिमी। मेम्मा माम्चु़नीका बेम्डिम खोत्ले खारीमिम सो़च्ची, मा हेसाका माम्चु़नीका वाङसामामिमकाम लागि थो़रलु़पा लाम्दी होल्साम्डिम मेर्मिम खोत्लेङा सो़च्ची। 28 मेकोतिमा पावल नुङ बारनाबास सीसिपामिमनुङ मेसिन्डा हापा बाच्ची। |
© Wycliffe Bible Translators, Inc. All rights reserved.
Wycliffe Bible Translators, Inc.