२ कोरिन्थी 9 - थुलुङ राईयरूशलेमडाम थो़रलु़पामिमलाई ख्लो़म्डिम 1 यरूशलेमडा बाट्पा माम्चु़नीकु मु़चु़मिमलाई ग्वामु ग्वा-ग्वाकु दुथाम गो गानीलाई र्यामुम बुमु मेबासी। 2 हेङालोने ख्लो़-ख्लो़ द्वाक्पा इनीमा न गो चक्पु। माम्था आथामङा अखैयाडाम गानी थो़र लु़पामिमका ग्वा-ग्वा थु़र्मु खाम्निमिम बु र्वाक्साका माकेडोनियाडाम मण्डलीमिमनुङ इनीमा दुथाम डोक्पु ल्वा बेउतोम बु। मेप्माम इनीमा नका मेर्मिमगोडाम हापाकाम सो हन्डाम बु। 3 ओराम ल्वाकु दुथाम इनीमा लागि गुकु बेत्तोकोम डोक्पु ल्वा लिमा मेदु़म्नु़, मा गानीलाई बेबेट्निनिम होम्साका गानी झो़म्जो़ल्सिट्नी र्वाक्साका ओम्लो ल्वाकमिमलाई थु़र्तोङा लेट्पु। 4 माकेडोनियाडाम थो़रलु़पामिमनुङ गो मेसिन्डा रोङुलो गानी झो़म्सिट्निम मेबायावा माला गानीडला छो़म थो़रलु़त्तोकोमका आकी क्रो़म लु़ मा इनीमा वो क्रो़म लु़। 5 मेम्मिमका गानी ग्वाकु र्वाक्निम ग्वा-ग्वा ग्वामु लागि झो़म्जो़ल्सिट्नी र्वाक्साका ङादोङा मे ल्वाकमिमलाई इनीमाडा थु़र्मु जो़पा लु़ङडो। आरेसाका मेराम ग्वा-ग्वा द्वाक्साका ग्वाक्मा दु़म्नु़, ग्वा-ग्वा मेद्वाक्तो मेएँ। हापा फोट्पाका हापा ल्वासु़ 6 ओराम ल्वा मिम्नी वो: कि-कि भ्रल फोट्पाका कि-कि फकु़, मा हापा भ्रल फोट्पाका हापाङा फकु़। 7 खोत्ले मु़चु़का उ नडा हाङको ग्वाक्पु र्वाक्ताम बु मेकोतिङा ग्वाक्नु़। ग्वा-ग्वा मेद्वाक्साका मेएँ मा ग्वामुङा बासी र्वाक्साका वो मेएँ। हेङालोने गेर्सिक्तो ग्वाक्पा मु़चु़लाई माम्चु़नीका रिखाम बोमी। 8 माम्चु़नीका गानी चाहेबोनिमिमडाम वो हापा जि-वा ग्वामु चाम्निमी। मेम्मा गानीलाई हामकाम वो खेरेला मेदु़म, मेम्मिमका गानी जो़पा खारी खोत्ले बोम्सोमु चाम्नी। 9 माम्चु़नीकु सिजेमडा आरेसाका र्याक्मा बु, “गुका फोडु़ मा उनी हाम वो मेबाट्पामिमलाई ग्वाकु़मी, गुका बु़डु़म जो़पा खारी हेल्लो लोवो दु़महोम बु।” 10 फोन्मु लागि भ्रल नुङ पोमुथोक माम्चु़नीका ग्वाक्सामी। मेम्मा गानी चाहेबोनिमिम खोत्ले भ्रल गुमीका ग्वानिमी मा ल्याबेन्मी, मा ग्वा-ग्वा द्वाक्पा इनीमा न-गोका ग्वानिमका इनीमा जो़पा खारी बेसीडा गुमीका बर्बेत्तो लनिमी। 11 गानी छो़म ग्वा-ग्वा द्वाक्पा दु़म्मु लागि माम्चु़नीका गानीलाई खोत्लेडा लिट्पा-पेपा दु़म्बेनिमी। मेम्मा इनीमा ख्लो़पा नका ग्वानिमिम मेराम गुकु वाङमिम मण्डलीडा दो़कुलो मेर्मिमका माम्चु़नीलाई आलासो़ ग्वामी। 12 ओराम इनीमा ख्लो़पा खारीका माम्चु़नीकु मु़चु़मिमकाम खेरेलाडा ख्लो़यु़मिम कोङङा मेएँ लावो माम्चु़नीलाई आलासो़ ग्वाक्पा न ओरामका हापा रेडु़। 13 गानी बोनिमिम ओराम ग्वाक्पा खारीकु दुथाम मेर्मिमका माम्चु़नीकु नङ कोमी। हेङालोने मेर्मिमलाई नुङ वाङमिम थो़रलु़पामिमलाई इनीमा ग्वा-ग्वा द्वाक्पा नका ग्वाक्निम ल्वाका ख्रीष्टकु जो़पा-सेलाका र्वाक्ताम होङङा गानी बुनी-दोनिमिम रेम्बु़। 14 मेम्मा माम्चु़नीका गानीलाई आकोम डोक्पु दिदाम ग्वाक्निमिमका मेर्मिमका गानीलाई छो़म रिखाम बेसाका इनीमा लागि सो़म्दी बोमी। 15 र्वामुङा मेझापा हापा थिकु राप्लावाकाम लागि माम्चु़नीलाई आलासो़ दु़म्नु़। |
© Wycliffe Bible Translators, Inc. All rights reserved.
Wycliffe Bible Translators, Inc.