२ तिमोथी 4 - थुलुङ राई1 ख्रीष्ट येशू हप होङङा दु़म्साका योमिलो गुमीका सिपा लोवो नु़पा लोवो खोत्लेकाम निया बोमी। मेम्मिमका माम्चु़नी नुङ ख्रीष्टकु ङादोडा गो गानालाई ओर्मिम छो़म बेबेनी: 2 जो़पा-सेला थो़बेडामी, हाङकोलो लोवो जो़पा-सेला थो़बेन्मुडा न सोका, मु़चु़मिमलाई लु़म्ला बेडामी, भुरामी, उनीमा सो हन्बेसाडामी, मा इम्सिक्साका बुमुडा नुङ सीमुडा चङचङया बाया। 3 हेङालोने आरेप्माम थारी रोक्तोङा लेडु़, मेर्मिमका माम्चु़नीकु आच्छाङाकाम सीसिथो़ न मेसोमी, लावो त्वाका द्वामिमिम ल्वा कोङङा थो़मु न बोमी, मा उनी त्वाका द्वामिमिम सिपामिमकाडा खोम्सिमी। 4 मु़चु़मिमका आच्छाङाकाम सीसि थो़मु डिन्मी, मा हाम ना हामकु सो़म्दीमिमडाङा थो़रलु़मी। 5 लावो गाना खोत्ले थारीका त्वापलाईङा जो़होमका जु़ला, दु़खा इम्डा, जो़पा-सेला थो़बेडामी, मा माम्चु़नीका बेबेट्नामिम खोत्ले खारी बे। 6 हेङालोने सासेन्खोपडला आमा मिरो़म असाका माम्चु़नीलाई ग्वामु होङङा आमा सिमु थारी रोमु दु़म्स्तु़म बु। 7 गो जो़पा क्वाल्बा बेउतोम बु, मा ओराम खारीकु ओन्सी ओन्सोमु दु़म्तोम बु, आमा थो़र जो़होमका जु़ल्तोम बु। 8 आथा ने माम्चु़नीकु ङादोडा जो़पा दु़म्पाकाम मुकुट आमा लागि जु़ल्मा बु, उहेम मुकुट जो़होमका निया बेपा ख्रीष्ट योमिमा गोलाई खुबेन्ङिमी। गोलाई कोङङा मेएँ, गुमी योमिमिम थारी छो़म लथाक्पा खोत्ले मु़चु़लाई खुबेन्मी। त्वापगोडाम ल्वा पावलका तिमोथीनुङ र्वाक्ताम 9 इमा चाप्सी गाना दालाङा आमाडा रोका, 10 हेङालोने डेमासका ओराम सु़म्दिसेरलाई रिखाम बु़डु़मा गोलाई डिसाका थेसलोनिके शहरडा लस्ताम बु। क्रेसेन्स गलातिया क्षेत्रडा लस्ताम बु, मा तीतस ने दलमातिया क्षेत्रडा लस्ताम बु। 11 लूका कोङङा गोनुङ बु। मर्कूसलाई मालामा गानानुङङा रेडा, हेङालोने मेरामका खारी बोमुडा गोलाई जो़होमका ख्लो़ङी। 12 तुखिकसलाई गो एफिसस शहरडा थु़र्तोम बु। 13 गाना रोनालो त्रोआस शहरडा कार्पसकाडा पार्जो़ल्तोम आमा हुम-ये नुङ आमा खाजेममिम, मा भेन्दाकु कोक्तेडा र्याक्मा खाजेम ने मेप्ल्वासाका कोर्ङी। 14 वाता डु़पा अलेक्जेन्डरका गोलाई छो़म मेजो़पा बेङ्डिम बु, माम्चु़नीका उमा खारी होम्साका मेरामलाई देन्दे ग्वामी। 15 गाना वो मेराम मु़चु़डाम चङचङया बाया, हेङालोने गुइ थो़बेड्डिम जो़पा-सेलाकु कोर्थो़लाम मेरामका छो़म मेजो़पा बु़डु़म बु। 16 अदालतडा ङादोम थारीका लङ्डिमिलो सु़ वो गोलाम मेबाम्सिप्मिवा, मा गोलाई खोत्लेका ङेट्ङिडिमी। मेमङा लोवो ओराम ल्वाकु देन्दे मेर्मिमलाई माम्चु़नीका मेग्वामिनु़। 17 लावो वाङसामामिम खोत्लेका थो़मु चाम्मिनु़ र्वाक्साका येशू गोनुङ दु़म्मिडी, मा खोत्ले जो़पा-सेला थो़बेन्मु चापा यु़म ग्वाङ्डिमी। मेकोतिमा गो धेन्द्राकु सिगोडाम वाङ दु़म्मु ल्वाउतो। 18 ङाचो़का गोलाई खोत्ले मेजो़पा ल्वालामका गेङिमी, मा गुमीका उनीमा पाह्रीलाम किब्दीकाम लागि गोलाई बोङिमी-थार्ङिमी। हेल्लो लोवो उनीमा यु़म झ्वानु़म बुनु़! आमेन। पावलकाम चक्थो़म सेव 19 प्रिस्किला, अकिलास नुङ ओनेसिफरसकु नेमडाममिमलाई आमा सेव र्वाङसाक्ङी। 20 इरास्तस कोरिन्थ शहरडा बाइल्याड्डा, त्रोफिमस ने नो़सी बु़डु़मका मिलेटस शहरडा पार्जो़ल्तो। 21 गाना चाम्नामिमसम्म जु नेम रोमु ङादोङा रोका। युबुलस, पुडेस, लिनस, क्लौडिया नुङ खोत्ले थो़रलु़पामिमका गानालाई सेव र्वाम्डिम बु। 22 माम्चु़नी गानानुङ दु़म्मिनु़। उनीमा दिदाम गानानुङ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.