२ थेसलोनिकी 3 - थुलुङ राईखोत्लेकाम लागि सो़म्दी बेनी 1 हुम-दडा, वा-ल्वाकनी, गुकु गानीलाई र्वाकु, आकीमा लागि सो़म्दी बेसाट्किनी। ङाचो़ येशूकु सिजेम दाला-दाला खोत्लेका थो़मिनु़, मा गानी बोनिमिम होङङा मेर्मिमका वो येशूकु सिजेमलाई डोक्पु मिम्मिनु़। 2 माम्चु़नीका गुकुलाई रु़चो़ नुङ मेजो़पा मु़चु़डाम वाङ बोकिमिनु़ र्वाक्साका वो सो़म्दी बेनी, हेङालोने येशूकु सीसिडा खोत्लेका ने थो़र मेलु़मी। 3 लावो ङाचो़ येशू ने थो़रलु़इमिम बुमी। गुमीका गानीलाई सो ग्वानिमी, मा शैतानडाम बोनी-थार्नी। 4 गानीलाई गुकु बेबेत्तोकोम ल्वा गानी जो़होमका बेत्तोङा लेनी, मा आथावो जो़होमका बेत्तो लनी र्वाक्साका इनीमा दुथाम ङाचो़ येशूडा थो़र लु़त्तोकोम बु। 5 ङाचो़का इनीमा न-गोलाई माम्चु़नीकु रिखाम नुङ ख्रीष्टकु इम्सीथो़ क्रिमिनु़। भ्रेपा मेदु़म्नी 6 वा-ल्वाकनी येशू ख्रीष्टकु नङडा गानीलाई र्वाकु, गुकु सीत्तोकोम सीसि होम्साका मेदोसाका भ्रेपा खोत्ले वा-ल्वाकमिमडाम वाङ बानी। 7 हेङालोने गुकु बेत्तोकोम होम्साकाङा गानी वो खारी बोमु बासी र्वाक्पा ने चनिम ङा बु। गुकु गानीनुङ बात्तोकोम थारीका हेल्लो वो मेभ्रेकुवा। 8 गुकु खउलुङ मेसोक्साका सु़काम वो मेडे मेपेसाक्कुवा-मेडुसाक्कुवा। लावो गानी सु़लाई वो दु़खा मेग्वामु र्वाक्साका नेम्फु-सिन्था खारी बेत्तोको। 9 गुकुलाई पोमु-डुमु ग्वाक्की र्वाक्साका गानीनुङ बिमु ल्वाकुवा, लावो गानी वो आकीमा बेसी बेनिमा गुकु होप्मामङा खारी बेपा दु़म्नी र्वाक्साका मेम बेत्तोकोम सो़। 10 गुकु गानीनुङ बात्तोकोलो गानीलाई आरे र्वाक्तोकोम बाइडा, “उहेमका खारी बोमु न मेबु़, मेरामका मेपु़नु़ मेडुङु़नु़।” 11 गानीगोडाम कोङनिम भ्रेपा बुमी, मा उनी त्वाका खारी बोमु ने मेएँ मु़चु़मिमका बोमिमिम खारीडा लापान्चोसिमी ए र्वाक्पा गुकु थो़त्तोको। मेम्मिमका आरे र्वाकुमिम। 12 मेर्मिमका लिबा बासाका खारी बोमिनु़, मा पोमुडुमु लागि उनी त्वाकाङा खउलुङ डु़प्मिनु़ र्वाक्साका ङाचो़ येशू ख्रीष्टकु नङडा मेर्मिमलाई र्वाकु, मा बेबेन्कु। 13 वा-ल्वाकनी, गानी ने आरेप्माम जो़पा खारी बोमुडा मेघ्रु़म्नी। 14 ओराम सेलाखाजेमडा र्याक्तोकोम सिजेम कोङनिमका मेथो़सु़ माला मेराम मु़चु़लाई जो़होमका छेन्जो़ल्नी, मा मेरामलाई उ क्रो़म लु़नु़ र्वाक्साका मेरामडाम वाङ बानी। 15 मेमङा लोवो मेरामलाई इनी स्वाक्चिमो मु़चु़ होङङा मेबेनी, लावो इनी त्वाकु वा-ल्वाक होङङा ङिमसाट्नी। हुम-दडाम पावलकु सेव 16 न-भ्रसी बेट्पा ङाचो़ येशूका खोत्ले थारीका नुङ हेल्लो लोवो इनीमा न-भ्रसी बेन्मिनु़। गानी खोत्लेनुङ ङाचो़ येशू दु़म्मिनु़। 17 गो पावल, आमा त्वाकु ल्वाकाङा ओराम सेव र्याक्तोम सो़। मेर्मिम सेलाखाजेम गो थु़र्तोम र्वाक्पा रेम्बोमु लागि खोत्ले आमा सेलाखाजेमडा आरेसाकाङा र्याक्पु। 18 इकी ङाचो़ येशू ख्रीष्टकु दिदाम गानी खोत्लेनुङ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.