२ पत्रुस 2 - थुलुङ राईलिमा ल्वा सीपामिम मा मेर्मिमकु पुयु़लुक्सी 1 लावो इस्राएलीमिमगोडा लिमा ल्वा सीपा मु़चु़मिम बाम्डिम होङङा गानीगोडा वो माम्चु़नीलाम-जेपा लिसिक्पामिम बुमी। मेर्मिमका ताङताहेरथो़ लक्पा लिमा सीसिमिम मेचहोमका सीमी, मेर्मिमकाम लागि थि सोक्साक्पा डोक्पु ङाचो़ ख्रीष्टलाई वो मेरमी मा दालाङा मेर्मिम पुयु़लुबेन्ला सो़म्सिमी। 2 हापा मु़चु़मिमका मेर्मिमकु क्रो़मलु़पा लाम्दी लाम्दिमी मा आच्छाङाकु लाम्दीकु दुथाम मु़चु़मिमका मेजो़पा र्वामी। 3 रारी बेपा दु़म्साका मेर्मिम सीपाका लिमा ल्वा बनेबेसाका गानीलाम खउलुङ रमी। मेर्मिमका देन्दे ल्वामी र्वाक्साका ङादोङा मुलु़ दु़स्ताम बु मा मेर्मिम पुयु़लुमी र्वाक्पा ल्वा बुहोङङा बु। 4 पाह्रीचो़मिमका छु़ल बेम्डिलो वो माम्चु़नीका मेडिट्मिवा। गुमीका मेर्मिमलाई खादीगोयु़ घ्रोम्सोम्डी मा निया दु़म्मिम नेमसम्म लागि तुकुम्चिमडा जु़ल्थाप्मी। 5 माम्चु़नीका माकेम सु़म्दिसेरलाई मेडिट्मिवा, लावो माम्चु़नीकु लाम्दीडा मेलाम्दिपा सु़म्दिसेरडाम मु़चु़मिमडला होङकोर्मा थो़ट्मिडी। मेकोतिलो माम्चु़नीकु न होम्साका बुमु मु़चु़मिमलाई जो़पा-सेला थो़बेट्पा नोआ नुङ उमा नेमडाम येतले मु़चु़मिमलाई कोङङा गुमीका गेट्मिडी। 6 गुमीका सदोम नुङ गमोरा शहरलाई देन्दे ग्वाक्साका बुलु़ वाबेट्मिडी मा फोका बनेम्डी। मेम्मा माम्चु़नीकु लाम्दीडा मेलाम्दिपा मु़चु़ हे दु़म र्वाक्पा मेराम रेम्बेम्डी। 7 माम्चु़नीका उनी न होप्माम लोतलाई फ्वाक्मिडी। डु़म्ला होम्साका मेदोपा मु़चु़मिमकु घ्राम्लु़पा बेसी-दोसीडाम गु उ न नो़पा बाइडा। 8 गु माम्चु़नीकु न होप्माम मु़चु़ बाइडा, लावो नेम्फु सिन्था गु मे रु़चो़ मु़चु़मिमनुङ बाइडा। गुका ल्वास्तु़म थो़स्तु़म ल्वाका उ गो मेभ्रसावाम बाइडा। 9 आरेसाका उनी लाम्दीडा लाम्दिपा मु़चु़मिमलाई दु़खालामका हेसाका फ्वामु नुङ मेजो़पा खारी बेपामिमलाई निया दु़म्मिम नेमसम्म हेसाका जु़ल्थामुमि र्वाक्पा ङाचो़का चमी। 10 मेजो़पा न होङङा बोमु माल्बाल्पा मा माम्चु़नीकु साखामलाई हाम होङङा वो मेलु़पा मु़चु़मिमका ने छो़म देन्दे ल्वामी। मेर्मिम मु़चु़ मेङिपा नुङ डोक्पु लिसिक्पा दु़म्मी मा पाह्रीलाम यु़मचो़मिमलाई वो डक्साका जेमु मेङिमी। 11 मेर्मिमडाम ने पाह्रीचो़मिम हापा सोनुङमा नुङ हापा यु़मनुङमा लोवो ङाचो़कु ङादोडा मेर्मिमलाई डक्साका मुमा मेबेन्मी। 