२ कोरिन्थी 8 - थुलुङ राईग्वा-ग्वा द्वाक्पा ननुङमा दु़म्मु सो हन्बेसी 1 वा-ल्वाकनी, माकेडोनियाडाम मण्डलीमिमलाई माम्चु़नीका ग्वाम्डिम दिदामकु दुथाम गानीलाई थो़बेन्मु आकीमा न बु। 2 छो़म इम्मु मेचाप्मिवाम दु़खाडा वो छो़म भ्रम्सिम्डी मा मेर्मिम दु़खापोङा लोवो छो़म ग्वा-ग्वाद्वाक्पा नका मेर्मिमका ग्वाम्डी। 3 गो मेर्मिमकु दुथाम सो़उ, मेर्मिमका ग्वामु चापाडाम वो हापा उनी त्वाकु ग्वा-ग्वा द्वाक्पा नका ग्वाम्डी। 4 यहूदियाडा बाट्पा माम्चु़नीकु मु़चु़मिमलाई ख्लो़मु ल्वाकुनु़ र्वाक्साका गुकुनुङ मेर्मिमका छो़म र्वाम्डी। 5 गुकु मेर्मिमलाम ल्वापा न बेत्तोकोमडाम वो हापा मेर्मिमका बेम्डी। ङादो मेर्मिमका उनी त्वापलाई ङाचो़ येशूकु ल्वाडा ग्वाम्डी। मेम्मा माम्चु़नीकु न होम्साका उनी त्वापलाई ङा आकी ल्वाडा ग्वाक्तिकी। 6 मेम्मिमका तीतसका ङादो आथामङा गानीगोडा इनीमा रिखामकु ग्वा-ग्वा फक्पा ओराम खारी बोमु चो़म्डु़मका, इनीमा ग्वा-ग्वा फक्पा खारी गानी बेन्सोट्नी र्वाक्साका सो-हन्बेसामु लागि गुकु गुलाई छो़म र्वाक्तोको। 7 गानी थो़रडा, सीसिडा, नेप्चीडा, वाङमिमलाई ख्लो़मु सो-हन्पा नुङ गुकुडलाम इनीमा रिखाम बेसीडा खोत्लेडाम जो़पा दु़म्तो लक्निम बु। आरेसाकाङा वाङमिमलाई बोमु बासिक्पा न-थो़मनुङमा खारीडा वो खोत्लेडाम जो़पा दु़म्नी र्वाक्पा न बेउ। 8 गानी बोमुङा बासी र्वाक्साका गो र्वाङडोम मेएँ, लावो वाङमिमकाम ख्लो़पा सो-हन्सीनुङ थो़प्साका इनीमा रिखाम वो आच्छाङा डे मेएँ र्वाक्साका रेम्मु लागि गो आरे र्वाङडोम सो़। 9 इकीमा ङाचो़ येशू ख्रीष्टकु डोक्पु दिदाम ने गानी चनिम बु। गुमी पाह्रीलाम बाट्पा जो़ल्सिक्पा बाम्डी, लोवो उनीमा हाम वो मेबाट्पा दु़म्सीका गानी बाट्पा जो़ल्सिक्पा दु़म्नी र्वाक्साका गुमी उनी हाम वो मेबाट्पा दु़म्मिडी। 10 ओराम ल्वाकु दुथाम आमा न आरेप्माम बु: माम्था आथाम गानी ग्वामु चो़म्निम ग्वा-ग्वा ग्वामु चो़म्निम खारी ओम्लो बोम्सोमु जो़पा दु़म। गानी मेराम खारी बेपा न बेन्निम कोङङा मेएँ, लावो खारी बोमुडा वो खोत्लेडाम ङादो बान्नी। 11 ओम्लो मेराम खारी बेन्सोट्नी। मेम्लो गानी छो़म ग्वा-ग्वा द्वाक्पा बान्निमका आथा ने इनी चाप्सी ग्वाक्साका मेराम खारी बेन्सोट्नी। 12 इनीमा छो़म ग्वा-ग्वाद्वाक्पा न बु माला गानीनुङ हाम बु मेरामङा ग्वानिलो माम्चु़नी गेर्सी द्वामी। मु़चु़नुङ मेबाट्पा ने ग्वामु र्वाक्पा गुमीका न मेबोमी। 