२ तिमोथी 1 - थुलुङ राईतिमोथीलाई पावलकु सेव 1-2 आमा द्वादीबुङ तारापाचो़ होप्माम तिमोथी, गो पावलका गानालाई ओराम सेलाखाजेम र्याक्तोङा बेउ। ख्रीष्ट येशूडा त्वारो़म ग्वानिनी र्वाक्साका माम्चु़नीका याचे जेम्डिम होम्साका, मा उनीमा नका थुट्ङिडिमिम गो ख्रीष्ट येशूकु थु़र्मा सो़। इकीमा माम्चु़नी पाप नुङ इकीमा ङाचो़ ख्रीष्ट येशूलामका गाना दिदाम, न-थो़म नुङ न-भ्रसी ल्वानानु़! आच्छाङाकाम थो़रलु़पा दु़म्मु सो हन्बेसी 3 हेल्लो लोवो गो गानालाई सो़म्दीडा मिम्निलो माम्चु़नीलाई आलासो़ ग्वाक्पुमी। आमा ङाउ-खुउमिमका बेम्डिम होम्साका गो उनीमा जो़पा नेप्चीका लाले-पाङके बेउ। 4 गाना ख्राम्नामिम नेम्फु सिन्था गो मिम्पु, मा गानालाई छो़म क्रो़म्मु आमा न बु। गो गानालाई क्रो़म्नी माला छो़म गेर्सी द्वामु। 5 गो इमा आच्छाङाकाम थो़र मिम्पु, मा ङादो मेराम थो़र इमा मिमी लोइस नुङ इमा माम युनिसडा बाइडा। मेराम थो़र गानानुङ वो बु र्वाक्पा गो लु़ङडोम बु। 6 मेम्मिमका गो गानालाई मिम्बेनी, गो गानाडला ल्वा जु़ल्साका सो़म्दी बेउतोलो माम्चु़नीका गानालाई राप्लावा ग्वाक्नामिम बाइडा। मु हुर्साका हापा वाक्तो लक्पा बोमु होङ्ङा मेराम राप्लावा बर्बेत्तो लडा। 7 हेङालोने माम्चु़नीका गुइलाई ङिमलु़बेट्पा न मेएँ, लावो यु़म, रिखाम नुङ त्वापलाई जो़होमका जु़ल्पा न ग्वाक्साड्डामिम बु। 8 मेम्मिमका इकीमा ङाचो़ येशूकु दुथाममिम ल्वा मु़चु़मिमनुङ सो़मु इमा क्रो़म मेलु़नु़, मा गो ङाचो़काम लागि चला सो़सिसाका बुङुमिमका गोडाम इमा क्रो़म मेलु़नु़। मेम मेबेसाका, गो होम्साकाङा गाना वो जो़पा-सेलाकाम लागि दु़खा बे। माम्चु़नीका मे दु़खा इम्मु यु़म ग्वानामी। 9 गुमीका गुइलाई सेल्साड्डामी, मा सेपा दु़म्मु गुइलाई येसाड्डामी। गुइ बिडिम कोङनिम खारीलाम मेएँ, गुमीका उनीमा त्वाकु नका नुङ दिदामका गुइलाई सेल्साका येसाड्डामी। सु़म्दिमोडाम वो ङादोङा गुइलाई गुमीका ख्रीष्ट येशूडा ओराम दिदाम ग्वाक्साड्डामिम बाइडा। 10 ओम्लो मेराम दिदाम गुइलाई सेल्पा ख्रीष्ट येशू योम्डिमलाम रेम्बेम्डिम बु। येशूका सिमुलाम घ्ल्वाम्डिमा जो़पा-सेलालामका हेल्लो वो मेसिपा त्वारो़म ल्वापा लाम्दी ओलडा रेम्बेम्डी। 11 ओराम जो़पा-सेलाकाम लागि जो़पा-सेला थो़बेट्पा, थु़र्मा नुङ सीपा कोङ मु़चु़ माम्चु़नीका गोलाई थुट्ङिडिमिम बु। 12 मेम्मिमका गो ओर्मिम ल्वाकु दुथाम दु़खा इम्तोङा लेट्पु, लावो ओरामडाम आमा क्रो़म मेलु़। हेङालोने सु़डला थो़र लु़ङडोम बु गो छेपु गुमी येशू। मेम्मा गुमीका गोलाई ग्वाङ्डिमिम खारीडा सु़म्दिसेर हुक्पा थारीसम्म बोङिमी-थार्ङिमी र्वाक्पा लु़ङ्डोम बु। 13 गोलामका गाना थो़न्नाम आच्छाङाकाम सीसिडा जो़होमका लाम्दियाम बाया मा मेराम सीसि बोथाडा-थार्थाडा। मेम्मा ख्रीष्ट येशूडा बाट्पा इमा थो़र नुङ वाङमिमडला बोनामिम इमा रिखामडा गाना मेराम रेम्बेपा दु़म्सा। 14 गुइनुङ बाट्पा माम्चु़नी-पेललाम ख्लो़ला सो़क्सिका गानालाई जु़ल्मु ग्वाक्मा आच्छाङाकाम सीसि जो़होमका बोथाडा-थार्थाडा। 15 एशियाडा बाट्पा हापा मु़चु़मिमका गोलाई ङेट्ङिडिमिम गाना चनामिमङा बु। मेर्मिमगोडाम फुगेलस नुङ हर्मोगेनस सो़। 16 ङाचो़ येशूका ओनेसिफरसकु नेमडाममिमलाई न-थो़म रेम्बोमिनु़, हेङालोने मेरामका छेम-छेमका ख्लो़साका आमा सो हन्बेथाल्लु़, मा चला सो़ङ्सिङ्डोमडाम उमा क्रो़म मेलु़थालावा। 17 गु रोम शहरडा रोक्तामा गोलाई छो़म माल्ङिडिमा क्रो़म्ङिडी। 18 ख्रीष्ट योमिमिम थारीनेम ङाचो़का ओनेसिफरसडला न-थो़म रेम्बोमिनु़। एफिसस शहरडा गुका गुइलाई ख्लो़साड्डाम बाइडा र्वाक्पा ने गाना त्वाकाङा वो ल्वान्नाम बु। |
© Wycliffe Bible Translators, Inc. All rights reserved.
Wycliffe Bible Translators, Inc.