२ पत्रुस 3 - थुलुङ राईङाचो़ येशू योक्पा नेम 1 द्वादीबुङ ङोप्सो़नी, गानीलाई र्याक्तोम ओराम आमा ननोम सेलाखाजेम सो़। गानी जो़पा मिम्नी र्वाक्साका मिम्बेन्मु लागि सो हन्बेन्सामु निफिङा सेलाखाजेम गो गानीलाई र्याक्तोम। 2 माम्चु़नीकु सिजेम जेपा उनी मु़चु़मिमका माके र्वाम्डिम ल्वा नुङ इकी ङाचो़ नुङ गुइलाई सेल्पाका इनी थु़र्मामिमलामका बेबेट्निम ल्वा गो मिम्बेनिनी। 3 खोत्लेडाम ङादो गानी ओराम ल्वा थेसिथेन्मु बासी, हुक्पा थारी बिलि गानीलाई सेम्ला बेट्पा मु़चु़मिम रोमी, सेम्ला बेसी नुङ मेर्मिमकु उनी मेजो़पा नमिम होम्साका दोमी। 4 मेर्मिमका र्वामी, “येशू आथावो योङु र्वाक्साका याचे जेम्डिम हे दु़स्ता? सु़म्दिसेर प्रङ्स्तामा सु़म्दिमो आथाम इकी ङाउ-खुउ बाम्डिमकु ङादोम थारी आथाम खोत्ले ल्वा मेङा बुहोम बु।” 5 लावो माम्चु़नीकु सिजेमलामका पाह्री नुङ सुबु माकेङा प्रङ्मिडिम ल्वा मेर्मिमका थेसा-थेसाका वो प्ल्वामी। सुबु ने कुलामका फ्वाक्साका कुलामका बनेदु़स्ता र्वाक्पा ल्वा वो थेसा-थेसाका मेर्मिमका प्ल्वामी। 6 मेराम कुका होङकोर्मा योक्तामा माकेम सु़म्दिसेर पुयु़लुस्ता। 7 मेराम सिजेमकाङा ओम्लोम सुबु नुङ पाह्री मुका ख्याबेन्मु लागि जु़ल्मा बु। मेर्चिपलाई माम्चु़नीकु लाम्दीडा लाम्मेदिपा मु़चु़मिम पुयु़लुमिलोम निया दु़म्मिम नेमसम्म जु़ल्मा बु। 8 लावो द्वादीबुङ ङोप्सो़नी, ओराम कोले ल्वा गानी मेप्ल्वानी: ङाचो़काम लागि कोलेम को धु़मसङ थ (१,०००) मा को धु़मसङ थ कोलेम होप्मामङा बु। 9 ङाचो़का याचे जेम्डिमडा गुमी छु़मी र्वाक्पा याङ-याङकु थेसिथेसी होङङा ङाचो़ मेछु़मी। सु़ वो पुयु़मेलुमिनु़, लावो खोत्लेका मेजो़पा खारी बोमु डिन्मिनु़मा गुमीडा ख्लोम्सिमिनु़ र्वाक्साका गुमीका गानीलाई इम्साका लम्थामी। 10 लावो ङाचो़ योमिमिम मेरामनेम खुचु़वा होङङा मेमिम्मा नेम रो। पाह्री डोक्पु लो़लामका येमा दाम, मेगोडा बाट्पा खोत्ले मुका ख्यामी। सुबु नुङ सुबुडा बाट्पा खोत्ले पुयु़लुमी। 11 खोत्ले आरेसाकाङा पुयु़लुमी। मेम्मिमका गानी हेप्माम मु़चु़ दु़म्मु बासी? गानी सेपा दु़म्साका माम्चु़नीकु लाम्दीडा लाम्दिमु बासी। 12 माम्चु़नी योमिमिमनेम गानी लन्थानी, मा मेराम थारी दालाङा रोबेन्मु माल्नी। मेनेम पाह्री मुका छो़रो़प दु़म मा मेसिन्डा बाट्पामिम खोत्ले मुसामका पिलियोमी। 13 लावो गुमीका गुइनुङ याचे जेम्डिम होङङा लाले पाह्री नुङ लाले सुबु लडी, मेसिन्डा खोत्ले माम्चु़नीकु न होप्माम दु़म। 14 मेम्मिमका द्वादीबुङ ङोप्सो़नी, गानी ओर्मिम ल्वाकु दुथाम लथाक्पा मु़चु़ दु़म्निमका उनी मिक्सीलामडा गानी चाप्तो मेचाप्तो छु़ल मान्थिम नुङ मेख्लो़ट्पा दु़म्साका गुमीडा न-भ्रसिक्साका बानी। 15 गानी ओराम मिम्नी, ङाचो़कु इम्सीका मु़चु़मिमलाई सेल्सिबेट्पा थारी ग्वाकु़। छो़म इकी द्वादीबुङ पावलका वो माम्चु़नीका गुलाई ग्वाम्डिम नेप्चीका गानीलाई ओरामङा र्याक्तु़म बाइडा। 16 उमा खोत्ले सेलाखाजेमडा गुका ओर्मिम ल्वाङा र्याक्तु़म बु। उमा सेलाखाजेम गोडा याङ ल्वा थेसिथेन्मु मेझापा बु। मेसीसिपा नुङ याक्के थो़रनुङमा मु़चु़मिमका मेरामलाई माम्चु़नीकु याङ सिजेम होङङा कोर्थो़ हेर्मिडिम बु। आरेसाका मेर्मिमका उनी त्वापलाई पुयु़लुबेन्मी। पत्रुसकु हुम-दडाम ल्वा 17 मेम्मिमका द्वादीबुङ ङोप्सो़नी, ङादोङा ओराम ल्वा चक्निम लोवो चङचङया बानी। मेम्साका गानी डु़म्ला होम्साका मेदोपा मु़चु़मिमकु उनी ख्लो़सीका ताङताहेरथो़ मेलनिमा इनी येम्सिखोपलाम मेवाम्नी। 18 लावो इकीमा ङाचो़ नुङ गुइलाई सेल्पा येशू ख्रीष्टकु दिदामडा बर्तो लक्नी मा गुमीलाई छेत्तो लक्नी। ओम्लो नुङ हेल्लो लोवो उनी यु़म झ्वानु़म बुनु़। आमेन। |
© Wycliffe Bible Translators, Inc. All rights reserved.
Wycliffe Bible Translators, Inc.