थु़र्मा 10 - थुलुङ राईकर्नेलियसका मिक्सीलाम ल्वास्तु़म 1 कैसरिया शहरडा कर्नेलियस नङकाम कोले मु़चु़ बाइडा। गु इटालिया र्वाक्मा पल्टनडाम कोङ कप्तान बाइडा। 2 कर्नेलियस माम्चु़नीकु सो़रलोले बेपा मु़चु़ बाइडा। गु नुङ उ नेमडाममिम खोत्लेका माम्चु़नीकु ङिम जु़ल्थाल्मिडी। गुका उनी हाम वो मेबाट्पा मु़चु़मिमलाई छो़म खाप्ची ग्वाक्साका हेल्लो लोवो माम्चु़नीडा सो़म्दी बु़थाल्लु़। 3 कोलेम नेम्फुम सु जेस्ताम बिलि कर्नेलियसका मिक्सीलामडा माम्चु़नीकु पाह्रीचो़ उ त्वापथो़ योक्तोङा बेपा, मा मे पाह्रीचो़का गुलाई “कर्नेलियस” र्वाक्तामा डाड्डु़म जो़होमका थो़स्तु़। 4 कर्नेलियसका पाह्रीचो़थो़ रेप्डु़म-रेप्डु़म ङा बु़डु़। गु छो़म ङिड्डामा र्वाक्ता, “गानी हाम र्वामु माल्नी ङाचो़?” पाह्रीचो़का र्वाक्ता, “माम्चु़नीका इमा सो़म्दी थो़म्डिम बु। गाना उनी हाम वो मेबाट्पा मु़चु़मिमलाई खाप्ची ग्वाक्नामिम गुमीका ल्वाम्डिम बु, मा गुमीका गानालाई मिम्थानामिमिम बु। 5 आथा मु़चु़मिमलाई योप्पायु़ पत्रुस र्वाक्मा सिमोन येड्डा थु़रामी। 6 गु कोक्तेकु खारी बेपा सिमोनकाडा बु। मेराम सिमोनकु नेम दिरिदिनकु सो़पडा बु।” 7 आकोति र्वाक्तामा मे पाह्रीचो़ लस्ता। कर्नेलियसका नले उ डु़ल्चो़चिप नुङ माम्चु़नीकु सो़रलोले बेपा, मा हेल्लो लोवो उ त्वाकु चापे-डुपे बेपा कोले सिपाही येड्डु़, 8 मा मेर्मिमनुङ खोत्ले ल्वा सो़यु़डु़। मेकोतिमा योप्पायु़ थु़र्स्तु़मी। पत्रुसका मिक्सीलाम ल्वास्तु़म 9 उ दिकाम को-न (१२) जेस्ताम बिलि मेर्मिम मु़चु़मिम योप्पा फार्डा योक्तोङा बेम्डी। मेकोतिलो पत्रुस कौसीडला सो़म्दी बेप्डा लस्ताम बाइडा। 10 पत्रुस क्रु़म सिडामा हाम-हुम पोमु न बु़डु़। जाम थिक्तोङा बु़डु़लो उ न ना थो़म होप्माम दु़स्तामा मिक्सीलाम ल्वास्तु़। 11 गुका पाह्री ह्वासिक्पा मा मेडलामका ब्ल सुरडा बन्थाट्मा प्लानबेखोप होप्माम ये सुबुडा योक्तोङा बेपा ल्वास्तु़। 12 मेरामगोडा सुबुडाम खोत्ले हादी-बारामिम, सुसिसाका लाम्दिपा फुचु़-रोक्चु़मिम नुङ हुट्पा सिकेवा-माङ्केवा बाम्डी। 13 मेकोतिमा कोङ लो़लामका पत्रुसनुङ र्वाक्ता, “पत्रुस बका, मा मेर्मिमलाई सेडामा पे।” 14 लावो पत्रुसका र्वाक्ता, “मेएँ ङाचो़, हेङालोने गो हेल्लो वो घ्राम्लु़पा नुङ मेसेपा हाम वो पेउतोम मिबु।” 15 आथावो मेराम लो़लामका पत्रुसनुङ र्वाक्ता, “माम्चु़नीका उहेमलाई सेपा बेम्डिम बु, मेराम गाना मेसेपा मेमिम्डा।” 16 सु खेपसम्म आरेप्माङा दु़स्ता, मा मेराम प्लान बेखोप होप्माम ये पाह्रीथो़ ख्लोसिड्डा। 17 उ त्वाका ल्वास्तु़म मिक्सीलामकु दुथाम हाम डे र्वाक्तामा पत्रुस ङाङाया दु़स्ताम बाइडा। मेकोतिलो कर्नेलियसका थु़र्डु़म मु़चु़मिम सिमोनकु नेम माल्तो रोम्फाम्डी, मा लाम्चोको फार्डा येम्तासिम्डी। 