२ थेसलोनिकी 2 - थुलुङ राईडु़म्लाकु कोर्थो़लाम बमिम मु़चु़ 1 वा-ल्वाकनी, इकीमा ङाचो़ येशू ख्रीष्ट योमिमिम नुङ गुमीलाई क्रो़म्मु लागि माम्चु़नीका कोदेप खोप्सामिमिमकु दुथाम गुकु गानीलाई छो़म र्वाकु, 2 कोङनिमका ओराम ल्वा र्वामु चाम्मी, माम्चु़नी-पेललाम लोवो कोङनिमलाम लोवो आकीमा कोङनिम सेलाखाजेममिमलाम लोवो थो़त्तोकोम ङाचो़ येशू ङादोङा योमु डु़म्मिडिम बु। मेर्मिमका आरे र्वामिलो इनीमा नडा मेभ्रल्यासिड्पा मेदु़म्नी मा इनीमा लो़ मेदाम्नु़। 3 मु़चु़मिमका ओराम ल्वाकु दुथाम गानीलाई र्वामिमिम लिमा ल्वा जेसाका लु-फेले बोमु मेल्वासु़नु़। मु़चु़मिम माम्चु़नीकु कोर्थो़लाम बमी, मा माम्चु़नीकु डु़म्लाकाम कोर्थो़लाम बमिम पुयु़लुक्पा मु़चु़ रो। मेम्मा ङाचो़ येशू योमी। 4 माम्चु़नीकु कोर्थो़लाम नुङ मु़चु़मिमका सो़रलोले बोमिमिम ङाटाकु कोर्थो़लाम मेराम ब। मेम्साका गु उ त्वाप ने माम्चु़नीकु सो़रनेम गोडा डोक्पु लिसिमा गन, मा माम्चु़नी गोङा र्वा। 5 गो गानीनुङ बाङडोलो र्वाङडोम ओराम ल्वा हाम मेमिम्नी? 6 मेराम मु़चु़ रेम्बेसिनु़ र्वाक्साका उमा थारी रोमिमसम्म हामका भोप्थाडु़मिम बु मेराम गानी चनी। 7 डु़म्लाकु कोर्थो़लाममिम यु़मका थसिक्साका खारी बेत्तोङा लेडु़। कोङनिमका ओरामलाई भोम्थामिमिमसम्म मेमङा बु़होम बु। 8 मेम्मा डु़म्लाकु कोर्थो़लाम बमिम मेराम मु़चु़ रो। ङाचो़ येशूका उनीमा सिलाम लुक्पा सामका गुलाई सेन्मी, मा गुमी योमिमिमकु झ्वाक्पा यु़मका पुयु़लुबेन्मी। 9 मेराम मु़चु़ रो मा शैतानकु यु़मका लिमा यु़मखारीमिम, हेल्लो वो मेल्वाम्मा लिमा खारीमिम नुङ छेखोपमिम बु़, 10 मा पुयु़ लुक्पा मु़चु़मिमलाई मेरामका खोत्ले मेजो़पा ल्वाका लु-फेले बु़मी। मेर्मिम पुयु़ लुमी हेङालोने सेल्सिक्पा आच्छाङाकाम ल्वा मेर्मिमका मेद्वाक्मिवा मा मेरमिवा, 11 मेर्मिमका आच्छाङाकाम ल्वाडा थो़रलु़मु मेबिम्सिक्मिवामका, माम्चु़नीका मेर्मिमलाई लिमा ल्वाडा थो़रलु़मिनु़ र्वाक्साका डिन्सोम्डी। 12 मेम्मिमका येशू ख्रीष्टकु दुथाममिम आच्छाङाकु ल्वाडा थो़र मेलु़पा, लावो मेजो़पा ल्वाडा भ्रसिक्पा खोत्ले मु़चु़लाई माम्चु़नीका मुमा बेन्मी। छो़म थो़र लु़निम बानी 13 माम्चु़नीका रिखाम बेपा वा-ल्वाकनी, इनीमा लागि माम्चु़नीलाई हेल्लो लोवो आलासो़ ग्वामुङा बासी। हेङालोने माम्चु़नी पेलका गानीलाई सेपा उनी मु़चु़ दु़म्बेट्निम नुङ आच्छाङाकाम ल्वाडा बेन्निम थो़रलाम माम्चु़नीका गानी खोत्लेडाम ङादो सेल्सिमु छेट्निम बु। 14 गुकु गानीलाई थो़बेत्तोकोम जो़पा-सेलालामका सेल्सिमु लागि माम्चु़नीका येट्निम बु। गानी वो इकीमा ङाचो़ येशू ख्रीष्टकु यु़म-झ्वाक्सीकाम दो़दो़वा डार्नी। 15 मेम्मिमका वा-ल्वाकनी, गुकु गानीलाई आकी सिजेमका लोवो सेलाखाजेमका लोवो सीत्तोकोम सीसि होम्साका बेनिम बानी, मा थो़र लु़निम बानी। 16 गुइलाई रिखाम बेपा ङाचो़ येशू ख्रीष्ट नुङ माम्चु़नी इकी पापकु दिदामका हेल्लो वो मेहुक्पा सो हन्बेसाड्डामिम बु, मा जो़पा ल्वा लथाक्पा दु़म्बेसाड्डामिम बु। 17 इकी सो हन्बेट्पा माम्चु़नीका खोत्ले इनी जो़पा खारी बेसीडा नुङ जेसीडा सो हन्बेन्सानिमिनु़, मा ख्लो़निमिनु़ र्वाक्साका सो़म्दी बोकु। |
© Wycliffe Bible Translators, Inc. All rights reserved.
Wycliffe Bible Translators, Inc.