12 लावो मेर्मिम मु़चु़का उनी त्वाकाङा थेसिमेथेट्मिमिम ल्वाकु दुथाम मेजो़पा जेमी। मेर्मिम ने मेमिम्साका खारी बेपा मा चु़म्मुमिमा सेन्मुमि लागि कोङङा गम्डिम सो़ब्दीपोमिम होप्माम बुमी। मेर्मिम मु़चु़ सो़ब्दीपोमिम होङङा सिमी। 13 मेर्मिमका मेजो़पा बेम्डिमका मेजो़पा बेला सो़म्सिमी। मेर्मिमका नेम्फुङा मेजो़पा खारी बेसाका गेर्सिमु द्वामी। मेर्मिम ने घ्राम्लु़पा नुङ मेजो़पामिम सो़, गानीनुङ ग्रुला पेप्डा गन्मिलो छो़म पोमी-डुमिमा गेर्सिप्मी। 14 मेर्मिमका मेसेमनुङ अम्पा नका मेसेमलाई रेप्मी मा छु़ल बोमुका हेल्लो वो उनी गो मेतिम्सी। याक्के थो़रनुङमा मु़चु़मिमकु न मेर्मिमका फाल्सामी। मेर्मिमकु न-गो रारी बोमु छो़म थेट्पा बु। मेर्मिम वाइतो ल्वापामिम सो़। 15 मेर्मिमका जो़पा लाम्दी डिसाका ताङताहेरथो़ लक्पा बालामकु लाम्दी लाम्दिम्डिम बु। मे बालाम बोअरकु तारापाचो़ बाइडा, मेजो़पा खारी बेसाका खउलुङ डु़म्मु द्वाक्पा गु बाइडा। 16 लावो गुका छु़ल बु़डु़मका भुर्ला सो़सिड्डाम बाइडा। उ गधाका मु़चु़ होप्मामङा जेस्तामा माम्चु़नीलाम जेपालाई न मान्थिम खारी बेसीडाम भोप्डु़। 17 लिमा ल्वा सीपा ओर्मिम मु़चु़ कु मेपुट्पा कुकु नो़मिम नुङ ब्लोजु़का हुट्पा सिखाप होप्माम सो़। माम्चु़नीका मेर्मिमकाम लागि छो़म तुकुम्चिमका हुपा खोम बनेबेम्डिम बु। 18 मेर्मिमका हाम ना हामकाम ल्वाडा डोक्पु लिम्सिमी। मेर्मिमकु क्रो़मलु़पा मेजो़पा नका मेजो़पा लाम्दीलाम मालो स्वामु चो़म्पा मु़चु़मिमलाई ने कोक्साका छु़लथो़ वाम्बेन्मी। 19 मेर्मिमका उनी त्वापङा त्वापलाई पुयु़लुबेट्पा बादु़खाम नुङ छु़ल गोडा बुमी लावो मु़चु़मिमलाई ने मेरामलामका वाङ बेपा याचे जेमी। 20 मेर्मिमका इकी ङाचो़ नुङ गुइलाई सेल्पा येशू ख्रीष्टलाई छेसाका वो सु़म्दिसेरडाम मेजो़पालाम स्वामी। मेम्मा आथावो मेरामथो़ङा दु़म्मिमा मेरामकु डु़ल्चो़ दु़म्मी माला ङादो बाम्डिमडाम वो छो़म मेजो़पा दु़म्मी। 21 मेर्मिमका आच्छाङाकाम लाम्दी छेसाका नुङ मेर्मिमलाई ग्वाक्मा माम्चु़नीकु डु़म्लाडाम ख्लोम्सिमिमिमडाम ने आच्छाङाकाम मे लाम्दीङा मेर्मिमका मेचक्मिवाम माला मेर्मिमलाई जो़पा दु़म्सावा। 22 ओराम उखान होम्साका मेर्मिमलाई आच्छाङा दु़स्ता: “ख्लेबा उ फोङकुथो़ङा ख्लोसिमा ल” मा “सो़ल्मा ब्वाकु खोमी ख्लोसिमा हिलोडाङा लमा पुलिएली बु़।” |
© Wycliffe Bible Translators, Inc. All rights reserved.
Wycliffe Bible Translators, Inc.