२ तिमोथी 2 - थुलुङ राईख्रीष्ट येशूकु जो़पा सिपाही 1 आमा तारापाचो़ होप्माम तिमोथी, ख्रीष्ट येशूका ग्वाक्साड्डामिम दिदामका गाना यु़मनुङमा दु़प्सा। 2 सेर्पा मु़चु़मिमकु ङादोडा गोलामका गाना हाम थो़न्नाम बु, मेराम ल्वा वाङमिमलाई सीमु चापा थो़रलु़नामिम मु़चु़मिमलाई वो बेबेडामी। 3 ख्रीष्ट येशूकु कोङ जो़पा सिपाही होङङा गुकुनुङ दु़खा इम्डा। 4 सेनाडा भर्ती दु़म्पा सिपाहीका वाङमिम खारी बेसाका नेम मेताडु़, हेङालोने गुलाई भर्ती बेपा डोक्पु मु़चु़लाई गेर्सिबेन्मुङा गुका मालु़मिम दु़म। 5 नियम होम्साका मेचाम्सी माला चाम्सिक्पा मु़चु़ उहेम वो घ्ल्वामु मेचाप्सु़। 6 ब्राम्दु़ल्वा बेपा खारीचो़काङा थोक्पा मा-के ङादो ल्वासु़। 7 गो हाम र्वाक्तोङा बेउ मेराम ल्वा जो़होमका मिम्डा, खोत्ले थेसिथेट्पा नेप्ची माम्चु़नीका गानालाई ग्वानामी। 8 सिमुलाम बम्गेम्डिम दाऊदकु दोचो़लाममिम येशू ख्रीष्टलाई मिम्डा, गो थो़बेत्तोमिम जो़पा-सेला ओरामङा सो़। 9 ओराम जो़पा-सेलाकाम लागि गो दु़खा इम्तोङा लेट्पु, मा मेजो़पा खारी बेपा मु़चु़ होङ्ङा झ्यालखानडा सेल-रिबाका बट्ङिडिमिम बु। लावो माम्चु़नीकु सिजेम ने सेल-रिबाका मेबन्सी। 10 माम्चु़नीका छेट्मिडिम मु़चु़मिमका वो ख्रीष्ट येशूडा सेल्सिमु ल्वामी। मेम्मा मेराम सेल्सिसीनुङ हेल्लो वो मेदाम्पा यु़म-झ्वाक्सी ल्वामी मेम्मिमका मेर्मिमकाम लागि गो खोत्ले इम्पा आमा न बु। 11 ओराम ल्वा थो़रलु़इमिम बु: गुइ गुमीनुङ सिइडिम बु माला गुइ गुमीनुङङा नु़इ, 12 गुइ इम्डी माला, गुमीनुङङा साखाम थो़डी, गुइ गुमीलाई रमु मेबिसिडिवा माला गुमीका वो गुइलाई रमु मेबिम्सिमी। 13 गुइ थो़रमेलु़पा बुइ लोवो, गुमी थो़रलु़इमिम दु़म्मी, हेङालोने गुमीका उनी त्वापलाई लिमा थेन्मु मेचाम्मी। माम्चु़नीका थुट्मीडिम खारीचो़ 14 थो़रलु़पामिमलाई ओराम ल्वा मिम्बेडाम बाया: मेर्मिमका हाम ना हामकु ल्वाडा खालमेबोमिनु़ र्वाक्साका माम्चु़नीकु ङादोडा चङचङया बाबेडामी। आरेप्माम ल्वा बेसीका सु़लाई वो जो़पा मेबु़, मा थो़पामिमलाई पुयु़लुकु़मी। 15 माम्चु़नीकु आच्छाङाकाम सिजेम चङको-चङको सीपा, त्वाकु खारीडा क्रो़मलु़मु मेबासिक्पा खारीचो़ होङङा माम्चु़नीका बिम्सिप्मिमिम खारी छो़म बे। 16 हाम ना हामकु ल्वामिम नुङ माम्चु़नीकु नङ मेकोसिक्पा ल्वामिमडाम वाङ बाया, हेङालोने ओराम ल्वाका मु़चु़मिमलाई माम्चु़नीडाम होनोवा दु़म्बेडु़मी। 17 मेर्मिमकु ल्वा ने लामासाम होप्मामङा सो़। हुमेनियस नुङ फिलेतस मेप्माम मु़चु़ सो़। 18 ओर्चिप आच्छाङाकाम ल्वालामका कोर्थो़ लक्चिम बु। सिमुलामका बग्गेट्पा थारी ङादोङा दु़म्मु दु़म्स्तु़ मा आथा ने मेदु़म र्वाक्साका ओर्चिपका हाङको मु़चु़मिमकु थो़र पुयु़लुक्साट्चिमिम बु। 19 लावो माम्चु़नीकु सिजेम हेल्लो वो मेदोपा लुङडला गट्मा जग होप्माम बु, मा मेसिन्डा ओराम मिक्छे बु, “ङाचो़का त्वाकु मु़चु़मिमलाई छेमी, मा माम्चु़नीकु नङ रपामिम खोत्ले मेजो़पा खारी बोमुडाम वाङ बुमिनु़।” 20 डोक्पु नेमडा सङ नुङ क्वाकु सोजाम कोङङा मेदु़म, लावो सो़ना नुङ मतोकाम सोजाम वो दु़म। कोङनिम याक्के खारीडा मा कोङनिम डोक्पु खारीडा मोमु जु़ल्मा दु़म। 21 मे याक्के खारीडा मोमु जु़ल्मा कोङनिमका उ त्वापलाई सेपा बु़डु़ माला मेराम डोक्पु खारीडा मोमु घ्रेट्पा सोजाम दु़म, मा नेमहपका मोमु घ्रेट्पा नुङ कोङनिम डोक्पु खारी बोमु घ्रेट्पा दु़म। 22 मेम्मिमका स्वालादुडाम मेजो़पा खारीडाम वाङ बाया, सेपा न-गोका माम्चु़नीकाम नङ रपामिमनुङ कोयोङा माम्चु़नीकु न होङ्ङा बेपा थो़र बोमु, रिखाम बोमु नुङ न-भ्रसिबेन्मु न बे। 23 नेप्ची मान्थिम नुङ हाम ना हामकु खाल्बेपा ल्वामिमडाम वाङ बाया, हेङालोने ओर्मिम ल्वाका रिबुसी ग र्वाक्पा गाना चनामिमङा बु। 24 माम्चु़नीकु डु़ल्चो़का रिबुसी किसि मेनु़, लावो खोत्लेनुङ दु़पा, सीमुचापा, इम्सिक्पा, 25 मा उमा कोर्थो़लाम बक्पामिमलाई याक्के दु़म्साका थेसिथेन्बेट्पा दु़म्मु बासी। मेकोतिमा माम्चु़नीका मेर्मिमकु न-गो ख्लोम्साट्मिमा मेर्मिमका आच्छाङाकाम ल्वाडा थो़र लु़मी डे, 26 मा मेर्मिमकु न छ्यासी, मा शैतानकु पेरडाम लुमिमा स्वामी, उहेमका मेर्मिमलाई उमा न होम्साका दोमु बथाडु़मिम बु। |
© Wycliffe Bible Translators, Inc. All rights reserved.
Wycliffe Bible Translators, Inc.