३ यूहन्ना 1 - थुलुङ राई1 मण्डली रेपा ङाउ गो यूहन्नाका आच्छाङा रिखाम बोनिमिम गायस, गानालाई गो ओराम सेलाखाजेम र्याक्तोङा बेउ। 2 द्वादीबुङ ङोप्सो़, गाना खोत्लेडा जो़पा दु़म्नानु़, मेनो़नानु़ र्वाक्साका सो़म्दी बोन्सानी। इमा थो़र छो़म डोक्पु बु र्वाक्पा गो चक्पु। 3 कोले-नले थो़र लु़पा वा-ल्वाकमिम रोम्डिमा आच्छाङाकाम ल्वाडा थो़रलु़इमिम इमा बासीकु दुथाम नुङ आच्छाङाकाम ल्वाडा हेसाका बुनाम बुनामिम मेराम सो़म्डी। मेम्मा ओराम ल्वाका गोलाई छो़म गेर्सी बेट्ङिडिम बु। 4 आमा चो़च्चो़मिम आच्छाङाकाम ल्वाडा बुमिम बुमी र्वाक्पा ल्वा थो़मुडाम डोक्पु गेर्सीसी आमा लागि हाम दु़म मा? ङाचो़ येशूकु खारीचो़मिमलाई रेमु 5 द्वादीबुङ ङोप्सो़, थो़र लु़पा वा-ल्वाकमिमलाई, मेर्मिम मेछेनामिवामङा बाम्डी लोवो मेर्मिमलाई रेम्मुडा गाना थो़रलु़इमिम बुना। 6 मेर्मिमका इमा रिखामकु दुथाम मण्डलीडा सो़म्डिम बु। माम्चु़नीका न बोमिमिम होम्साका हेल्लो लोवो मेर्मिमलाई ख्लो़यामिमा थु़र्सोकामी। 7 हेङालोने ङाचो़ ख्रीष्टकु खारी बोमु लागि मेर्मिम मु़चु़ थो़र मेलु़पा मु़चु़मिमलाम हाम वो मेरसाका लाम्दिम्डिम सो़। 8 मेम्मिमका आच्छाङाकाम ल्वाकु खारीडा गुइ वो बाम्सिमु लागि आरेप्माम मु़चु़मिमलाई गुइ ख्लो़मुमि बासी। 9 मण्डलीलाई गो कोङनिम ल्वा र्याक्तोम बाइडा। लावो ङाउ दु़म्मु माल्पा डियोत्रिफसका गुकुनुङ हाम वो बोमु मेद्वाकु़। 10 मेम्मिमका गो रोङडो माला डियोत्रिफसका बेत्तोङा लेडु़मिम ल्वा सो़उ। गुका इकीमा दुथाम मेजो़पा ओन्चो़मा सो़यु़म बु। मेकोति कोङङा मेबु़, थो़र लु़पा वा-ल्वाकमिम रोमिलो गुका मेरेप्डु़मी, मा थो़र लु़पा वाङमिमलाई वो मेर्मिम वा-ल्वाकलाई मेख्लो़नी बु़मी। मेम्मा मेर्मिमका मे वा-ल्वाकमिमलाई ख्लो़मिलो मण्डलीलाम ख्लुकु़मी। 11 द्वादीबुङ ङोप्सो़नी, हाम मेजो़पा बु मेरामकु बेसी मेबेनी। उहेम मु़चु़का जो़पा बु़ मेराम मु़चु़ माम्चु़नीलाममिम सो़। उहेम मु़चु़का मेजो़पा बु़ मेरामका माम्चु़नी ल्वास्तु़म मिबु। 12 खोत्ले मु़चु़का डेमेत्रियस छो़म जो़पा मु़चु़ र्वामी। मेम्मा गुका जो़पा खारी बु़मिमका आच्छाङाकाम सीसिडा गु लाम्दी र्वाक्पा ल्वासी। गुकु आकी त्वाका वो उमा दुथाम मेमङा र्वाकु, मा गुकु र्वाकुमिम ल्वा आच्छाङा र्वाक्पा गाना चना। 13 गो गानानुङ हापाङा र्वामु बासिक्पा बाइडा, लावो कलम नुङ मसीका मेराम ल्वा र्यामु आमा न मिबु। 14 गानानुङ गो दालाङा घ्रो़म्मु न बु, मेम्मा रेम-रेम बेत्तो गुची जेची। 15 इमा न-भ्रसिनु़! आसिन्डाम ङोप्सो़मिमका गानालाई सेव र्वाम्डिम बु। मेसिन्डाम खोत्ले ङोप्सो़मिमलाई त्वा-त्वाहोम सेव साडामी। |
© Wycliffe Bible Translators, Inc. All rights reserved.
Wycliffe Bible Translators, Inc.