२ यूहन्ना 1 - थुलुङ राई1 माम्चु़नीका छेट्नामिम द्वादीबुङ रिचो़ नुङ इमा चो़मिमलाई मण्डली रेपा गो ङाउ यूहन्नाका ओराम सेलाखाजेम र्याक्तोङा बेउ। गो गानीलाई न-गोलामका रिखाम बोनिनी। गो कोङङा गानीलाई रिखाम बोनिनिमिम मेएँ लावो आच्छाङाकाम सीसि चक्पा खोत्लेका गानीलाई रिखाम बोनिमी। 2 आच्छाङाकाम ल्वा गुइनुङ दु़म मा हेल्लो लोवो गुइनुङ दु़महोम बु मेम्मिमका गानीलाई गुकु रिखाम बोकु। 3 माम्चु़नी पाप नुङ पापकु तारापाचो़ येशू ख्रीष्टलामका दिदाम, न-थो़म नुङ न-भ्रसी आच्छाङाकाम ल्वा नुङ रिखामडा गुइगोडा दु़म। आच्छाङाकाम ल्वाडा बुमु 4 माम्चु़नी पापका बेबेसाड्डामिम होङङा कोङनिम इनीमा चो़मिम आच्छाङाकाम ल्वाडा लाम्दित्तोङा बोमिमिम डार्तोमी मा गो छो़म गेर्सी द्वाङडोम बु। 5 द्वादीबुङ रिचो़, गानी बोमु बासी र्वाक्साका र्याक्तोङा बेउमिम ओराम लाले सीसि ने मेएँ लावो माके आथामङा गुइनुङ बाट्पा ल्वा सो़। गो र्वाङु गुइ रिखाम बेबी। 6 माम्चु़नीका बेबेसाड्डामिम होम्साका बुमुङा ओराम रिखाम सो़। गानी ङादो आथामङा थो़न्निम बोमु बासिक्पा ल्वा ने गानी रिखामडा बुमु-दोमु बासी। 7 लिमा ल्वा सीपा मु़चु़मिम सु़म्दिसेरडा रोम्डिम बु। मेर्मिमका येशू ख्रीष्ट मु़चु़ दु़म्साका योम्डिम मेएँ र्वामी। आरेप्माम मु़चु़ लिमाचो़ नुङ ख्रीष्टकु कोर्थो़लाम बक्पा मु़चु़ सो़। 8 चङचङया बानी, गानी हामकाम लागि खारी बेत्तोङा लेनी मेराम दाम्सोक्पा मेएँ लावो छो़म पुरस्कार ल्वामु चाप्नी। 9 ख्रीष्टकु सीसिडा हेल्लो लोवो मेबाट्पा मा ओरामडाम हेम्साका लक्पा मु़चु़नुङ माम्चु़नी मेदु़म्मी। ख्रीष्टकु सीसिडा बाट्पाम बाट्पा मु़चु़काडा पाप नुङ तारापाचो़ निफिङा दु़म्मी। 10 कोङनिम मु़चु़ इनीमा घ्रो़म्दीडा रो मा ओराम सीसि मेरेडु़वा माला मेराम मु़चु़लाई नेमडा मेयेट्नी। सेव मेसाट्नी। 11 उहेम मु़चु़का मेराम मु़चु़लाई सेव साडु़ गु वो मेरामकु खारीडा बासी। 12 गो गानीलाई र्वामु बासिक्पा ल्वा ने हापाङा बु लावो कागज नुङ मसीका र्यामु आमा न मिबु। मेम मेबेसाका, गुइ छो़म गेर्सिडिनु़ र्वाक्साका इनीमाडा रोमुमा रेम-रेम बेसाका ल्वाबोमु आमा न बु। 13 माम्चु़नीका छेट्मिडिम जाउमो इमा ल्वाककु चो़मिमका गानालाई सेव र्वाम्डिम बु। |
© Wycliffe Bible Translators, Inc. All rights reserved.
Wycliffe Bible Translators, Inc.