13 गानी हापा ग्वाक्नी मा गानीनुङ ने किचो़ कोङङा दु़म्नु़ मा दु़खा ल्वानी र्वाक्पा आमा न मेएँ, लावो खोत्लेकाम दु़खा कोहोप्मामङा मिम्निमा ख्लो़बेबेनी र्वामु मालुमिम कोङङा सो़। 14 ओम्लोम थारीका गानीनुङ बाट्पा हापाका मेर्मिमकु खेरेलाडा ख्लो़यु़नु़, मा दिफु मेर्मिमनुङ बाट्पा हापाका इनीमा खेरेलाडा ख्लो़यु़नु़। आरेसाका कोलेका कोङमीकु खेरेला त्वाकु खेरेला होप्माम मिम्नु़मा ख्लो़यु़नु़। 15 माम्चु़नीकु सिजेमडा र्याक्मा बु, “हापाकोलोङ खोपानुङ मेघ्लेसावा, मा कतिकलङ खोपानुङ वो मेलिट्पा मेदु़प्सावा।” तीतस नुङ उमा ङोप्सो़मिम 16 गो इनीमा दुथाम बेउमिम मिम्ताम-सो़र्तामङा माम्चु़नीका तीतसकु न-गोनो जु़ल्साम्डी। मेम्मिमका गुमीलाई आलासो़ र्वाङु। 17 तीतसका गुकु र्वाक्तोकोम बिसिड्डाम कोङङा मेएँ, लावो गु उ त्वाकामङा वो छो़म सो हन्डामा उमा नकाङा इनीमाडा रोक्तोङा लेडु़। 18 गुनुङ कोले ल्वाकलाई वो गुकु थु़र्तोङा लेन्कु, मेराम ल्वाक ने जो़पा-सेला थो़बेन्मुडा खोत्ले मण्डलीका उमा नङ कोम्डिम सो़। 19 मेकोति कोङङा मेएँ, लावो मेराम ल्वाक ने ग्वा-ग्वा सोक्थिट्पा खारी बोमुडा ख्लो़किनु़ मा गुकुनुङङा यरूशलेम लनु़ र्वाक्साका मण्डलीमिमका थुट्मिडिम सो़। गुकु ङाचो़कु नङ कोमु लागि मा वाङमिमलाई ख्लो़पा जो़पा खारी बोम्सोमु लागि ओराम खारी बोकु। 20 ओराम ग्वा-ग्वा ग्वाक्साका ख्लो़कुमिम खारीडा गुकुलाई सु़का वो मुमा मेबेन्किमिनु़ र्वाक्साका गुकु जो़होमका ओराम खारी बोकु। 21 हेङालोने गुकु ङाचो़कु मिक्सीलामडा कोङङा मेएँ, मु़चु़मिमकु ङादोडा वो जो़पा खारी बोमुडा चङको-चङको दु़म्कु। 22 मेम्मा कोले ल्वाक वो मेर्चिपनुङङा थु़र्तो लेन्कु। गुलाई गुकु हापा खेप छाम्तोको मा खोत्ले खारीडा उमा सो हन्पा डार्तोको। ओम्लो गानीडला गुका छो़म डोक्पु थो़र बु़डु़मका उमा आथावो हापा सो हन्डाम बु। 23 तीतस ने आमा ङोप्सो़ मा गोनुङ कोयोङा गानीलाई ख्लो़पा मु़चु़ सो़। मेम्मा कोङमी नले ल्वाक ने मण्डलीका थु़र्मिडिचिम मा ख्रीष्टकु नङ कोक्पाचिप सो़। 24 गानी मेर्मिमलाई त्वाकु रिखाम रेम्बेनी, मा गुकु हेङा इनीमा दुथाम नो़ डोक्पु बोनिमिम रेछा र्वाक्साका मण्डलीमिमका ल्वामु चाम्मिनु़। |
© Wycliffe Bible Translators, Inc. All rights reserved.
Wycliffe Bible Translators, Inc.