२ थेसलोनिकी 1 - थुलुङ राईपावलकु सेव 1 गो पावल, सिलास नुङ तिमोथीका गानी माम्चु़नी इकीमा पाप नुङ ङाचो़ येशू ख्रीष्टकु मण्डली थेसलोनिकीमिमलाई ओराम सेलाखाजेम र्याक्तोङा बोकु। माम्चु़नी पाप नुङ ङाचो़ येशू ख्रीष्टलामका गानी दिदाम नुङ न-भ्रसी ल्वानी। 2 माम्चु़नी पाप नुङ ङाचो़ येशू ख्रीष्टलामका दिदाम नुङ न-भ्रसी ल्वानी। पावलकु सो़म्दी: थो़मतेर्सीडला सो हन्बेसी 3 वा-ल्वाकनी, इनीमा लागि गुकु हेल्लो लोवो माम्चु़नीलाई आलासो़ ग्वामुङा बासी। ओराम जो़पा दु़म, हेङालोने ख्रीष्टडा गानी छो़म थो़रलु़त्तो लनिम बु, मा वाङमिम मु़चु़नुङ वो छो़म रिखाम बेबोनिमिम बु। 4 मेम्मिमका खोत्ले इनीमा थो़मतेर्सी नुङ छो़म दु़खा ल्वान्निलो इम्निम नुङ थो़रलु़न्निमकु दुथाम आकी नो़ डोक्पु बेत्तो माम्चु़नीकु वाङमिम मण्डलीनुङ सो़कु। 5 माम्चु़नीका जो़होमका निया बोमी मा उनीमा किब्दीकाम लागि गानी घ्रेट्पा दु़म्निम बु र्वाक्पा इनीमा दु़खाका रेम्बु़। 6 माम्चु़नीका जो़होमका निया बोमी, उहेम मु़चु़मिमका गानीलाई दु़खा ग्वानी, गुमीका वो मेर्मिमलाई देन्दे ग्वामी। 7 मेम्मा यु़मनुङमा उनी पाह्रीचो़मिमनुङ ङाचो़ येशू रेम्बेम्सिमिलो गानी दु़खा ल्वापामिमकाम न-भ्रसी बेन्मी मा आकीमा वो न-भ्रसी बेन्मी। 8 गुमी मुकु भुल्मुडा योमिमा माम्चु़नीलाई मेछेपामिम, मा इकीमा ङाचो़ येशू ख्रीष्टकु जो़पा-सेला होम्साका मेबेपामिमलाई देन्दे ग्वामी। 9 हेल्लो वो त्वारो़म मेल्वापा बेसाका पुयु़लुक्पा देन्दे मेर्मिमका ल्वामी। मेराम ने ङाचो़ येशूडाम नुङ उनीमा झ्वाक्पा यु़मडाम वाङ दु़म्मु सो़। 10 ङाचो़ येशू योमिमिमनेम ओर्मिम खोत्ले ल्वा रोथी। सेपा उनीमा मु़चु़मिमका गुमीलाई डोक्पु बोमी मा गुमीडा थो़रलु़पा खोत्ले ङाङाया दु़म्साका गुमीलाई डोक्पु मिम्मी। गानी वो मेर्मिमनुङङा दु़म्नी, हेङालोने गुकु ल्वात्तोको-सो़त्तोकोम ल्वाडा थो़रलु़न्नी। 11 ओराम ल्वा नडा मिम्साका गुकु हेल्लो लोवो सो़म्दी बोकुमिम बुकु, माम्चु़नीका गानीलाई उनीमा किब्दीगोडा हुमु घ्रेट्पा दु़म्बेनिमिनु़। मेम्मा गानी इनीमा नका नुङ थो़रका बेन्निम खोत्ले खारीमिम उनीमा यु़मलामका दु़म्नु़। 12 मेम्साका इकीमा ङाचो़ येशूकु नङ गानीगोडा कोसिनु़ मा गुमीनुङ गानी वो कोन्सिनी। इकीमा माम्चु़नीकु दिदामका नुङ ङाचो़ येशू ख्रीष्टलामका ओर्मिम खोत्ले दु़म। |
© Wycliffe Bible Translators, Inc. All rights reserved.
Wycliffe Bible Translators, Inc.