२ पत्रुस 1 - थुलुङ राई1 गो येशू ख्रीष्टकु डु़ल्चो़ नुङ थु़र्मा सिमोन पत्रुसका, इकीमा माम्चु़नी नुङ गुइलाई सेल्पा येशू ख्रीष्टकु चोमिक्सी मान्थिम नुङ जो़पा खारी बेसीलामका आकीमा होप्माम हापा थिकाम थो़र ल्वापा गानीलाई ओराम सेलाखाजेम र्याक्तोङा बेउ। 2 माम्चु़नी नुङ इकीमा ङाचो़ येशूलाई गानी आच्छाङाका छेनिमिमका माम्चु़नीका गानीलाई दिदाम नुङ न-भ्रसी छो़म हापा ग्वानिमिनु़। थो़रडा छो़म बर्तो लक्नी 3 गुमीलाई छेडिमिमलामका माम्चु़नीकु लाम्दीडा लाम्दिमु लागि चाहेबिइमिम खोत्ले ल्वा माम्चु़नीकु उनी यु़मका गुइलाई ग्वाक्साड्डामिम बु। उहेमका उनी त्वाकु यु़म-झ्वाक्सी नुङ जो़पा दु़म्सीलामका गुइलाई येसाड्डामी। 4 मेलामका छो़म डोक्पु नुङ हापा थिकाम उनी याचेजेसीमिम गुइलाई ग्वाक्साड्डामिम बु। मेम्मा मेरामलामका गानी माम्चु़नी हेप्माम बुमी मेप्मामङा दु़म्नी मा मेजो़पा नका बेबेद्वाक्पा सु़म्दिसेरडाम मेजो़पा बेसीलामका प्लु़सिमु चाम्नी। 5 मेम्मिमका इनी थो़रडला इनी जो़पा दु़म्सी काप्तो लक्नी, जो़पा दु़म्सीडला न छेबेसी, 6 इनी न छेबेसीडला त्वापलाई जो़होमका जु़ल्सी, मा त्वापलाई जो़होमका जु़ल्सीडला इम्सिसी, इनी इम्सिसीडला माम्चु़नीकु लाम्दीडा लाम्दीसी, 7 माम्चु़नीकु लाम्दीडा लाम्दीसीडला वा-ल्वाकडा न-थो़म बेबेसी, वा-ल्वाकडा न-थो़म बेबेसीडला रिखाम काप्तो लक्नी। 8 ओर्मिम खोत्ले ल्वा गानीनुङ छो़म बु माला गानी इकी ङाचो़ येशू ख्रीष्टकु दुथाम चनिमिमका हाम ना हामकाम नुङ हाम ना हाम मान्थिम मेदु़म्नी। 9 लावो कोङनिमनुङ ओर्मिम ल्वा मिबु माला ने मेराम मु़चु़का जो़होमका ल्वामु मेचाप्सु़। मेराम मिक्सीका मेल्वापा सो़। ङादोम उ छु़लमिमडाम गुलाई छेको-छेको बेम्मा गुका प्ल्वास्तु़म बु। 10 मेम्मिमका वा-ल्वाकनी, माम्चु़नीका गानीलाई येट्निम नुङ छेट्निम र्वाक्पा रेम्बोमु छो़म सो हन्पा दु़म्नी। गानी आरे बोनी माला इनी थो़रडाम हेल्लो वो ताङताहेरथो़ मेलनी। 11 मेम्मा इकी ङाचो़ नुङ गुइलाई सेल्पा येशू ख्रीष्टकाम हेल्लो लोवो दु़म्पाम बाट्पा किब्दीगोनो हुमु गानीलाई छो़म हुनाखाना दु़म। माम्चु़नीकु सिजेमडा न सोमु 12 मेम्मिमका ओर्मिम गानी चक्निम बु मा गानीनुङ बाट्पा आच्छाङाकाम ल्वाडा गानी छो़म थो़रलु़निम बुनी लोवो ओर्मिम ल्वा गो गानीलाई हेल्लो लोवो मिम्बेनिनी। 13 ओ सुबुडा आमा मिरो़मडा बुङुमिमसम्म गानीलाई मिम्बेन्मु लागि फमु जो़पा लु़ङडोम बु। 14 हेङालोने इकी ङाचो़ येशू ख्रीष्टका गोलाई रेम्बेट्ङिडिमिम बु, गो दालाङा ओराम मिरो़म डिन्मु बासी। 15 गो सिङुमिम चङडा वो ओराम ल्वा इनी नडा हेल्लो लोवो गानी मिम्थाट्नी र्वाक्साका आ चाप्सी बेउ। 16 इकी ङाचो़ येशू ख्रीष्ट छो़म यु़मनुङमा नुङ आथावो योमिमिमकु दुथाम गानीलाई गुकु थो़बेत्तोकोलो बाछेन्दा लिसिक्साका बनेबेम्मा सो़म्दी होप्माम सो़त्तोकोम मेबायावा। लावो उनी डोक्पु दु़म्सी गुकु आकी मिक्सीका ल्वात्तोको। 17 गुमीलाई माम्चु़नी पापका डोक्पु मिम्मिडी मा उनी यु़म झ्वाबेट्मिडी। डोक्पु यु़म-झ्वाक्सीलामका उनीमा लो़लामका येशूलाई र्वाक्ता, “ओराम गो द्वाक्पुमिम आमा तारापाचो़, ओरामडाम गो छो़म गेर्सिक्पा बुङु।” 18 माम्चु़नीकु भ्र्वाडला गुकु गुमीनुङ बात्तोकोलो पाह्रीलाम योक्पा मेराम लो़लाम आकी त्वाकाङा थो़त्तोकोम बाइडा। 19 मेम्मिमका गुकु थो़त्तोकोम माम्चु़नीलाम-जेपामिमकु सिजेमडा छो़म आच्छाङा दु़स्ताम बु। नेमसोसोम सोरलुङ मेओप्थु़म नुङ नेमसोसो मेदु़मथु़मसम्म तुकुम्चिमडला झ्वाक्पा ओल होप्माम मेराम सिजेमडा न सोक्नी माला गानी जो़पा बोनी। 20 खोत्लेडाम ङादो ओराम ल्वा गानी थेसिथेन्मु बासी: माम्चु़नीकु सिजेमडाम माम्चु़नीलाम जेसी उहेम वो माम्चु़नीलाम-जेपामिम उनी त्वाका र्वाम्डिम मेएँ। 21 हेङालोने माम्चु़नीलाममिम जेसी हेल्लो वो मु़चु़कु नलामका लुक्ताम मेएँ, लावो माम्चु़नी-पेलका जेबेट्मिडिमा मु़चु़मिमका माम्चु़नीलाम जेम्डिम बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.