18 मेकोतिमा मेर्मिमका “पत्रुस र्वाक्मा सिमोन आसि बुमी?” र्वाम्डिमा हिलाबेम्डी। 19 पत्रुसका मिक्सीलामकु दुथाम आथावो मिम्डु़म बाइडालो माम्चु़नी-पेलका गुनुङ र्वाम्डी, “रेप्डा, सुले मु़चु़मिमका गानालाई माल्तोङा बोनामी। 20 मेम्मिमका बका, मा ध्वायु़ लक्सामा इमा नड्डा हाम वो मेमुर्सिक्साका मेर्मिमनुङ लक्सा, हेङालोने मेर्मिमलाई गो थु़र्तोमिम सो़।” 21 मेकोतिमा पत्रुस ध्वायु़ योक्ता, मा मे मु़चु़मिमकाडा लस्तामा र्वाक्ता, “रेप्नी, गानी माल्निमिम मु़चु़ गो ङा सो़। गानी आसिन्डा हाम र्वाप्डा रोन्फाट्नी?” 22 मेर्मिमका र्वाम्डी, “गुकु कप्तान कर्नेलियसका थु़र्तिकिम बु। गुमी माम्चु़नीकु मिक्सीलामडा जो़पा खारी बेपा नुङ माम्चु़नीकु ङिम जु़ल्पा, मा खोत्ले यहूदीमिमका जो़पा माल्मिडिम कोङ मु़चु़ बुमी। इनीमा सिजेम गुमीका थो़मु माम्चु़नीकु कोङ पाह्रीचो़का गानी कर्नेलियसकु नेमडा येन्बेट्निमिम बु।” 23 मेकोतिमा पत्रुसका मेर्मिमलाई मेराम नेम्था बुमु नेमगोनो येड्डु़मी। उ दिकाम नेम पत्रुस झो़म्सिड्डामा मेर्मिमनुङ लस्ता। योप्पाडाम कोले नले थो़रलु़पामिम वो पत्रुसनुङ लम्डी। कर्नेलियसकु नेमडा पत्रुस लस्ताम 24 उ नहाद्दामनेम मेर्मिम कैसरियाडा रोम्फाम्डी। मेसिन्डा कर्नेलियसका उ त्वाकु मु़चु़मिम नुङ गुनुङ छो़म दु़पा ङोप्सो़मिम येड्डु़मिमा मेर्मिमलाई लथाड्डु़मिम बाइडा। 25 पत्रुस मेगोडा रोक्तालो कर्नेलियसका क्रो़म्डु़, मा उ खेल चु़म्साका सेव साड्डु़। 26 लावो पत्रुसका गुलाई फक्तो र्वाक्ता, “बक्नी, गो वो गानी होप्माम मु़चु़ ङा सो़।” 27 मेकोतिमा पत्रुस कर्नेलियसनुङ ल्वा बेत्तो नेमगोनो लस्ता, मा मेसिन्डा सेर्पा मु़चु़मिम खोम्सिम्डिम गुका डार्डु़मी। 28 पत्रुसका मेर्मिमनुङ र्वाक्ता, “वाङसामामिमनुङ घ्रो़म्मु, बुमु गुकु यहूदीलाई डु़म्लाका मेग्वाकी र्वाक्पा ल्वा गानी खोत्लेका जो़होमका चनिमिम ङा बु। लावो आथा उहेम मु़चु़लाई वो मेसेपा नुङ घ्राम्लु़पा मिम्सी मेनु़ र्वाक्साका माम्चु़नीका गोलाई रेम्बेट्ङिडिमिम बु। 29 मेम्मिमका गानी येट्ङिडिनिलो गो आमा नड्डा हाम वो मेमुर्सिक्साका रोङ्डो। लु र्वानी, हेङा येट्ङिडिनिम?” 30 मेकोतिमा कर्नेलियसका र्वाक्ता, “ब्ललेम ङादो ओराम थारीकाङा नेम्फुम सु जेस्ताम बिलि नेमडा गो सो़म्दी बेउतोम बाङडो। मेकोतिलो कोचोत्ति बुबुयाम ये फतासिट्पा कोङ पाह्रीचो़ आमा ङादोडा रेम्बेसिड्डा, 31 मा र्वाक्ता, ‘कर्नेलियस, माम्चु़नीका इमा सो़म्दी थो़म्डिम बु, मा उनी हाम वो मेबाट्पामिमलाई खाप्ची ग्वानामिम गुमीका मिम्मिडिम बु। 32 मेम्मिमका पत्रुस र्वाक्मा सिमोनलाई येड्डा योप्पायु़ मु़चु़मिमलाई थु़रामी। गु दिरिदिनकु सो़पडा कोक्तेकु खारीबेपा सिमोनकु नेमडा बु।’ 