२ तिमोथी 3 - थुलुङ राईहुक्पाथारी बिलि मेजो़पा मु़चु़मिम दु़म्मी 1 हुक्पाथारीका ङिमलु़पा थारी रो र्वाक्पा गाना चजो़ला। 2 हेङालोने मु़चु़मिमका उनी त्वापलाई कोङङा रिखाम बेपा, खउलुङकु रारी बेपा, डोक्पु लिसिक्पा, नो़ ल्वाक्थाट्पा, वाङमिमकु दुथाम मेजो़पा जेपा, माम-पापका र्वामिमिम मेथो़पा, आला-तोमा मान्थिम, मा माम्चु़नीकु लाम्दीडा मेलाम्दिपा, 3 रिखाम मान्थिम, पाचो ग्वामु मेबिसिक्पा, वाङमिमलाई डक्साका जेपा, त्वापलाई जो़होमका मेजु़ल्पा, न-थो़म मान्थिम, जो़पा ल्वा मेद्वाक्पा, 4 ङादो जेम्मा होम्साका मेबेपा, मेमिम्साकाङा खारी बेपा, डोक्पु लिसिक्पा, माम्चु़नीलाई रिखाम मेबेसाका त्वाकु नसीहोम बेपा, 5 माम्चु़नीकु सो़रलोले बेपा लिसिक्पा, लावो माम्चु़नीडा आच्छाङाका थो़रमेलु़पा दु़म्मी। तिमोथी, आरेप्माम मु़चु़मिमडाम वाङ बाया। 6 हेङालोने मेर्मिमगोडाम याङ-याङ ने नेम-नेमगोडा हुसाका छु़ल कुर्थाक्पा नुङ छो़म मेजो़पा नका बथाक्पा मेथेट्पा मेसेममिमलाई उनी ल्वाडा जु़ल्मी। 7 मेर्मिम मेसेममिमका सीम्सिमु ने हेल्लो लोवो सीम्सिमी लावो माम्चु़नीकु दुथाम आच्छाङाकाम ल्वा हेल्लो वो थेसिमेथेट्मी। 8 माम्चु़नीलाम-जेपा मोशाकु कोर्थो़लाम यान्नेस नुङ याम्ब्रेस बक्चिम होम्साका ओर्मिम मु़चु़ वो आच्छाङाकाम ल्वाकु कोर्थो़लाम बमी। ओर्मिम मु़चु़कु न झिप्स्ताम बु, मा उनीमा थो़र आच्छाङाकाम मिबु। 9 लावो ओर्मिमका हेल्लो लोवो आरे बोमुम बुमु मेचाम्मी। हेङालोने यान्नेस नुङ याम्ब्रेसकाम होप्मामङा मेर्मिमका नेप्ची मान्थि बोमिमिम खारी खोत्लेका ल्वामी। पावलका तिमोथीलाई बेबेड्डु़म खारी 10 आथा ने गाना आमा सीसि, आमा दोसी, गो बोमु मालुमिम ल्वा, आमा थो़र, आमा इम्सी, आमा रिखाम, मा आमा न कोलेङा बु र्वाक्पा चनामिमङा बु। 11 एन्टिओखिया शहर, आइकोनियन नुङ लुस्त्रा शहरमिमडा गोलाई छो़म मेजो़पा बेङ्डिमी। मेम्मा मेसिन्डाम मु़चु़मिमका ग्वाङ्डिमिम दु़खा इम्तो, लावो ङाचो़ येशूका मेर्मिम खोत्लेलामका गोलाई बोट्ङिडी-थार्ङिडिमी। 12 ख्रीष्ट येशूडा माम्चु़नीकु लाम्दी होम्साका लाम्दिमु माल्पामिम खोत्ले मु़चु़काम छो़म उनी थो़मतेर्सी। 13 लावो मेजो़पा मु़चु़मिम नुङ लुचो़ बेपामिम लु-फेले बेसाका नुङ लु-फेले बेला सो़सिक्साका छो़म मेजो़पा दु़म्तो लमी। 14 लावो गाना ने त्वाका सीसिट्नाम नुङ छो़म थो़रलु़न्नाम ल्वा होम्साका लाम्दियाम बाया, मेर्मिम ल्वा थो़रलु़इमिम मु़चु़मिमलाम सीसिट्नाम गाना त्वाकाङा चना। 15 गाना ने चो़च्चो़लो आथामङा माम्चु़नीकु सिजेम चनामिम बु, मेराम सिजेमका ख्रीष्ट येशूडा थो़र लु़न्नामलामका सेल्सिमुकाम लागि गानालाई सीमु चाम्ना। 16 माम्चु़नीकु खोत्ले सिजेम माम्चु़नीकु सामलामका रोक्ताम सो़, मा सीमु, लु़म्ला बेन्मु, जो़पा बनेबोमु, माम्चु़नीकु न होम्साका दोबेन्मुडा ओराम ख्लो़पा बु। 17 मेम्साका माम्चु़नीकु लाम्दीडा लाम्दिपा मु़चु़मिम जो़पा खारी खोत्ले बोमु चापा दु़म्मी। |
© Wycliffe Bible Translators, Inc. All rights reserved.
Wycliffe Bible Translators, Inc.