33 मेकोतिमा दालाङा गो गानी येड्डा मु़चु़मिम थु़र्तोमी, मा आसिन्डा रोनिम छो़म ङा जो़पा दु़स्ताम बु। आथा माम्चु़नीका गानीनुङ र्वाम्डिम खोत्ले सिजेम थो़मु गुकु खोत्लेङा माम्चु़नीकु ङादोडा खोम्सिक्तोकोम बु।” पत्रुसका माम्चु़नीकु सिजेम दो़स्तु़म 34 ओराम थो़स्तु़मा पत्रुसका जेमु चो़म्डु़, “माम्चु़नीका चोमिक्सी मेबोमी र्वाक्पा आच्छाङा गो ल्वाउतो। 35 मु़चु़ उहेम सामाडाम ङा लोवो माम्चु़नीकु ङिम जु़ल्पा, मा जो़पा खारी बेपा मु़चु़ ङा माम्चु़नीका द्वामी। 36 गानी ओराम ल्वा चनिमिम ङा बु, माम्चु़नीका न भ्रसिबेट्पा जो़पा-सेला सो़प्डा येशू ख्रीष्टलाई गुकु इस्राएलीमिमकाडा थु़र्मिडी। गुमी ङा खोत्ले मु़चु़मिमडला साखाम थो़पा ङाचो़ सो़। 37 यूहन्नाका कु-रु़दु़मकु दुथाम जो़पा-सेला दो़स्तु़म चङडा गालीललामका चो़म्सिक्साका खोत्ले यहूदियाडा हा-हाम दु़स्ताम बाइडा, मेर्मिमकु दुथाम सो़म्डिम सिजेम ओराम ङा सो़, 38 माम्चु़नीका नासरतडाम येशूलाई उनीमा पेल नुङ यु़मका थुट्मिडी। गुमी जो़पा खारी बेत्तो नुङ मुनाङका हुपामिमलामका मुनाङ ख्लुक्तो लाम्दिम्डी, हेङालोने माम्चु़नी गुमीनुङ बाम्डी। 39 “येशूका यहूदिया नुङ यरूशलेमडा बेम्डिम खोत्ले खारी गुकु ल्वात्तोकोम बु। यहूदीमिमका गुमीलाई क्रूसडा चेसाका सेट्मिडी। 40 लावो सुलेमनेम माम्चु़नीका येशूलाई सिमुलामका फम्डी। मेम्मा माम्चु़नीका गुमीलाई मु़चु़मिमकाडा रेम्बेम्डी। 41 खोत्ले मु़चु़मिमकाडा ने मेएँ, लावो माम्चु़नीका येशूकु दुथाम सो़मु लागि थुत्तिकिमिम गुकुलाई खोत्लेडाम ङादो येशू सिमुलाम बम्गेम्डिम रेम्बेम्डी। गुमी बम्गेम्डिम चङ्डा गुकु गुमीनुङ पेत्तोको-डुत्तोको। 42 मु़चु़मिमलाई जो़पा-सेला थो़बेन्मुमी, मा सिपा नुङ नु़पामिमकाम नियाबेपा माम्चु़नीका थुट्मिडिम मु़चु़ येशू ङा सो़ र्वाक्साका सो़मु गुमीका गुकुलाई र्वाम्डिम बु। 43 उहेमका येशूडा थो़र बु़, मेरामकु छु़लमिम येशूकु नङका हेम्सिट्मी र्वाक्साका खोत्ले माम्चु़नीलाम-जेपामिमका र्वाम्डिम बु।” 44 पत्रुसका ओर्मिम ल्वा जेत्तो बु़डु़ होङ्ङा सिजेम थो़पामिम खोत्लेडला माम्चु़नी-पेल योम्डी। 45 माम्चु़नीका उनी पेलकु राप्लावा वाङसामामिमडला अम्डिमका पत्रुसनुङ रोक्पा यहूदी थो़रलु़पामिम छो़म ङा ङाङाया दु़म्मिडी। 46 हेङालोने वाङसामामिमका वाङसामा ल्वाडा माम्चु़नीकु नङ कोक्तोङा बेम्डिम मेर्मिमका थो़म्डी। मेकोतिमा पत्रुसका र्वाक्ता, 47 “गुइ होङङा माम्चु़नी-पेल रपा ओर्मिम मु़चु़लाई कु-रु़दु़म रमु सु़का भोम्मु चाप्सु़ मा?” 48 मेकोतिमा पत्रुसका कर्नेलियस नुङ उमा नेमडा बाट्पा मु़चु़मिमलाई येशू ख्रीष्टकु नङडा कु-रु़दु़म ग्वाबेड्डु़मी। मेम्मा मे वाङसामामिमका पत्रुसलाई कोलेम-नलेम मेसिङा बुमु र्वाम्डिम-र्वाम्डिम ङा बेम्डी। |
© Wycliffe Bible Translators, Inc. All rights reserved.
Wycliffe Bible Translators, Inc.